YOSUA 16 - WUKE SUSI WATTI'U AL᷊AL᷊USASSA

Leta'a apan nita'e si Efraim wuṛṛu si Manasye samba'a Waṛṛata

¹ Manga akkitu passarannu leta'a apan nita'e su papapulunni Yusuf, manattakka wuassu Sal᷊ukku Yordan maranin Yerikho, samba'an ra'i wuassu manga al᷊imatan ua'e, su Yerikho maddatingngu wadda'u anne. Wuassu Yerikho, akkita udde suma'a watukku Betel su panenteanna.

² Wuassu Betel, akkita udde mattudda watukku Lus, sumabbi Atarot, eteudde tampa atatanaannu taumatan Arki.

³ Ana see akkita udde masal᷊a watukku waṛṛata su leta'u ṛuanganni Yaflet, maddatingngu Bet-Horon-Wunnene, masal᷊a watukku Gezer, ana see matta'alla su Tahal᷊oangnga Tangngane.

⁴ Eteudde leta'a nionggola su ṛuanganni Manasye wuṛṛu i Efraim, papapulunni Yusuf, apan maola'a leta'a pussa'a mangitou.

Ṛuanganni Efraim

⁵ Manansunna indi eteudde manga passarannu leta'a apan nionggola su manga amonanna su lal᷊ummu ṛuanganni Efraim. Su samba'an ra'i, akkitu passarannu leta'i mangitou manattakka wuassu Atarot-Adar maddatingngu Bet-Horon-Ul᷊une,

⁶ ana see masal᷊a watukku Tahal᷊oangnga Tangngane. Mikmetat addone su samba'an sawannakka. Su samba'an ra'i, akkitu passaranna udde mabbeṛṛo watukku Taanat-Silo, ana see sumabbi wuassu samba'an ra'i, mattudda watukku Yanoah.

⁷ Wua'isudde akkita udde sumossokka watukku Atarot wuṛṛu Naharat, ana see masal᷊a rumurukka Yerikho wuṛṛu masue su Sal᷊ukku Yordan.

⁸ Su samba'an waṛṛata, akkitu passaranni Efraim udde manattakka wuassu Tapuah maddatingngu ana'u Sal᷊ukku Kana, ana see masue su Tahal᷊oangnga Tangngane. Eteudde leta'a apan nionggola su manga amonanna wuassu ṛuanganni Efraim apan maola'a pussa'a mangitou,

⁹ nasutta manga pira soa maradio'a wuṛṛu ampunga apan addone su lal᷊ummu wageangngu leta'i Manasye.

¹⁰ Arawe ṛuanganni Efraim tawe nallimbuakka taumatan Kanaan wuassu wageangngu leta'u Gezer. Ana waugu udde na'oman sara orassa indi taumatan Kanaan ta'e uatana'a su Gezer suadio'a ringannu taumatan Efraim, arawe i mangitou niwata'a mammanara maola'a allangu taumatan Efraim.