YOSUA 18 - WUKE SUSI WATTI'U AL᷊AL᷊USASSA

Patatahia leta'a lambene apan pina'iren Mawu

¹ Napawe naapangaṛṛote wanua apan pina'iren Mawu, su taumatan Israel sarangkanambone naammula su Silo, ana see i mangitou napararisikku Rasanna Darantan Mawu.

² Ta'e pia pitu ṛuangannu Israel apan taambe naasomba tahia leta'a.

³ Nariaddi, i Yosua nabbisara ṛuangannu Israel, “I yamiu ta'e ma'apulu maṛṛado sara tingngera, wua'udde i yamiu inaite matana'a su leta'a apan nionggolu Mawu si yamiu, Mawu Ruatan al᷊amonanu?

⁴ Pamilete siri tallu wuassu al᷊awo'u ṛuanganna. I ya'u sarun mandolokki mangitou iapaellega ahewallu wanua indi wuṛṛu iapa woṛṛetu manga passarannu leta'a apan mappulu tahuananni mangitou. Wua'udde, i mangitou ṛinone mabelengnga ringangku.

⁵ Leta'a udde ṛinone tahianna maola'a pitun kaddoanna. I Yehuda sidutu su wageangngi mangitou su samba'a timukka, wuṛṛu i Yusuf su wageangnge samba'an sawannakka.

⁶ Hambarannu manga passarannu pitu wageangngu leta'a udde ṛinone olaanna wuṛṛu itantilla si ya'u. Ya'ute mangundi tadea'u maasingkatta apa apan itantunnu Mawu Ruata si yamiu.

⁷ Tumba'u ṛuanganni Lewi tawe maassomba tahia leta'a suadio'a ringanni yamiu, ana waugu wageangngi mangitou eteudde maola'a manga imam mangangimbe Mawu. Wuṛṛu suola'u ṛuanganni Gad, i Ruben wuṛṛu sangkawageanganna ṛuanganni Manasye, i mangitou buatte nanengkamma wageangnge su samba'a ra'in Sal᷊ukku Yordan. I Musa allangu Mawu, buatte nangonggolu leta'a udde si mangitou.”

⁸ Ne i Yosua nangonggolu manga tatantiro indi su manga taumata udde, “Roote pa'ellega ahewallu wanua indi ola'ete hambarannu manga passaranne; wua'udde rantate pabelengnga apia ringangku. Mantewe i ya'u mangundi isindi su Silo tadea'u maasingkatta apa apan itantunnu Mawu si yamiu.” Napawe naasengkampe manga tatantiro udde wuassi Yosua, i mangitou inaite namarikissa leta'a udde.

⁹ Ahewallu wanua udde niamatanni mangitou ana see namoṛṛettu manga passarannu pitu wageangngu leta'a udde see lai namoṛṛettu manga soa apan addone su lal᷊umme. Wua'udde i mangitou nabelengnga ringanni Yosua su paddasananna su Silo.

¹⁰ Ana see i Yosua nangundite tadea'u maasingkatta apa apan tinantunnu Mawu si mangitou. Wua'udde i Yosua nangonggolu leta'a su manga ṛuangannu walahannu Israel apan taambe naasomba tahian leta'a.

Leta'a apan nita'e su ṛuanganni Benyamin

¹¹ Patatahia dorone eteudde leta'u manga ṛuanganna su lal᷊ummu ṛuanganna Benyamin. Wageangngi mangitou udde addone su wallatu leta'u ṛuanganni Yehuda wuṛṛu leta'u ṛuanganna papapulunni Yusuf.

¹² Su samba'a sawannakka, manga passarannu leta'i mangitou manattakka wuassu Sal᷊ukku Yordan, ana see suma'a su sendekke samba'an sawannakku Yerikho, wua'udde watukku waṛṛata sumabbi panenteanna ma'oman sara araune su wadda'u Bet-Awen.

¹³ Akkitu passaranna udde masal᷊a lai watukku sendekke su samba'an timukku Lus (apan tinumelengnga aranne Betel), ana see lumintukka watukku Atarot-Adar su wowone samba'an timukku Bet-Horon-Wunnene.

¹⁴ Wuassu samba'an waṛṛatu wowone udde, akkitu pasarannu leta'a udde mabeṛṛo watukku timukka mattuda watukku Kiryat-Baal (eteudde Kiryat-Yearim). Kiryat-Baal eteudde pussa'an ṛuangannu Yehuda. Eteudde akkitu passarannu leta'a su samba'an waṛṛata.

¹⁵ Manga passaranna su samba'an timukka manattakka wuassu winggin Kiryat-Yearim masal᷊a watukku manga al᷊imatan kua'e Me-Neftoah,

¹⁶ ana see sumossokka su sendekku wowone apan uasaruannu Wawal᷊annu-Hinom su pentakku sawannakku Wawal᷊annu-Refaim. Wua'udde akkitu passaranna watukku timukka sumabbi Wawal᷊anu Hinom samba'an timukku manga sendekku wowone su wanuan Yebus, masal᷊a watukku En-Rogel,

¹⁷ mabeṛṛo su sawannakka watukku En-Semes, ana see watukku Gelilot su samba'an Sasaannu Adumim. Wua'udde akkitu passaranna udde sumossokka watukku Watun Bohan (Bohan eteudde ana'i Ruben),

¹⁸ ana see sumabbi samba'an sawannakku manga wowone apan uasaruannu Wawal᷊annu Yordan, wua'udde sumosokka su wal᷊ane udde,

¹⁹ sumabbi sawannakku manga wawal᷊annu wowon Bet-Hogla, wuṛṛu masue su wageangngu sawannakku Tahal᷊oangnga Nate su mamoṛṛongannu Sal᷊ukku Yordan. Eteudde passaranne su samba'an timukka.

²⁰ Sal᷊ukku Yordan naola'a passaranna su samba'an timukka. Etearoddi manga passarannu leta'a apan niwalungnga su manga ṛuanganna su lal᷊ummu ṛuanganni Benyamin apan maola'a pussa'a mangitou.

^21-24 Manga soa apan tatahuanannu manga amonanna su lal᷊ummu ṛuanganni Benyamin, soa sarangkanambone mapul᷊o dua ringannu manga ampungnga maranine, eteudde: Yerikho, Bet-Hogla, Emek-Kezis, Bet-Araba, Zemaraim, Betel, Haawim, Para, Ofra, Kefar-Haamonai, Ofni wuṛṛu Geba.

^25-28 Wuṛṛu lai mapul᷊o appata soa manansunna indi ringannu manga ampungnga maranine: Gibeon, Rama, Beerot, Mizpa, Kefira, Moza, Rekem, Yirpeel, Tarala, Zela, Elef, Yebus (eteudde Yerusalem), Gibea wuṛṛu Kiryat-Yearim. Eteudde manga leta'a apan niwalungnga su manga amonanna su lal᷊ummu ṛuanganni Benyamin apan maola'a pussa'a mangitou.