YOSUA 13 - WUKE SUSI WATTI'U AL᷊AL᷊USASSA

Wageangu leta'a apan ṛinone ta'e aṛṛoanna

¹ Orassa indi i Yosua timmadete atonna. Mawu nabbisara si Yosua, “I'o timmadete, Yosua! Arawe ta'e manambo wageangngu leta'a apan ṛinone aṛṛoanna:

² ahewallu leta'u Filistin wuṛṛu Gesur,

³ wuṛṛu ahewallu leta'u Awi watukku timukka. (Wageanga wuassu Sal᷊ukku Sikhor su passarannu Mesir ma'oman sara passarannu Ekron su samba'an sawannakka, sarangkanambone udde nareengnga wageangngu leta'u walahannu Kanaan; wuṛṛu manga ratun Filistin uatana'a su Gaza, Asdod, Askelon, Gad wuṛṛu Ekron).

⁴ Wuṛṛu lai ta'e aṛṛoanna: ahewallu leta'u Kanaan wuṛṛu Meara (tatahuanannu walahannu Sidon), naddatingngu Afek su passarannu leta'u walahannu Amori;

⁵ manansunna leta'u walahannu Gebal, wuṛṛu ahewallu leta'u Libanon watukku ra'i, wuassu Baal-Gad su samba'an timukku Wowon Hermon, masal᷊a watukku lal᷊anna mattuddan Hamat.

⁶ Nasutta lai ahewallu leta'u taumatan Sidon, apan uatana'a su panenteanna su wallatu manga Wowon Libanon wuṛṛu Misrefot-Maim.” “Anambon manga walahanna udde sarun Ta'u limbuaṛṛanna, su tempo ṛuangannu Israel mamangalo si mangitou,” unnu Mawu lai si Yosua. “Leta'a udde ṛinone tahiannu su ṛuangannu Israel maola'a leta'a pussa'a mangitou, ere lai Ya'u buatte namarenta si'o.

⁷ Nariaddi, orassa indi tahiate leta'a udde su ṛuanganna sio su lal᷊ummu walahannu Israel, wuṛṛu sambageanganna wuassu ṛuanganni Manasye, tadea'u udde maola'a leta'a pussa'a mangitou.”

Patatahia leta'a su wageangngu ra'in Sal᷊ukku Yordan

⁸ Ṛuanganni Ruben wuṛṛu i Gad see sambageanganna wuassu ṛuanganni Manasye buatte nanengkama wageange leta'a wuassi Musa, allangu Mawu udde; eteudde leta'a su samba'a ra'in Sal᷊ukku Yordan.

⁹ Wageangngi mangitou nasutta Aroër (su winggin Wawal᷊annu Sal᷊ukku Arnon), wuṛṛu soa su pattangngannu wawal᷊anna udde. Wuṛṛu lai wageangngu leta'a wowone wuassu Medeba ma'oman sara Dibon

¹⁰ wuṛṛu na'oman sara watukku passarannu leta'u Amon, nasutta anambon soa apan dorone buatte niparentanni Sihon, ratun Amori, apan uatana'a su Hesybon.

¹¹ Wuṛṛu lai nasutta leta'u Gilead, leta'a maranin Gesur wuṛṛu Maakha, wuṛṛu ahewallu Wowon Hermon, wuṛṛu ahewallu leta'u Basan maddatingngu Salakha.

¹² Wageangngi mangitou lai nasutta leta'a paparentanni Ratu Og, taumatan Refaim apan panginsueanne naparenta su Asytarot wuṛṛu Edrei. I Musa buatte namaddo manga balahanna udde wuṛṛu nallimbuakka si mangitou niapassabangnga wuassu leta'i mangitou.

¹³ Arawe tumana'u Gesur wuṛṛu Maakha tawe nilimbuaṛṛannu taumatan Israel; i mangitou ta'e uatana'a su Israel.

¹⁴ Ṛuanganni Lewi tawe nanengkamma wageangnge leta'a wuassi Musa, ana waugu Mawu buatte nabbal᷊o si Musa manungku wageangngu ṛuanganni Lewi eteudde wuassu manga sasamba itattambunna su mezbah apan ionggola su Mawu Ruatan Israel.

Wageangngu leta'a wuatti Ruben

¹⁵ Sambageanganna wuassu leta'a apan pinadiandi Mawu su ṛuangannu Israel udde buatte nionggoli Musa su manga ṛuanganna su lal᷊ummu ṛuanganni Ruben, tadea'u maola'a leta'a pussa'a mangitou.

