YOSUA 2 - WUKE SUSI WATTI'U AL᷊AL᷊USASSA

I Yosua nanddolokku matataṛṛaso'o watukku Yerikho

¹ Wua'udde wuassu paddasananna su Sitim, i Yosua nanddolokku ruan katou matataṛṛaso'o watukku Kanaan. Itarua nirolokka iapaparikissa wanua Kanaan ringannu ma'imbuni, nangillembo lai su soan Yerikho. Ne inaite itarua watukku soa, wuṛṛu nanaṛṛabbi su wal᷊en sangkatou wawine masandaga, aranne i Rahab.

² Ratun soa Yerikho naaringikka manungku su rabbi udde pia taumatan Israel apan nirumanta mattaṛṛaso'o leta'u Yerikho.

³ E ratu nandolokku taumata ringanni Rahab niapapasingkattu parenta indi, “Paasabanga'a manga taumata apan ua'iantal᷊a su wal᷊enu udde. Ete i mangitou matataṛṛaso'o apan nirumanta mamarikissa ahewallu leta'u Yerikho!”

^4-6 “Atonna pia taumata nirumanta su wal᷊e'u,” sasimbaki Rahab, “arawe i ya'u wagga i mangitou wuassuapa. I mangitou inaitearoddi tanginna su tempo pa'aillal᷊annu rua sangkatuṛṛangnga tantal᷊anna ngaran soa taambe niṛṛuuda. Wuṛṛu i ya'u tawe naiwal᷊o watukku apa amatanni mangitou, arawe amungkangu i mangitou mal᷊ihakka enggenanna, asinungka ta'e wotongnge aratinganna.” (Wutte'e i Rahab buatte namuni ngana dua matataṛṛaso'o udde niommboannu laṛṛami su pangketu wal᷊ene.)

⁷ Ne inaite manga daroloṛṛannu ratu udde nanantangu soa. Napawe i mangitou su liuddete, ngaran soa niṛṛuuda. I mangitou maddea'a ruan katou matataṛṛaso'o udde na'oman sara tatumbeanna su Sal᷊ukku Yordan.

⁸ Ṛabbi udde tantal᷊anna matataṛṛaso'o wuassu Israel taambe natiilla, i Rahab niumawitta su pangketta,

⁹ wuṛṛu nabbisara sitarua, “I ya'u masingkatta Mawu buatte nangonggolu wanua indi si yamiu. Anambon taumata isindi matta'utti yamiu.

¹⁰ Yami buatte naaringkka watti'a su ola'u ereapa Mawu napaamaran Tahal᷊oangngu Gelagah su saruanni yamiu, su tempo i yamiu nanantangngu Mesir. Yami lai naaringikke ereapa i yamiu namate si Sihon wuṛṛu si Og, ratun balahannu Amori udde su samba'an da'in Sal᷊ukku Yordan.

¹¹ Aroddi yamiu naaringkka manga watti'a udde, yami mangke nata'utta. Anambon taumatan kami nawul᷊i awawaṛṛanine ana waugu i yamiu. Mawu Ruatanu atonna Mawu Ruata Apan Lembon Taṛṛino su langitta wuṛṛu su runia.

^12-13 I ya'u mangantima i yamiu mappulu massalu sulal᷊ummu aran-Ne manungku i yamiu sarun ma'ellega amonangku ringannu mapia ere lai ta'u niola'a si yamiu Pa'irete manungku hagurangku, tuṛṛa-tuṛṛangku wuṛṛu anambon amonanni mangitou tawe pateanni yamiu, arawe lu'aranni yamiu wuṛṛu ṛingannu udde onggol᷊eten sambau wataṛṛune manungku i yamiu wotongnge apangimanangku!”

¹⁴ Ne itarua sinumimbakka, “Iambua maddiandi manungku napawe Mawu manantilu wanua indi si yami, yami sarun ma'ola'a si yamiu ringannu mapia, sawal᷊iate i'o tawe mabatti'a sisai-sai su ola'i yami. Wala'e Mawu mamontoga si yami amungkangu yami tawe manipussu pa'aire udde.”

¹⁵ Ana waugu wal᷊en i Rahab niapaarisikka su darandungu soa, ne i Rahab nanossoki tarua wuassu sungketa.

¹⁶ “Inaite watukku panenteanna,” unni Rahab sitarua, “Tadea'u manga taumata apan nirolokku ratu udde tawe maasametta si radua. Pa'imbunite al᷊annune tallu allo ma'oman sara i mangitou mabelengnga, wakkute udde iradua wotongngete manassukku amatanna.”

¹⁷ Ruan katou matataṛṛaso'o udde nabbisara si Rahab, “Ore, yami sarun manipussa pa'aire apan buatte nirorongannu si yami.

¹⁸ Tumba'u indi apan ṛinone olaannu. Amungkangu yami mamangalote wanuanu, ṛinone i'o mangiitu tal᷊i maṛṛamu su sungketa indi su tampa iambua nisossoka. Hagurangngu, tuṛṛa-tuṛṛangu anambon ṛuangannu amonannu iamangu ṛinone iammula su wal᷊enu indi.

¹⁹ Amungkangu su wallati mangitou piaddu sumabbanga wuassu wal᷊en indi wuṛṛu nate niapate, papatene udde sal᷊ane sassane; yami waggan hatto udde. Arawe amungkangu piaddu nasilaka sulal᷊ummu wal᷊en indi, udde singkatteng kami.

²⁰ Arawe, amungkangu i yamiu namasingkati yami su taumata, ne yami tate aiitannu pa'aire apan nirorongannu wussi yami.”

²¹ I Rahab mappuluten olangnge udde ana see namalaten tarua niumamatta. Wua'udde i tou nangiittu tal᷊i maṛṛamu udde su sungketu wal᷊ene.

²² Ne inaite ruan katou matataṛṛaso'o udde watukku panenteanna wuṛṛu na'imbuni poiaroddi. Tallu allo al᷊annune manga daroloṛṛannu ratu maddea'a sitarua su al᷊awo'u tampa su ahewallu leta'a udde, arawe tawe naasomba sitarua. Panginsueanne manga daroloṛṛanna udde napul᷊ete watukku Yerikho.

²³ Ana see ruan katou matatarṛṛaso'on Israel udde sinumossokke wuassu panenteanna wuṛṛu tinumumbete sal᷊ukka, wua'udde nabelengnga ringanni Yosua. Sarangkanambone apan nariaddi sitarua niwatti'a si tou.

²⁴ Wua'udde i mangitou nabbisara, “Atonna Mawu nangonggolu ahewallu wanua udde si ite; manga taumata poiaroddi matta'utti ite.”