YOSUA 10 - WUKE SUSI WATTI'U AL᷊AL᷊USASSA

Manga taumatan Amori niapawaddo

¹ I Adoni-Zedek, ratun Yerusalem, naaringikka manungku i Yosua buatte nangaṛṛo wuṛṛu naṛṛimunsa'a soan Ai, ana see namate ratune ere lai buatte niola'i tou su Yerikho wuṛṛu ratune. I tou naaringikka lai manungku taumatan Gibeon buatte na'ola'a pa'airen pagahahawe ringannu taumatan Israel wuṛṛu natana'a su pattangnganni mangitou.

² Tumana'u Yerusalem mangke matta'utta, ana waugu Gibeon udde soa wahewalla; ahewalle uasul᷊ungngu manga soa apan pia ratune, ewe'e lai maggewal᷊anna wuassu Ai. Manga taumatane lai uddewe atumannaṛṛanne apan masingkatta mapapangalo.

³ Ana waugu udde i Adoni-Zedek nandolokku taumata ringanni Ratu Hoham su Hebron, i Ratu Piream su Yarmut, i Ratu Yafia su Lakhis, wuṛṛu i Ratu Debir su Eglon, ringannu uaapiddu tanata indi,

⁴ “Wette pallal᷊ima si ya'u mamangalo Gibeon, ana waugu manga taumatane buatte na'ola'a pa'aire pagahahawe ringanni Yosua wuṛṛu taumatan Israel.”

⁵ Ne siri lima ratun Amori udde, eteudde ratun Yerusalem, Hebron, Yarmut, Lakhis wuṛṛu Eglon na'ammula, ana see ringannu anambon tantaran mangitou, i mangitou inaite namangalo Gibeon.

⁶ Manga taumatan Gibeon nandohon watti'a indi si Yosua su paddasananna su Gilgal, “Arie pabbala'a yami sassane, Tuangnga! Paal᷊ihakke rumanta massumbala si yami, ana waugu anambon tantara wuassu ratun Amori su wageangngu panenteanna naammule mando'appa si yami!”

⁷ Ana see i Yosua wuṛṛu anambon tantarane, nasutta manga tantarane apan apianne, inaite watukku Gilgal mapapangalo.

⁸ Mawu nabbisara si Yosua, “Arie pa'ata'utti mangitou. Auntunganna buatte Ta'u nionggola si'o, ana waugu tawe sangkatou wuassi mangitou maaro'appa si'o.”

⁹ Saṛṛabbi tu'udda i Yosua wuṛṛu tantarane u'amatta wuassu Gilgal watukku Gibeon, ana see namangalote taumatan Amori ringanu namaṛṛindu'a.

¹⁰ Mawu na'ola'a manga taumatan Amori nassasal᷊iongkakka napawe naasilo tantaran Israel. Manambo taumatan Amori nipate su Gibeon, wuṛṛu iapa ta'e wiakka nienggenanna sussosokka su isendakku wowone su Bet-Horon naddatingnu araune sara Azeka wuṛṛu Makeda su samba'an timukka.

¹¹ Su tempo manga taumatan Amori tantal᷊anna sussossokka su sendakku wowone udde ana waugu tul᷊angngu watanganne wuassu tantaran Israel, Mawu nanossoku uranna eisse apan wahahewalla wuassu langitta si mangitou su al᷊o'engngu lal᷊anna naddatingngu Azeka. Ingana'a nate naemaannu uranna eisse udde mannamboanna wuassu nipaten taumatan Israel.

¹² Su allo udde napawe Mawu nangonggulu auntunganna su taumatan Israel su saruannu taumatan Amori, i Yosua nabbisara Mawu. Wuṛṛu su saruannu taumatan Israel, i Yosua nabbisara, “Ei matannallo! Patta'ale su Gibeon. Wuṛṛu i'o wul᷊anna! Ariete pangingkatta wuassu Wawal᷊annu Ayalon.”

