YOHANES 17 - WUKE SUSI WATTI'U AL᷊AL᷊USASSA

Mawu Yesus inumal᷊iomannu manga mallal᷊aṛṛenggen-Ne

¹ Wua nabbisara aroddi, Mawu Yesus naningngara langitta wuṛṛu nabbisara, “Iamangnga, orassa indi nia'omante tempone. Wantuhete Anangngu, tadea'u Anangngu lai mamantuga Iamangnga.

² Iamangnga suete nangonggolu taṛṛino su Ana'a ipamarenta anambon taumata, tadea'u i Tou mangonggolu wiakka tutune wuṛṛu saran mal᷊annu-l᷊annu su anambon taumata apan nionggolu Iamangnga si Tou.

³ Ete indi wiakka tutune wuṛṛu mal᷊annu-l᷊annu; tadea'u taumata maaillal᷊a Iamangnga, eteudde Ruata tinggassa apan atonna, wuṛṛu maaillal᷊a si Yesus Kristus apan nirolokku Iamangnga.

⁴ I Ya'u suete namantuga Iamangnga su wowon dunia indi ringannu nanginsue manara apan nirolokku Iamangnga si Ya'u.

⁵ Iamangnga! Wantuhete i Ya'u orassa indi ringannu Iamangnga, ringannu awawantuga apan tatahuanang-Ku suadio'a ringannu Iamangnga ro'en runia indi taambe nariaddi.

⁶ I Ya'u suete namasingkattu Iamangnga su manga taumata su runia indi apan suete nionggolu Iamangnga si Ya'u. I mangitou udde pussa'an Iamangnga, wuṛṛu Iamangnga suete nangonggolli mangitou si Ya'u. I mangitou suete tinumuṛṛutta wisaran Iamangnga.

⁷ Orassa indi i mangitou masingkatte manungku sarangkanambone apan nionggolu Iamangnga si Ya'u darantane wuassu Iamangnga.

⁸ Suete Ta'u niapaasingkatta si mangitou wisaran Iamangnga apan nionggolu Iamangnga si Ya'u; wuṛṛu suete nisengkammi mangitou. I mangitou masingkatta manungku i Ya'u atonna-tonna nirumanta wuassu Iamangnga wuṛṛu i mangitou lai mangngimanna manungku ete Iamangnga apan nandolo-U.

⁹ I Ya'u inumal᷊iomanni mangitou. I Ya'u tawe inumal᷊iomannu runia ewe'e inumal᷊iomannu manga taumata apan suete nionggolu Iamangnga si Ya'u, ana waugu i mangitou pussa'an Iamangnga.

¹⁰ Anambon pussaa-U lai pussa'an Iamangnga; wuṛṛu anambon pussa'an Iamangnga udde lai pussa'a-U. I Ya'u niwantuhanna su wallatti mangitou.

¹¹ Orassa indi i Ya'u nirumanta ringannu Iamangnga. I Ya'u tate lai matana'a su runia; arawe i mangitou su runia. Iamangnga apan naukkassa! Lu'arete i mangitou ringannu taṛṛinon arannu Iamangnga, eteudde aranna apan suete nionggolu Iamangnga si Ya'u – tadea'u i mangitou maola'a sambau, ere Iamangnga wuṛṛu i Ya'u sambau.

¹² Su tempo i Ya'u ta'e su sambau ringanni mangitou, i Ya'u suete nallu'adda si mangitou ringannu taṛṛinon arannu Iamangnga – aranna apan suete nionggolu Iamangnga si Ya'u. I Ya'u suete nallu'adda si mangitou, wuṛṛu tawe saran sangkatou wuassi mangitou nawul᷊i; tumba'u i tou apan ṛinone sarun mawul᷊i; tadea'u ringannu aroddi matipusse apa apan uawoṛṛetta sulal᷊ummu Wuke Susi.

¹³ Orassa indi i Ya'u rumanta ringannu Iamangnga. Sarangkanambone indi iwal᷊o'u tantal᷊anna i Ya'u ta'e su runia; tadea'u i mangitou ringannu nasuungnga mamendamma al᷊al᷊uassa wuassia-U.

¹⁴ I Ya'u suete namasingkattu wisaran Iamangnga si mangitou, wuṛṛu runia maddantinni mangitou, ana waugu i mangitou wal᷊ine pussa'an dunia, ere i Ya'u lai wal᷊ine tatahuanannu runia.

¹⁵ I Ya'u tawe madorongnga tadea'u Iamangnga mangal᷊appa si mangitou wuassu runia indi, arawe i Ya'u madorongnga tadea'u iamangnga mallu'adda si mangitou wuassi Ral᷊eo.

¹⁶ Ere lai Ya'u wal᷊ine pussa'an runia, i mangitou lai wal᷊ine pussa'an runia.

¹⁷ Olaawe i mangitou pussa'an Iamangnga sassane sulal᷊ummu atatul᷊idda; wisaran Iamangnga eteudde atatul᷊idda.

¹⁸ Ere lai Iamangnga suete nandolo-U su runia, aroddi lai Ya'u mandolokki mangitou watukku runia.

¹⁹ Su hausanni mangitou, i Ya'u nanantillu riri-U maola'a pussa'an Iamangnga sassane, tadea'u i mangitou lai maola'a pussa'an Iamangnga sassane sulal᷊ummu atatul᷊idda.

²⁰ Wal᷊ine tumba'u i mangitou sassane I Ya'u u'al᷊iomanna. I Ya'u lai u'al᷊iomannu manga taumata apan mangngimanna si Ya'u sulal᷊ummu tatialan mangitou indi.

²¹ I Ya'u sumal᷊ande, Iamangnga, tadea'u i mangitou sarangkanambone maola'a sambau, ere lai Iamangnga sambau ringang-Ku, wuṛṛu i Ya'u ringannu Iamangnga. Sal᷊andeanna i mangitou maola'a sambau ringanni Ite, tadea'u runia mangngimanna manungku ete Iamangnga apan nandolo-U.

²² I Ya'u suete nangonggolu awawantuga si mangitou apan nionggolu Iamangnga si Ya'u, tadea'u i mangitou maola'a sambau ere i Ite lai sambau;

²³ I Ya'u ringanni mangitou, wuṛṛu Iamangnga ringang-Ku; tadea'u i mangitou atonna-tonna sambau. Ne runia indi sarun maasingkatta manungku ete Iamangnga apan nandolo-U, wuṛṛu manungku Iamangnga mandangngu si mangitou ere lai Iamangnga mandangngu si Ya'u.

²⁴ Iamangnga, i Ya'u maapulu tadea'u i mangitou, apan nionggolu Iamangnga si Ya'u, mangke su sambau su tampa atatanaa'ang-Ku, tadea'u i mangitou maasilo awawantu-U; eteudde awawantuga apan nionggolu Iamangnga si Ya'u, ana waugu Iamangnga marangngu si Ya'u ro'en runia taambe niriaddi.

²⁵ Iamangnga apan matul᷊idda! Runia tawe maaillal᷊a Iamangnga, arawe i Ya'u maaillal᷊a Iamangnga; wuṛṛu manga taumata indi masingkatta manungku ete Iamangnga, apan nandolo-U.

²⁶ I Ya'u suete napaal᷊iatta'u arannu Iamangnga si mangitou; wuṛṛu i Ya'u sidutu sarun ma'ola'a aroddi, tadea'u darangngun Iamangnga si Ya'u sidutu sulal᷊ummu naungngi mangitou, wuṛṛu i Ya'u mangke sambau ringanni mangitou.”