YOHANES 2 - WUKE SUSI WATTI'U AL᷊AL᷊USASSA

Andeangngu awingnga su Kana

¹ Rua allo wua'udde pia andeangngu awingnga su soan Kana su Galilea, wuṛṛu inangngu Mawu Yesus isudde lai.

² Mawu Yesus wuṛṛu mallal᷊aṛṛenggen-Ne niwal᷊oanna lai su andeangnga udde.

³ Napawe anggore nasuete, inangngu Mawu Yesus nabbisara si Tou, “I mangitou niasueannu anggore.”

⁴ Mawu Yesus sinumimbakka, “Inangnga, arie mandolo-U. Taambe tempone i Ya'u mapaal᷊iatta'u riri-U.”

⁵ Arawe inangngu Mawu Yesus nabbisara su mangangimbe, “Tuṛṛutte apa apan irolokki Tou si yamiu.”

⁶ Isudde pia annumma wensada apan nissaddia pangangukkasanna tumuṛṛuttu inanaramannu Yahudi. Wensada udde sambau-sambau iraṛṛangngo loṛṛone maṛṛasutta su liteṛṛene.

⁷ Mawu Yesus nabbisara su mangangimbe udde, “Loṛṛoiteng kua'e manga wensada udde.” I mangitou nalloṛṛote na'oman sara napene-pene.

⁸ See Mawu Yesus nabbisara si mangitou, “Orassa indi pangabbate ua'e adio'a wuṛṛu apira'e su piaṛṛa'u andeangnga.” I mangitou nangapiddu ua'e udde su piaṛṛa'u andeangnga,

⁹ wuṛṛu i tou naattemma ua'e apan nawal᷊ute anggore udde. (I tou wagga wuassuapa anggore udde, tumba'u manga mangangimbe apan nallal᷊innu anggore udde masingkatta.) Ne, piaṛṛa'u andeangnga udde nangundani ma'a'awingnga esakka,

¹⁰ see nabbisara si tou, “Wiasane taumata mannarun anggore apianne paarorone wuṛṛu napawe manga raho nawusate ma'inumma, wakkute udde anggore wiasa isaru. Arawe tuṛṛangnga nanahipunna anggore apan apianne saran orassa indi!”

¹¹ Eteudde al᷊aṛṛindu'a paarorone apan niola'u Mawu Yesus. I Tou na'ola'a udde su wanua Kana su Galilea. Ringannu tanda udde i Tou mapaal᷊iatta'u awawantu-Ge. Ne mallal᷊aṛṛenggen-Ne nangimante si Tou.

¹² Wua'udde Mawu Yesus inaite watukku Kapernaum su sampunna ringannu inang-Nge, manga tuṛṛang-Nge see manga mallal᷊aṛṛenggen-Ne. I mangitou natana'a poiaroddi manga pira allo al᷊annune.

Mawu Yesus sinumutta su Wal᷊e Mawu

¹³ Napawe Allo Wahewam Paskah Yahudi maranite, Mawu Yesus inaite watukku Yerusalem.

¹⁴ Su Wal᷊e Mawu su Yerusalem i Tou naaratingnga mabawal᷊u'u sapi, domba, wuṛṛu manga manu'a merpati; wuṛṛu lai manga mananu'addu roitta ua'ianna isudde.

¹⁵ Mawu Yesus na'ola'a sambokka wuassu tal᷊i wua'udde nallimbuakka anambon winatangnga udde, mawae domba ara'e sapi, wuassu lal᷊ummu Wal᷊e Mawu. Manga medda mananu'addu roitta niwal᷊insuang-Nge na'oman sara roitti mangitou nassal᷊iawukka.

¹⁶ See i Tou nabbisara su mabawal᷊u'u manu'a merpati, “Pangingkatta wua isindi. Arie Wal᷊en Iamang-Ku maola'a tampam pabawal᷊u'anna!”

¹⁷ Ne manga mallal᷊aṛṛenggen-Ne naanaungnga wageangngu Wuke Susi ereindi, “Naung-Ku su Wal᷊e-Nu, o Ruata, ma'atutungnga naung-Ku.”

¹⁸ Manga tembonannu Yahudi sussimbakka Mawu Yesus, unni mangitou, “Annama'a pa'ola'a al᷊aṛṛindu'a maola'a sambau tatiala si yami manungku I'o pia taṛṛino ma'ola'a ereindi.”

¹⁹ Mawu Yesus sinumimbakka, “Hohaṛṛa'a Wal᷊e indi, wuṛṛu sulal᷊ummu tallu allo i Ya'u sarun mapararisikka apia.”

²⁰ See i mangitou nabbisara, “Appattu pul᷊o annumma su tonnane nipaatta mapararisikku Wal᷊e Mawu indi. Wuṛṛu I'o sarun mapararisikka apia sulal᷊ummu tallu allo?”

²¹ Arawe Wal᷊e Mawu apan su pandummu Mawu Yesus eteudde wadang-Nge sassane.

²² Wua'udde, napawe Mawu Yesus niapawangunna wuassu papate, naanaungke manga mallal᷊aṛṛenggen-Ne manungku hatto udde suete niapasingkatti Tou. Ne i mangitou nangimante apa apan uawoṛṛetta sulal᷊ummu Wuke Susi wuṛṛu apa apan niapaasingkattu Mawu Yesus.

Mawu Yesus masingkattu anambon taumata

²³ Tantal᷊anna Mawu Yesus ta'e su Yerusalem, su tempon Rameam Paskah, manambo taumata mangngimanna si Tou ana waugu manga al᷊aṛṛindu'a apan suete niolang-Nge.

²⁴ Arawe Mawu Yesus tawe mangngimanna si mangitou, ana waugu i Tou masingkattu anambon taumata.

²⁵ Taumata salaiwe tate manal᷊a'a si Tou su ola'u isai-sai, ana waugu i Tou sassane masingkatta apa apan uataṛṛo su naungngu taumata.