YOSUA 17 - WUKE SUSI WATTI'U AL᷊AL᷊USASSA

Ṛuanganni Manasye su samba'an waṛṛatu Sal᷊ukku Yordan

¹ Sambageanganna leta'a su samba'an waṛṛatu Sal᷊ukku Yordan nionggola su sambageangannu manga amonanna papapulunni Manasye, ana'a pahul᷊un i Yusuf. I Makhir, iamangngi Gilead, eteudde ana'a pahul᷊un Manasye. Ana waugu i tou sangkatou taṛṛa pangalo, ne leta'u Gilead wuṛṛu Basan apan addone su samba'an ra'in Sal᷊ukku Yordan nionggola si tou.

² Leta'a su samba'an waṛṛatu Sal᷊ukku Yordan nionggola su manga amonanna waine wuassu papapulunni Manasye, eteudde amonanni: i Abiezer, i Helek, i Asriel, i Sekhem, i Hefer wuṛṛu i Semida; sarangkanambone udde papapulunnu esakka wuassi Manasye ana'i Yusuf. Ete i mangitou udde uapua manga amonanna.

³ I Zelafehad, ana'i Hefer, pulunni Gilead (Gilead eteudde ana'i Makhir pulunni Manasye), tawe naasomba ana'a esakka, tumba'u ana'a wawine, eteudde: i Makhla, i Noa, i Hogla, i Milka, i Tirza.

⁴ I mangitou inaite ringanni Imam Eleazar, i Yosua ana'i Nun see lai manga piaṛṛangnge, wuṛṛu nabbisara, “Mawu namasingkatta si Musa manungku yami lai ṛinone maasomba wuatta leta'a ere lai manga tuṛṛangngi yami esakka.” Ana waugu udde, nassul᷊ungngu parenta Ruata, manga ana'i Zelafehad wawine udde nionggol᷊annu leta'a su sambau ringannu manga tuṛṛangngi mangitou esakka.

^5-6 Nariaddi, wal᷊ine tumba'u papapulunnu esakka wuassi Manasye apan naasomba tahia leta'a, arawe papapulunne lai wawine. Ana waugu udde anio ṛuanganni Manasye niwalungannu mapul᷊on tampa, wai'o lai leta'u Gilead wuṛṛu Basan su samba'a ra'in Sal᷊ukku Yordan. Leta'u Gilead nionggola su papapulunni Manasye waine.

⁷ Manga akkitu passarannu leta'u ṛuanganni Manasye manattakka wuassu Asyer watukku Mikhmetat su samba'a ra'in Sikhem. Wua isudde akkita udde sumosokka watukku timukka maddatingngu leta'u ṛuanganni En-Tapuah.

⁸ Wageangngu leta'u Tapuah udde pussa'an ṛuanganni Manasye, arawe soa Tapuah, su passaranna, uddewe pussa'an papapulunni Efraim.

⁹ Manansunna akkitu passarannu leta'i Manasye udde sumossokka maddatingngu ana'u Sal᷊ukku Kana. Manga soa su samba'a timukku ana'u sal᷊ukka udde pussa'an Efraim, salaiwe addone su lal᷊ummu wageangngi Manasye. Akkitu passarannu leta'i Manasye udde manansunna uatantuṛṛutta lal᷊anna su samba'a sawannaku ana'u sal᷊ukka udde, wua'udde muddussa su Tahal᷊oangnga Tangngane.

¹⁰ Ete aroddi Efraim uawanua su samba'a timukka wuṛṛu Manasye su samba'a sawannakka, wuṛṛu Tahal᷊oangnga Tangngane maola'a passaranni mangitou samba'a waṛṛata. Su samba'a palonna, leta'u ṛuanganni Manasye udde uasasaran leta'i Asyer, wuṛṛu su samba'a lawassiitta, uasasaran leta'i Isakhar.

¹¹ Su lal᷊ummu wageangngu leta'i Isakhar wuṛṛu i Asyer udde, pia manga leta'a pussa'a Manasye, eteudde: Bet-Sean, wuṛṛu Yibleam ringannu manga ampungnga maranine. See lai: Dor (soa apan addone su winggin sahatta), En-Dor, Taanakh, Megido wuṛṛu manga ampunga maranine.

¹² Arawe ṛuanganni Manasye tawe naal᷊imbuakka tumana'u manga soa udde; ana waugu udde taumatan Kanaan ta'e uatana'a isudde.

¹³ Ewe'e lai su allo murine napawe taumatan Israel nabbal᷊i mattohasanna, i mangitou tawe naal᷊imbuakka anambon taumatan Kanaan; i mangitou tumba'u mammata'u manga taumata udde iapamanara manaran mangitou.

Ṛuanganni Efraim wuṛṛu ṛuanganni Manasye su samba'an waṛṛata madorongnga leta'a tatambane

¹⁴ Papapulunni Yusuf nabbisara si Yosua, “Anio yami nionggol᷊annu leta'a tumba'u addio'a, sumbal᷊i yami manambo, ana waugu Mawu buatte nangal᷊amatta si yami?”

¹⁵ I Yosua sinumimbakka, “Ana waugu i yamiu tumaniten manambo, wuṛṛu wageangngu panenteanni Efraim tate mattiudda si yamiu, roote watukku leta'u taumatan Feris wuṛṛu Refaim. Pamaṛṛete manga tatanaanna wakku su manga mahurangngi mangitou udde.”

¹⁶ Papapulunni Yusuf sinumimbakka, “Wageangngu panenteanna udde tawe mattiudda si yami, arawe walahannu Kanaan apan uatana'a su leta'a ratakke uatahuanna manga keretan pangalo wuassu atta'a – mawae i mangitou apan uatana'a su Bet-Sean wuṛṛu manga ampunga maranine, ara'e lai i mangitou apan uatana'a su Wawal᷊annu Yizreel.”

¹⁷ Ne i Yosua nabbisara su ṛuanganni Efraim wuṛṛu Manasye waṛṛata udde, “Atonna, i yamiu manambo atonna wuṛṛu matohassa, wuṛṛu su lal᷊anne walungannu sambageanganna lai leta'a.

¹⁸ Panganute leta'u panenteanna, ana waugu salaiwe leta'a udde ta'e mahurangnge, i yamiu wotongnge mamaṛṛe leta'a udde wuṛṛu manahuanna sarangkanambone. Wuṛṛu su ola'u manga taumatan Kanaan udde, i yamiu wotongnge mallimbuakka si mangitou, salaiwe i mangitou matohassa wuṛṛu uatahuanna manga kereta pangalo wuassu atta'a.”