YOSUA 21 - WUKE SUSI WATTI'U AL᷊AL᷊USASSA

Manga soan taumatan Lewi

^1-2 Su sambau allo manga tembonannu amonanna su lal᷊ummu ṛuanganni Lewi inaite watukku Silo su wanua Kanaan, wuṛṛu sinumaruanna si Imam Eleazar, Yosua ana'i Nun, wuṛṛu manga tembonannu anambon amonanna su manga ṛuangannu Israel. I mangitou nabbisara, “Wuassi Musa, Mawu buatte nandolokka tadea'u yami, manga taumatan Lewi, onggol᷊annu manga soa pamanuanni yami wuṛṛu manga wadda'a maranin manga soa apan pappadul᷊iananna winatangngi yami.”

³ Ne taumatan Israel naddaringikka darolokku Mawu. Wuassu leta'a pussa'a mangitou sassane, i mangitou nangonggola su taumatan Lewi, manga soa apan nipilene wuṛṛu manga leta'u wadda'a.

⁴ Paarorone nanengkamma manga soa eteudde manga amonanna wuassu amonanni Kehat su lal᷊ummu ṛuanganni Lewi. Manga amonanna papapulunni Imam Harun nionggol᷊annu mapul᷊o tallu soa wuassu wageangngu ṛuanganni Yehuda, i Simeon wuṛṛu i Benyamin.

⁵ Manga amonanna waine wuassu ṛuanganni Kehat nionggol᷊annu soa mapul᷊o wuassu leta'a wageangngu ṛuanganni Efraim, ṛuanganni Dan wuṛṛu ṛuanganni Manasye su samba'an waṛṛatu Sal᷊ukku Yordan.

⁶ Amonanni Gerson naasomba mapul᷊o tallu soa wuassu wageangngu leta'u ṛuanganni Isakhar, i Asyer, i Naftali wuṛṛu ṛuanganni Manasye su samba'an da'in Sal᷊ukku Yordan.

⁷ Manga amonanna wuassu ṛuanganni Merari naasomba mapul᷊o dua soa wuassu wageangngu leta'u ṛuanganni Ruben, i Gad wuṛṛu i Zebulon.

⁸ Etearoddi taumatan Israel nattahia manga soa udde ringannu manga leta'u wadda'a ringannu niundi su taumatan Lewi, ere buatte nirolokku Mawu si Musa.

Manga soan amonanni Kehat

^9-19 Wuassu amonanni Kehat su lal᷊ummu ṛuanganni Lewi, ete manga imam papapulunni Harun apan paarorone nanengkamma manga soane; i mangitou niwalungannu mapul᷊o tallu soa ringannu manga leta'u wadda'a. Wuassu ṛuangannu Yehuda wuṛṛu i Simeon, i mangitou nanengkamma sio soa eteudde; Libna, Yatir, Estemoa, Holon, Debir, Ain, Yuta, Bet-Semes wuṛṛu Arba, apan aranne nisaggo tumuṛṛuttu arannu iamangngi Enak. Soa udde apan orassa indi arane Hebron, eteudde sambau soa tatal᷊anganna su panenteannu Yehuda. Manga wawail᷊anna wuṛṛu manga ampungngu soa indi buatte niwalungnga si Kaleb ana'i Yefune maola'a leta'a pussaane. Wuassu ṛuangannu Benyamin i mangitou nanengkamma appata soa, eteudde: Gibeon, Geba, Anatot wuṛṛu Almon.

^20-26 Manga alahanna waine wuassu amonanni Kehat nionggol᷊annu mapul᷊o soa ringannu manga leta'u wadda'a. Wuassu ṛuanganni Efraim i mangitou nanengkamma appata soa, eteudde: Bet-Horon, Kibzaim, Gezer wuṛṛu Sikhem, sambau soa tatal᷊anganna su panenteannu Efraim. Wuassu ṛuanganni Dan i mangitou nanengkamma appata soa, eteudde: Elteke, Gibeton, Ayalon wuṛṛu Gat-Rimon. Wuassu ṛuanganni Manasye su samba'an baṛṛata i mangitou nanengkamma darua soa eteudde; Taanakh wuṛṛu Gat-Rimon.

Manga soan amonanni Gerson wuṛṛu i Merari

^27-33 Sambau amonanna waine su lal᷊ummu ṛuanganni Lewi eteudde amonanni Gerson. Manga alahanna su lal᷊ummu amonanni Gerson nionggol᷊annu mapul᷊o tallu soa ringannu manga leta'u wadda'a. Wuassu ṛuanganni Manasye samba'an ra'i i mangitou nanengkamma darua soa eteudde; Beestera wuṛṛu Golan, sambau soa tatal᷊anganna su leta'u Basan. Wuassu ṛuanganni Isakhar i mangitou nanengkamma appata soa eteudde: Kisyon, Dobrat, Yarmut wuṛṛu En-Ganim. Wuassu ṛuanganni Asyer i mangitou nanengkamma appata soa, eteudde: Misal, Abdon, Helkat wuṛṛu Rehob. Wuassu ṛuanganni Naftali i mangitou nanengkamma tatallu soa, eteudde; Hamat-Dor, Kartan wuṛṛu Kedes, sambau soa tatal᷊anganna su Galilea.

^34-40 Ṛuanganna lambene su lal᷊ummu ṛuanganni Lewi, eteudde amonanni Merari nionggol᷊annu mapul᷊o dua soa ringannu manga leta'u wadda'a. Wuassu ṛuanganni Zebulon i mangitou nanengkamma appata soa, eteudde; Yokneam, Karta, Dimna, wuṛṛu Nahalal. Wuassu ṛuanganni Ruben i mangitou nanengkamma appata soa, eteudde; Bezer, Yahas, Kedemot wuṛṛu Mefaat. Wuassu ṛuanganni Gad i mangitou nanengkamma appata soa eteudde: Mahanaim, Hesybon, Yaezer wuṛṛu Ramot sambau soa tatal᷊anganna su Gilead.

^41-42 Nariaddi wuassu manga leta'a apan tatahuanannu walahannu Israel anambone appatu pul᷊o ual᷊u soa ringannu manga leta'u wadda'a maranine apan nionggola su manga taumatan Lewi.

Kanaan nabbal᷊i pussa'an ṛuangannu Israel

⁴³ Etearoddi Mawu nangonggolu ahewallu leta'a su ṛuangannu Israel apan buatte pina'ire-Ne ringannu sasalu su iupungngu al᷊amonan mangitou. Napawe naapanganute wanua udde, ṛuangannu Israel namanuate poiaroddi.

⁴⁴ Ne ere buatte pina'ire Mawu su iupungngu al᷊amonan mangitou, wanua udde matammudda ana waugu lal᷊u'arannu Mawu. Manga seetti mangitou tawe saran sangkatou maaroappa si mangitou, ana waugu Mawu nangonggolu auntunganna su taumatan Israel su al᷊awo'u seetti mangitou.

⁴⁵ Mawu nanipussa al᷊awo'u pa'aire-Ne su walahannu Israel; tawe saran sambau apan tawe nitipussu Mawu.