YOSUA 19 - WUKE SUSI WATTI'U AL᷊AL᷊USASSA

Leta'a pan nita'e su ṛuanganni Simeon

¹ Patatahia aruane eteudde leta'u manga amonanna su lal᷊ummu ṛuanganni Simeon. Passarannu leta'i mangitou nasutta sara lal᷊ummu passarannu leta'a pussa'a ṛuanganni Yehuda.

^2-6 I mangitou nionggol᷊annu mapul᷊o tallu soa indi ringannu manga ampungnga maranine: Bersyeba, Syeba, Molada, Hazar-Sual, Bala, Ezem, Eltolad, Betul, Horma, Ziklag, Bet-Hamarkabot, Hazar-Susa, Bet-Lebaot, wuṛṛu Saruhen.

⁷ Wuṛṛu lai appata soa manansunna indi ringannu manga ampungnga maranine; Ain, Rimon, Eter wuṛṛu Asan.

⁸ Nasutta lai anambon ampungnga apan uapal᷊iwutta manga soa udde araune ma'oman sara Baalat-Beer (eteudde Rama) su leta'a samba'an timukka. Eteudde leta'a apan nionggola su manga ṛuanganna wuassu ṛuanganni Simeon apan maola'a pussa'a mangitou.

⁹ Ana waugu leta'a wuatti Yehuda tumaniten wahewalla, ne samba'a wuassu leta'a udde nionggolla su ṛuanganni Simeon.

Leta'a apan nita'e su ṛuanganni Zebulon

¹⁰ Pattatahia atallune eteudde leta'u manga amonanna su lal᷊ummu ṛuanganni Zebulon. Passarannu leta'a apan nionggolla si mangitou naddatingngu Sarid.

¹¹ Wuassu Sarid, akkitu passaranna samba'an waṛṛata matudda watukku Marala, wua'udde mapangawakka Dabeset wuṛṛu ana'u sal᷊ukka su samba'a ra'in Yokneam.

¹² Akkitu passaranna su samba'an ra'i manattakka wuassu Sarid matudda watukku passarannu Khislot-Tabor, masal᷊a watukku Dobrat, ana see suma'a watukku Yafia.

¹³ Wua poiaroddi akkitu passaranna udde masal᷊a watukku ra'i watukku Gat-Hefer wuṛṛu Et-Kazin, ana see mabbeṛṛo watukku Nea mattuddan Rimon.

¹⁴ Su samba'an sawannakka, pasarannu leta'a udde mabbeṛṛo watukku Hanaton wuṛṛu mauddussa su Wawal᷊annu Yiftah-El.

¹⁵ Su lal᷊ummu wageangngu ṛuangannu Zebulon udde nasutta lai: Katat, Nahalal, Simron, Yidala wuṛṛu Betlehem. Wageangngi mangitou udde nasutta lai mapul᷊o dua soa ringannu manga ampungnga maranine.

¹⁶ Manga soa wuṛṛu manga ampungnga udde addone su lal᷊ummu wageangngu leta'a apan nionggola su manga amonanna su lal᷊ummu ṛuanganni Zebulon apan maola'a leta'a pussa'a mangitou.

Leta'a apan nita'e su ṛuanganni Isakhar

¹⁷ Patatahia aiappanne eteudde leta'u manga amonanna su lal᷊ummu ṛuanganni Isakhar.

¹⁸ Su lal᷊ummu wageangngi mangitou nasutta lai: Yizreel, Khesulot, Sunem, Hafaraim, Sion, Anaharat,

^19-20 Rabit, Kisyon, Ebes.

²¹ Remet, En-Ganim, En-Hada, wuṛṛu Bet-Pazes.

²² Passarannu leta'i mangitou naeṛṛetta lai Tabor, Sahazima, Bet-Semes, ana see masue su Sal᷊ukku Yordan. Wageangngi mangitou udde nasutta lai mapul᷊o annumma soa ringannu manga ampungnga maranine.

²³ Manga soa wuṛṛu manga ampungnga udde addone su lal᷊ummu wageangngu leta'a apan nionggola su manga amonanna su lal᷊ummu ṛuanganni Isakhar apan maola'a leta'a pussa'a mangitou.

Leta'a apan nita'e su ṛuanganni Asyer

²⁴ Patatahia al᷊imane eteudde leta'u manga amonanna su lal᷊ummu ṛuanganni Asyer.

²⁵ Wageangngi mangitou nasutta: Helkat, Hali, Beten, Akhsaf,

²⁶ Alamelekh, Amad, wuṛṛu Misal. Passarannu leta'i mangitou su samba'an waṛṛata nangeṛṛetta Wowon Karmel wuṛṛu Sal᷊ukku Libnat.

²⁷ Wua isudde akkitu passaranni mangitou udde mabbeṛṛo watukku ra'i su Bet-Dagon ana see nangeṛetta passarannu Zebulon wuṛṛu wawal᷊annu Yiftah-El mattudda watukku sawannakka su Bet-Emek wuṛṛu Nehiel. Ana see akkitu passaranna udde lai masal᷊a watukku sawannakku Kabul,

²⁸ Ebron, Rehob, Hamon, wuṛṛu Kana, araune maddatingngu Sidon.

