YOHANES 21 - WUKE SUSI WATTI'U AL᷊AL᷊USASSA

Mawu Yesus naipasilon batangan-Ne su sire pitu mallal᷊aṛṛenggen-Ne

¹ Wua'udde Mawu Yesus namasilon batangan-Ne paassa lai su Ranon Tiberias su manga mallal᷊aṛṛenggen-Ne. Arendi wattinge:

² Su sambau allo i Simon Petrus, i Tomas apan isassago lai i Ṛindua, i Natanael wuassu Kana su Galilea, al᷊aṛṛana'i Zebedeus, wuṛṛu ruang katou mallal᷊aṛṛenggennu Mawu Yesus apan waine tantal᷊anna uaammulla.

³ Wisaran i Simon Petrus singana'a waine, “I ya'u ma'apulu inai tumondo.” “I yami tumantalongnga”, unni mangitou si Petrus. Ne inaite i mangitou sinuma'e saalanna. Arawe saṛṛabbi tuudda udde i mangitou tawe naahau saran sambua.

⁴ Napawe matannallo sussabangke, Mawu Yesus uarisikka su apanne, arawe i mangitou wagga manungku udde Mawu Yesus.

⁵ Mawu Yesus nabbisara si mangitou, “Al᷊aṛṛana'u, i yamiu naahaute inassa?” “Tawe” sasimbakki mangitou.

⁶ Mawu Yesus nabbisara si mangitou, “Lomboa'a somanu su aikkatannu saalanna, i yamiu sarun maahau inassa.” See soma udde nilombate mangitou, arawe i mangitou tate maawol᷊engnga apia ana waugu aroddi anambone inassa sulal᷊ummu soma.

⁷ Mallal᷊aṛṛenggenna apan arangnguannu Mawu Yesus, nabbisara si Petrus, “Udde Mawu!” Napawe i Simon Petrus naaringikka manungku udde Mawu, i tou nalluṛṛen laubba (ana waugu i tou uatantol᷊e) see inumurumma sulal᷊ummu ua'e.

⁸ Manga mallal᷊aṛṛenggenna waine nanantuṛṛutta watukku ammaranne ringannu saalanna, lapiddu namol᷊engnga soma apan napeneng kinassa. I mangitou tawe marau wuassu ammaranne, iraṛṛangngo tumba'u maṛṛasutta su meteṛṛene.

⁹ Napawe i mangitou sinumossokke wuassu saalanna, i mangitou naasilo pia waṛṛam putungnga isudde ringannu inassa uatambunna wuṛṛu roti.

¹⁰ Mawu Yesus nabbisara si mangitou, “Apira'a inawarendi manga piram bua inassa apan bakku niasametti yamiu.”

¹¹ I Simon Petrus sinuma'e su saalanna, see namol᷊engnga somane watukku ammaranne. Soma udde napeneng kinassa apan mangkasallaka; sarangkanambone maṛṛasutta limam pul᷊o tallu su wuane. Wuṛṛu salaiwe anambone aroddi, somane tawe nahesa'a.

¹² Mawu Yesus nabbisara si mangitou, “Wette umanna.” Tawe saran sangkatou wuassu mallal᷊aṛṛenggen-Ne waṛṛani maiwal᷊o, “Iamangnga isai?” Ana waugu i mangitou masingkatta manungku i Tou Mawu.

¹³ Wua'udde Mawu Yesus nangundani mangitou, nanganu roti udde, wuṛṛu nitahia si mangitou. Inassa udde lai nitahian Tou ere udde.

¹⁴ Indi atallune Mawu Yesus maipasilon batangan-Ne su manga mallal᷊aṛṛenggen-Ne napawe i Tou niwangunna wuassu papate.