¹⁶ Leta'i mangitou udde nasutta Aroër (su winggin wawal᷊annu Sal᷊ukku Arnon) wuṛṛu soa su pattangngannu wawal᷊anna udde ma'oman sara watukku sendekku Medeba;

¹⁷ see lai Hesybon wuṛṛu anambon soa su sendekke udde, eteudde: Dibon, Bamot-Baal, Bet-Baal-Meon,

¹⁸ Yahas, Kedemot, Mefaat,

¹⁹ Kiryataim, Sibma, Zeret-Hasahar apan addone su wuiddu wawal᷊anna udde,

²⁰ Bet-Peor, manga sendekku Wowon Pisga, wuṛṛu Bet-Yesimot.

²¹ Manansunna nasutta lai anambon soa su leta'a sendekke udde, wuṛṛu anambon leta'a paparentanni Sihon, ratun balahannu Amori, apan paarorone uatana'a su Hesybon. I tou wuṛṛu manga tembonannu Midian, eteudde: i Ewi, i Rekem, i Zur, i Hur wuṛṛu i Reba, buatte niwaddon Musa. Anambon tembonanne udde buatte namarenta wanua udde wuassi Ratu Sihon.

²² Su wallatu manga taumata apan niapate balahannu Israel, niasombanganna lai i Bileam ana'i Beor, taṛṛa si'atta.

²³ Sal᷊ukku Yordan maola'a passaranna samba'an baṛṛata wuassu wageangngu ṛuanganni Ruben. Eteudde manga soa wuṛṛu manga ampunga apan nionggola su amonannu ṛuanganni Ruben maola'a leta'a pussa'a mangitou.

Wageangu leta'a apan nita'e su ṛuanganni Gad

²⁴ Samba'a wuassu leta'a apan pina'ire Mawu su ṛuangannu Israel udde buatte nionggoli musa su manga amonannu ṛuanganni Gad, apan maola'a pussa'a mangitou.

²⁵ Wageangi mangitou nasutta lai leta'u Yaezer wuṛṛu anambon soa su Gilead see samba'an wuassu wageangngu walahannu Amon na'oman sara araune su Aroër su samba'an da'in Raba;

²⁶ wageangngu leta'a wuassu Hesybon maddatingngu Ramat-Mizpa wuṛṛu Betonim, see wageangngu leta'a wuassu Mahanaim maddatingngu passarannu Lodebar, sarangkanambone udde nasutta lai leta'u ṛuanganni Gad.

²⁷ Su Wawal᷊annu Yordan, leta'u ṛuanganni Gad udde nasutta Bet-Haram, Bet-Nimra, Sukot, wuṛṛu Zafon, eteudde lamben leta'a paparentanni Ratu sihon su Hesybon. Passaranne samba'an baṛṛata wuassu ṛuanganni Gad, eteudde Sal᷊ukku Yordan ma'oman sara araune su Ranon Galilea samba'an sawannakka.

²⁸ Eteudde manga soa wuṛṛu ampungnga apan nionggola su manga ṛuanganna su lal᷊ummu ṛuanganni Gad apan maola'a leta'a pussa'a mangitou.

Leta'a su samba'an ra'in Sal᷊ukku Yordan apan nita'e ionggola su sambageangannu ṛuanganni Manasye

²⁹ Sambageanganna wuassu leta'a apan pina'ire Mawu su ṛuangannu Israel udde buatte nionggoli Musa lai su manga ṛuanganna, sambagenganna wuassu ṛuanganni Manasye apan maola'a pussa'a mangitou.

³⁰ Manga passarannu leta'i mangitou na'oman sara watukku Mahanaim, nasutta lai ahewallu leta'u Basan – eteudde ahewallu leta'a paparentanni Og, ratun Basan, wuṛṛu annumu pul᷊o manga ampungi Yair su Basan.

³¹ Wua'udde nasutta lai samba'a wuassu leta'u Gilead, see Asytarot wuṛṛu Edrei, darua inangngu soa wageangngu leta'a paparentanni Ratu Og su Basan. Ahewallu leta'a udde nionggola su sambageanganna wuassu ṛuanganna papapulunni Makhir, ana'i Manasye.

³² Etearoddi i Musa nattahia leta'a su samba'a ra'in Yerikho, su samba'an Sal᷊ukku Yordan, su tempo i tou uatana'a su leta'u Moab.

³³ Arawe ṛuanganni Lewi tawe naasomba leta'a saran kadio'a wuassi Musa. I Musa nabbisara si mangitou manungku tahia apan nionggola si mangitou eteudde wuassu manga sasamba apan nionggola su Mawu Ruatan Israel.