²⁹ Wua'isudde akkitu passaranna mabeṛṛo watukku Rama masal᷊a maddatingngu Soa Tirus, eteudde sambau soa apan pia tatandange; wua'udde akkitu passaranna mabeṛṛo apia watukku Hosa ana see masue su Tahal᷊oangnga Tangngane. Su lal᷊ummu manga passaranna udde nasutta lai Mahalab, Akhzib,

³⁰ Uma, Afek, wuṛṛu Rehob. Ahewallu leta'i mangitou nasutta ruan pul᷊o dua soa ringannu manga ampungnga maranine.

³¹ Manga soa wuṛṛu manga ampungnga udde addone su lal᷊ummu wageangngu leta'a apan nionggola su manga amonanna su lal᷊ummu ṛuanganni Asyer apan maola'a leta'a pussa'a mangitou.

Leta'a apan nita'e su ṛuanganni Naftali

³² Patatahia aiannumme eteudde leta'u manga amonanna su lal᷊ummu ṛuanganni Naftali.

³³ Passarannu leta'i mangitou manattakka wuassu Helef, ma'oman sara punnu alu ek su Zaananim, masal᷊a watukku Adami-Nekeb, ana see watukku Yabneel, maddatingngu Lakum, wua'udde masue su Sal᷊ukku Yordan.

³⁴ Wua'isudde akkitu passarannu leta'a udde mabeṛṛo watukku waṛṛata su Aznot-Tabor, wuṛṛu wua'poiaroddi watukku Hukok. Su samba'an timukku, leta'a indi uasasaran leta'u Zebulon, su samba'an waṛṛata ringanni Asyer, wuṛṛu su samba'an ra'i ringannu Sal᷊ukku Yordan.

³⁵ Manga soa apan pia tatandangnge eteudde: Zidim, Zer, Hamat, Rakat, Kineret,

³⁶ Adama, Rama, Hazor,

³⁷ Kedes, Edrei, En-Hazor,

³⁸ Yiron, Migdal-El, Horem, Bet-Anat, wuṛṛu Bet-Semes. Ahewallu leta'i mangitou nasutta lai mapul᷊o sio soa ringannu manga ampungnga maranine.

³⁹ Manga soa ringannu manga ampungnga udde addone su lal᷊ummu wageangngu leta'a apan nionggola su manga amonanna su lal᷊ummu ṛuanganni Naftali apan maola'a leta'a pussa'a mangitou.

Leta'a apan nita'e su ṛuanganni Dan

⁴⁰ Patatahia appitune eteudde leta'u manga amonanna su lal᷊ummu ṛuanganni Dan.

⁴¹ Leta'i mangitou indi nasutta Zora, Esytaol, Ir-Semes,

⁴² Saalabin, Ayalon, Yitla,

⁴³ Elon, Timna, Ekron,

⁴⁴ Elteke, Gibeton, Baalat,

⁴⁵ Yehud, Beneberak, Gat-Rimon,

⁴⁶ Me-Yarkon, Rakon, wuṛṛu lai leta'a maranin Yope.

⁴⁷ Manga taumatan ṛuanganni Dan mawul᷊ianten sambageanganna wuassu leta'i mangitou, nariaddi i mangitou inaite watukku Lasem wuṛṛu namangalo soa udde. I mangitou nangaṛṛo, namate tumanangnge, wuṛṛu namanua su soa udde. Ne i mangitou natana'e isudde wuṛṛu namal᷊u arannu soan Lasem nabbal᷊i Soa Dan, tumuṛṛuttu arannu al᷊amonan mangitou.

⁴⁸ Manga soa wuṛṛu manga ampungnga udde addone su lal᷊ummu leta'a apan nionggola su manga amonanna su lal᷊ummu ṛuanganni Dan apan maola'a pussa'a mangitou.

Patatahia panginsueanne

⁴⁹ Napawe manga ṛuangannu Israel buatte nattahia leta'a su wanua udde, i mangitou nangonggola si Yosua ana'i Nun sambageanganna leta'a apan maola'a leta'a pussaane.

⁵⁰ Ere buatte nirolokku Mawu, i mangitou nangonggolu soa apan niroronganni tou eteudde: Timnat-Serah su panenteannu Efraim. I Yosua napararisikku soa udde apia, ana see namanuate isudde.

⁵¹ Etearoddi i Imam Eleazar, i Yosua ana'i Nun wuṛṛu manga tembonannu amonanna su lal᷊ummu manga ṛuangannu Israel nattahia leta'a su wanua udde ringannu niundi tadea'u ipadorongnga tatantiro wuassu Mawu. Olangnge udde niola'i mangitou su Silo su saruannu ngaran Rasannu Mawu. Ne nasuete patattahia leta'a udde.