¹³ Ne matannallo natta'ala wuṛṛu wul᷊anna tawe nangingkata na'oman sara taumatan Israel buatte namaddon manga seenne. Arariadianna udde niwoṛṛetta sulal᷊ummu Wuken Yasar. Allo massallo tuuda matannallo natta'ala su pattangngannu langitta, wuṛṛu mal᷊annu atonna nattuppa.

¹⁴ Tawe saran paassa nariaddi wuṛṛu tate lai mariaddi sambau allo ere allo udde, manungku Mawu naddaringikka apulun taumata. Mawu napapangalo uasamba'a Israel!

¹⁵ Napawe buatte napapangalo, i Yosua suadio'a ringannu tantarane nabelengnga apia watukku paddasananna su Gilgal.

I Yosua nanametta siri lima ratun Amori

¹⁶ Arawe siri lima ratun Amori udde naatal᷊angnga wuṛṛu na'imbuni sulal᷊ummu loṛṛanga su Makeda.

¹⁷ Taumata naasilo si mangitou, wuṛṛu namasingkatta si Yosua tampa pa'imbunianni mangitou.

¹⁸ “Tal᷊inggia'a manga watu wahewalla su mamoṛṛongannu loṛṛanga udde, wuṛṛu addoa'e mandariaga isudde, ” unni Yosua,

¹⁹ “arawe i yamiu arie pattaala isudde. Enggenete, wuṛṛu pangaloite i mangitou wuassu liudde; arie pabbala'a i mangitou sumutta su manga soa mangitou! Mawu Ruatanu buatte nangonggolu auntunganna si yamiu.”

²⁰ I Yosua wuṛṛu taumatan Israel namate manga taumatan Amori udde, arawe piaddu lai suwallati mangitou tinumal᷊angnga su soa mangitou naddea'a pa'imbunianna, na'oman sara tawe niapate.

²¹ Wua'udde anambon tantaran Yosua nebelengke ringannu sal᷊amatta ringanni Yosua su paddasannannu Makeda. Tawe saran sangkatou su wanua udde waṛṛani mabbisara manal᷊are taumatan Israel.

²² Wua'udde i Yosua nabbisara, “Orassa indi wu'ate mamoṛṛongannu loṛṛanga udde wuṛṛu apira'e inawarendi siri lima ratu udde.”

²³ Ne loṛṛanga udde niwu'ate, ana see manga ratun Yerusalem, Hebron, Yarmut, Lakhis wuṛṛu Eglon niapidda watukku liudde,

²⁴ wuṛṛu niapidda ringanni i Yosua. Ana see Yosua nangammulu taumatan Israel, wua'udde namarenta tadea'u manga tembonannu tantara apan tinumantalonga napapangalo ringanni tou iaparanta makkinda ullekka manga ratu udde. Ne manga tembonannu tantara udde nirumantate wuṛṛu nakkinda ullekka manga ratu udde.

²⁵ Wua'udde i Yosua nabbisara su manga tembonannu tantarane, “Arie passinggawanga wuṛṛu arie pa'ata'utta. Ṛinone i yamiu mangimanna wuṛṛu waṛṛani, ana waugu ete arendi olangnge Mawu sarun ma'ola'a manga seennu.”

²⁶ Ana see i Yosua namate manga ratu udde wuṛṛu nangele mangitou su lima pati'anna. Winal᷊unanni mangitou niwala isudde naddatingngu wawallo.

²⁷ Su tempo matannallo mattupe, wuassu parentan Yosua, manga winal᷊unanna udde sinossokka ana see niwareta sulal᷊ummu loṛṛanga apan tanginna nipaattu manga ratu udde naola'a tampa pa'imbunianna. Wua'udde manga watu wahewalla niaddo su mamoṛṛongannu loṛṛanga udde. Naddatingngu orassa indi manga watu udde ta'e isudde.

