YOSUA 11 - WUKE SUSI WATTI'U AL᷊AL᷊USASSA

I Yosua namaddon Yabin wuṛṛu manga ringanne

¹ Su tempo i Ratu Yabin wuassu Hazor naaringikka ola'u auntungannu taumatan Israel sulal᷊ummu pangalo, i tou nandolokku taumata inai ringanni Ratu Yobab wuassu soa Madon, ringannu manga soa Simron wuṛṛu Akhsaf,

² su manga ratu apan uatana'a su panenteanna samba'an timukku Galilea, su wawal᷊annu panenteanna, wuṛṛu wageangngu leta'u apanne maranin Dor.

³ I tou lai nandolokku taumata inai ringannu taumatan Kanaan su samba'an baṛṛatta wuṛṛu samba'an da'in Yordan, ringannu taumatan Amori, Het, Feris, wuṛṛu taumatan Yebus su wageangngu panenteanna, see lai taumatan Hewi su wawal᷊annu Wowo Hermon su leta'u Mizpa.

⁴ Ne manga ratu udde nirumantate ringannu anambon tantaran mangitou apan tumaniten manambo naal᷊ihidda anne su sahatta. Awal᷊o wuṛṛu keretan pangalo mangitou lai manambo atonna.

⁵ Anambon manga ratu udde na'ammula wuṛṛu suadio'a nirumantta ana see natana'a maranin ana'u Sal᷊ukku Merom tadea'u inai mamangalo Israel.

⁶ Mawu nabbisara si Yosua, “Arie pa'ata'utti mangitou. Su allo ere indi lai tiṛṛabbi, i mangitou sarangkanambone buatte Ta'u nipate ana waugu Israel. Awal᷊on mangitou sarun Ta'u iapaallome, wuṛṛu manga keretan pangalo mangitou ṛinone soṛṛowanna.”

⁷ Ne i Yosua ringannu anambon tantarane namangalote seetta udde ringannu namaṛṛindu'a maranin ana'u Sal᷊ukku Merom.

⁸ Wuṛṛu Mawu napa'auntungngu ṛuangannu Israel wuassi mangitou. Taumatan Israel namangalo wuṛṛu nangenggenna si mangitou araune sara Misrefot-Maim wuṛṛu Sidon su samba'an sawannaka, wuṛṛu araune sara Wawal᷊annu Mizpa su samba'an ra'i. Pangalo udde sidutu maggewalla na'oman sara tawe saran sangkatou apan nallambe wuassu seenne-sarangkanambone nate.

⁹ I Yosua namangalo si mangitou uasul᷊ungngu parentan Mawu; i tou npaal᷊omen mangitou, wuṛṛu nanoṛṛobba manga keretan pangalo mangitou.

^10-11 Wua'udde i Yosua nebelengke, ana see nangaṛṛote Hazor apan su tempo udde atohasanne suwallatu anambon araratuanna isudde. Soa nisoṛṛobba, see ratu wuṛṛu anambon tumanangnge, nipate; tawe saran sangkatou apan niwala wiakka.

¹² Anambon manga soa udde niaṛṛon Yosua, manga ratune nisametta wuṛṛu nipate uasul᷊ungngu parentan Musa, allangngu Mawu udde.

¹³ Arawe manga soa apan niapararisikka su ombon manga wuiddu ninanggohamannu manga soa, tawe saran sambau apan nisoṛṛobbu taumatan Israel, tumba'u Hazor apan nisoṛṛobbi Yosua sassane.

¹⁴ Anambon tumana'u manga soa udde nipate; tawe saran sangkatou apan niwala wiakka. Arawe anambon manga saranapane apan maarega wuṛṛu winatangnga papadul᷊iananne nianun taumatan Israel maola'a pussa'a mangitou.

¹⁵ Sarangkanambone apan nirolokku Mawu si Musa, allang-Nge, buatte niwal᷊on Musa si Yosua, wuṛṛu niola'i Yosua; tawe saran sambau apan tawe niolangnge.

Wageangngu leta'a apan niaṛṛon Yosua

¹⁶ I Yosua nangaṛṛo ahewallu wanua udde – wageangngu panenteanna, wageangngu welen bowone, mawae ete su sawannaka ara'e lai su timukka; see lai ahewallu leta'u Gosyen wuṛṛu wageangngu wadda'a mamara su samba'an timukku Gosyen, see lai wawal᷊annu Yordan.

^17-18 Ahewallu leta'a udde manattakka wuassu Panenteannu Lol᷊okka su samba'an timukka maranin Edom, maddatingngu sawannaka araune sara Baal-Gad su wawal᷊annu Libanon samba'an timukku Wowon Hermon. Mal᷊annu atonna i Yosua uapapangalo manga ratu su wageangngu leta'a udde, arawe panginsueanne i tou nanametta wuṛṛu namate si mangitou sarangkanambone.

¹⁹ Wuassu anambon manga soa su ahewallu wageangngu leta'a udde, tawe saran sambau soa apan na'ola'a pa'aire paggahawe ringannu Israel, tumba'u Gibeon, soan balahannu Hewi. Anambon soa waine nawaddo sulal᷊ummu pangalo.

²⁰ Mawu napaattiku naungngi mangitou ana see sidutu mapapangalon taumatan Israel, tadea'u i mangitou insueanna, wuṛṛu pateanna abbi ringannu tawe ampunge ere buatte nirolokku Mawu si Musa.

²¹ Su tempo udde lai i Yosua inaite namate walahannu Enak, eteudde walahannu wawalla apan uatana'a su wageangngu panenteannu Hebron, Debir, Anab, wuṛṛu su ahewallu wageangngu panenteannu Yehuda wuṛṛu Israel. I mangitou sarangkanambone nipaten Yosua wuṛṛu manga soa mangitou lai niṛṛimunsa'a.

²² Tawe saran sangkatou wuassu walahannu Enak udde nallambe su wageangngu leta'u Israel, tumba'u su Gaza, Gat, wuṛṛu Asdod ta'e pia lambene.

²³ Ahewallu wanua udde niaṛṛon Yosua ere buatte nirolokku Mawu si Musa, ana see nionggola su walahannu Israel maola'a pussa'a mangitou. Wanua udde nitahia, wuṛṛu suapan ṛuanganna naasomba sambau wageangnge. Walahannu Israel nangillol᷊ote napapangalo wuṛṛu wanuane lai mal᷊anganna wuṛṛu su al᷊al᷊uassa.