YOSUA 23 - WUKE SUSI WATTI'U AL᷊AL᷊USASSA

Sasinaukku patatal᷊ein Yosua

¹ Allannune napawe Mawu nangonggolu atatammudda su ṛuangannu Israel; i mangitou tate lai mata'uttu wawansagu seetta. Su tempo udde i Yosua timmadete atonna.

² Ne i tou namago ṛuangannu Israel sarangkanambone, wuṛṛu lai manga piaṛṛange, manga mallaṛuungnga, wuṛṛu manga tembonannu tantara, ana see nabbisara, “Orassa indi ya'u timmadete.

³ I yamiu nasilote al᷊awo'a apan niola'u Mawu Ruatanu su saruannu anambon walahanna isindi ana waugu i yamiu. Apan nangesakki yamiu, eteudde tumba'u Mawu Ruatanu sassane.

⁴ Leta'u manga walahanna apan ta'e natantangnga, aroddi lai leta'u anambon balahanna apan buatte ta'u niwaddo, eteudde leta'a apan uawannada wuassu samba'an da'in Sal᷊ukku Yordan masal᷊a watukku waṛṛata maddatingngu Tahal᷊oangnga Tangngane, sarangkanambone udde sueten ta'u tinahia si yamiu maola'a pussaanu.

⁵ Mawu Ruatanu sarun ma'ola'a manga walahanna udde pasisoṛṛota, wuṛṛu tumal᷊angnga i yamiu napawe i yamiu inai mamangalo si mangitou i yamiu sarun manahuanna wanua mangitou, ere buatte pina'iren Mawu Ruatanu si yamiu.

⁶ Ana waugu udde, paatehamma tadea'u i yamiu sidutu tuttuṛṛuta wuṛṛu mapaamattu al᷊awo'a apan uawoṛṛeta su lal᷊ummu Wuken Tita Musa. Imbaṛṛangnga lumawanna saran sambau wuassu manga tita udde.

⁷ Ringannu aroddi yamiu tawe mallal᷊o'an manga walahanna apan ta'e uatana'a su sampunna ringanni yamiu. I yamiu tawe maasagon arannu manga monganni mangitou ara'e massalu sulal᷊ummu aranna udde. Wuṛṛu lai yamiu tawe mattaṛṛamawu ara'e massubba su manga monganna udde.

⁸ Arawe i yamiu ṛinone sidutu matuṛutta Mawu, ere lai buatte niola'i yamiu naddatingngu orassa indi.

⁹ Manga walahanna apan bahewalla wuṛṛu matohassa buatte nilimbuaṛannu Mawu ana waugu i yamiu, tawe saran sangkatou wuassi mangitou apan botongnge maaroappa si yamiu.

¹⁰ Sangkatou taumata su wallati yamiu wotongnge maal᷊uṛugu taumata su ṛiwune, ana waugu ete Mawu Ruatanu apan mamangalo hunan kamiu, ere buatte nipa'ire-Ne.

¹¹ Ana waugu udde paanaunge mandangngu Mawu Ruatanu.

¹² Amungkangu i yamiu tawe matuṛṛuta wuṛṛu i yamiu maammulu manga walahanna apan ta'e uatana'a ringanni yamiu, wuṛṛu i yamiu ma'awingngi mangitou,

¹³ paanaunge, Mawu Ruatanu sarun tate mallimbuakka manga walahanna udde lai ana waugu i yamiu. Arawe mawal᷊i'a, i mangitou sarun maasilaka atonna si yamiu, ana waugu i mangitou sarun maola'a ere wal᷊ati'a ara'e sedda si yamiu. I mangitou lai sarun mapaasusan kamiu; ana waugu i mangitou sarun maola'a ere sambokka su liuddi yamiu ara'e ere duṛṛi su lal᷊ummu matanu i yamiu sidutu uatataṛaṛangnga ma'oman sara tawe saran sangkatou su wallati yamiu apan matantangnga su wanua mapia indi apan nionggolu Mawu Ruatanu si yamiu.

¹⁴ Orassa indi nia'omante tempone i ya'u sarun mate. I yamiu sarangkanambone, sangkatou-sangkatou masingkatta atonna manungku Mawu Ruatanu sueten ngonggolu al᷊awo'u apapia apan buatte nipa'ire-Ne. Al᷊awo'u pa'aire-Ne buatte nitipussa, tawe saran sambau apan tawe niatipussa.

¹⁵ Arawe su ereapa i Tou nanipussa al᷊awo'u pa'aire-Ne si yamiu, aroddi lai i Tou sarun mapaamattu ṛuuman-Ne si yamiu.

¹⁶ Napawe i yamiu lumawanna pa'aire apan buatte nirolokku Mawu Ruatanu tadea'u sidutu tattuṛutanna, wuṛṛu i yamiu inai mattaṛṛamawu su manga Mawu waine see lai massubba manga Mawu udde, ne Mawu sarun masa'u, wuṛṛu maṛṛuumanni yamiu. Su lal᷊ummu tempo apan mal᷊ihakka i yamiu sarangkanambone sarun mawul᷊i wuassu wanua apan mapia indi, apan nionggolu Mawu si yamiu.”