I Yosua nangaṛṛo mannamboanna lai wageangngu leta'u Amori

²⁸ Allo udde Yosua namangalo Makeda, wuṛṛu namaddon soa udde ringannu ratune. Anambon tumana'u soa udde nipatene; tawe saran sangkatou niwala wiakka. I Yosua namarikka ratun Makeda ere lai tou namarikka ratun Yerikho.

²⁹ Wua'udde, i Yosua ringannu tantarane nadalate niumamatta wuassu Makeda watukku Libna.

³⁰ Mawu nangonggolo lai auntunganna su taumatan Israel su soa indi ringannu ratune. Tawe saran sangkatou apan niwala wiakka; anambon taumata sulal᷊ummu soa udde nipate. I Yosua namarikka ratun soa udde ere lai tou namarikka ratun Yerikho.

³¹ Wua'udde i Yosua wuṛṛu tantarane inaite wuassu Libna watukku Lakhis. I mangitou namal᷊iwutta soa udde ana see namangalo.

³² Mawu nangonggolla su taumatan Israel auntunganna su Lakhis sulal᷊ummu pangalo allo aruane. Sarangkanambone apan niola'i mangitou su Libna, niola'i mangitou lai su Lakhis; tawe saran sangkatou apan niwala wiakka, sarangkanambone nipate.

³³ I Horam, ratun Gezer nirumanta massumbala Lakhis, arawe i Yosua namaddon tou wuṛṛu tantarane; tawe saran sangkatou nallambe, sarangkanambone nate.

³⁴ Manansunna, i Yosua ringannu tantarane, inaite wuassu Lakhis watukku Eglon ana see namal᷊iwutta wuṛṛu namangalo soa udde.

³⁵ Su allo udde lai i mangitou naapangaṛṛo Eglon, wuṛṛu namate anambon taumata isudde ere lai niola'i mangitou su Lakhis.

³⁶ Wuassu Eglon, i Yosua wuṛṛu tantarane sinuma'a paneneteanna wuṛṛu inaite watukku soan i Hebron, ana see namangalo

³⁷ wuṛṛu nangaṛṛo soa udde. Ratune wuṛṛu suapan taumata sulal᷊ummu soa udde wuṛṛu su manga soa waine maranine isudde, sarangkanambone nipate. I Yosua nakkimunsa'a soa udde ere lai niola'i tou su soa Eglon. Tawe saran sangkatou apan niwala wiakka isudde.

³⁸ Wua'udde, i Yosua wuṛṛu tantarane nabelengke wuṛṛu namangalo Debir.

³⁹ Soa udde wuṛṛu ratune see lai anambon soa waine maranine isudde niaṛṛon Yosua. Anambon taumata isudde nipate. Yosua namarikka Debir wuṛṛu ratune ere lai i tou namarikka Hebron wuṛṛu Libna wuṛṛu ratune.

⁴⁰ Ahewallu wanua udde niaṛṛon Yosua. I tou namaddon manga ratu su wageangngu panenteanna, manga welem buidda samba'an ra'i, su manga wawal᷊annu wowone samba'an baṛṛatta, wuṛṛu su manga wadda'a samba'an timukka. Tawe saran sangkatou apan niwalane wiakka; sarangkanambone nipate. Udde wuassu parenta Mawu, Ruatan Israel.

⁴¹ I Yosua namaddon manga wageangngu leta'a wuassu Kades-Barnea su samba'an timukka maddatingngu Gaza maranin apanne, nasutta lai ahewallu leta'u Gosyen, masal᷊a watukku Gibeon su sawannaka.

⁴² Tumba'u paassa napapangalo, i Yosua namaddon anambon datu udde wuṛṛu nangaṛṛo manga wageangngu leta'a apan paparentanni mangitou, ana waugu Mawu, Ruatan Israel, napapangalo suadio'a ringannu Israel.

⁴³ Wua'udde, i Yosua nebelengke suadio'a ringannu tantarane watukku paddasananna su Gilgal.