Mawu Yesus wuṛṛu i Petrus

¹⁵ Napawe i mangitou suete niumanna, Mawu Yesus nabbisara si Simon Petrus, “Simon ana'i Yona, apa i'o lembo marangngu si Ya'u wuassi mangitou indi mandangngu si Ya'u?” “Atonna, Mawu,” sasimbakki Petrus, “Mawu masingkatta i ya'u marangngu Mawu.” Mawu Yesus nabbisara si tou, “Padul᷊ianete al᷊aṛṛana'u domba-U.”

¹⁶ Su aruane Mawu Yesus naiwal᷊o si tou, “Simon ana'i Yona, atonna i'o marangngu si Ya'u?” “Atonna, Mawu,” sasimbakki Petrus, “Mawu masingkatta manungku i ya'u marangngu Mawu.” Mawu Yesus nabbisara si tou, “Padul᷊ianete manga domba-U.”

¹⁷ Su atallune Mawu Yesus naiwal᷊o si tou, “Simon ana'i Yona, atonna i'o marangngu si Ya'u?” I Petrus nasusa naungnge ana waugu Mawu Yesus naiwal᷊o si tou na'oman sara atallune. Ne i Petrus sinumimbakka apia, “Mawu, Mawu masingkattu sarangkanambone. Mawu masingkatta manungku i ya'u marangngu Mawu!” See Mawu Yesus nabbisara si tou, “Padul᷊ianete manga domba-U.

¹⁸ Mangke atonna wisara-U indi: Su tempo i'o ta'e dario'a, i'o sassane mamma'issa lawannu, wuṛṛu u'amatta su al᷊awo'u tampa ipaapulunu. Arawe amungkangngu i'o timmaddete, i'o mangngul᷊ukku limanu, wuṛṛu taumata waine mamma'issa si'o wuṛṛu mangapidda su tampa apan ipaadirinu.”

¹⁹ (Ringannu manga wisara udde Mawu Yesus mapaal᷊iatta'u ereapa i Petrus sarun mate ipamantuga Ruata.) Wua'udde Mawu Yesus nabbisara si Petrus, “Tantalongke si Ya'u!”

Mawu Yesus wuṛṛu mallal᷊aṛṛenggen-Ne apan baine

²⁰ Su tempo i Petrus nanaile, i tou naasilo su liudde mallal᷊aṛṛenggenna apan arangnguannu Mawu Yesus. (Ete i tou ua'ianna marani Mawu Yesus su tempo u'anna wuṛṛu naiwal᷊o si Tou, “Mawu, isai apan sarun mamate Mawu?”)

²¹ Naasilo si tou, i Petrus naiwal᷊o Mawu Yesus, “Mawu, ereapa su ola'i tou indi?”

²² Mawu Yesus sinumimbakka, “Unnu wisara i Ya'u maapulu i tou matatana'a wiakka ma'oman sara i Ya'u rumanta apia, udde wal᷊ine manaranu. Arawe i'o tantalongke si Ya'u!”

²³ Ne tinumelengke watti'a su mallal᷊aṛṛenggennu Mawu Yesus manungku mallal᷊aṛṛenggenna udde tawe mate. Sumbal᷊i Mawu Yesus tawe nabbisara manungku mallal᷊aṛṛenggenna udde tawe mate, ewe'e: “Unnu wisara i Ya'u maapulu i tou matatana'a wiakka ma'oman sara i Ya'u rumanta apia, udde wal᷊ine manaranu.”

²⁴ I Yohanes apan nangonggolu tatiala su ola'u manga riadianna indi. Ete i tou lai suete namoṛṛeta. Wuṛṛu i ite masingkatta manungku apa apan niapaasingkatti tou udde atonna.

Wisara Panginsueanne

²⁵ Ta'e manambo lai hatto waine apan niola'u Mawu Yesus. Unnu wisara sarangkanambone udde iwoṛṛetta passam bau, i ya'u mammendamma tawe a'ionanne ahewallu runia indi pangadoannu anambon wuke apan sarun iwoṛṛeta udde.