YOEL 3 - WUKE SUSI WATTI'U AL᷊AL᷊USASSA

Ruata sarun makkuungngu manga walahanna

¹ Mawu nabbisara, “Sutempo udde Yerusalem wuṛṛu Yehuda sarun Ta'u iapawelengnga apia lal᷊umanangnge.

² Anambon walahanna sarun Ta'u iammulla wuṛṛu Ta'u iapidda watukku Wawal᷊annu Pakkuunganna. Ana see i mangitou Ta'u parikisana isudde wuassu al᷊al᷊eone su saruannu uma-U ana waugu i mangitou buatte nattahia leta'u Israel wuṛṛu uma-U niwuangngi mangitou watukku al᷊awo'u wanua.

³ I mangitou mangngundi tadea'u manantunna isai apan maasomba manga taumata nitawanna. I mangitou mabbal᷊u'u maṛṛuala wuṛṛu umbasanna tadea'u olaanna allangnga. Wuṛṛu roinne ipaatti mangitou ionggolla su wawine masandaga wuṛṛu ipa'inumma anggore.

⁴ Uranni yamiu i Ya'u indi, ei Tirus, Sidon wuṛṛu al᷊awo'u wageangngu leta'u Filistin? Mappuluwe i'o mabbal᷊issa naungngu lal᷊eo si Ya'u? Ne, panengkampe wawal᷊i-U apan rumanta ringannu mal᷊ihakka.

⁵ Wul᷊awanna wuṛṛu sal᷊a'a-U buatte niaṛṛon kamiu, wuṛṛu darotong-Ku apan maarega buatte niṛṛuwon kamiu watukku kuilli yamiu.

⁶ Tumana'u Yehuda wuṛṛu Yerusalem niapiddi yamiu marau wuassu wanuane; wua'udde niwal᷊u'i yamiu su walahannu Yunani.

⁷ Orassa indi i Ya'u mangapiddi mangitou sumabbangnga wuassu manga tampa i yamiu nabbal᷊ungnge, wuṛṛu i Ya'u sarun mabbal᷊issa al᷊al᷊eonusimangitou.

⁸ Manga umbasanna maṛṛualanu sarun Ta'u iwal᷊u'a su tumana'u Yehuda, apan sarun mabbal᷊ungnge apia su Syeba, wanua apan marau. I Ya'u Mawu, buatte nabbisara.

⁹ Al᷊iata'e parenta indi su manga walahanna: Pandiahite inai mapangalo wuṛṛu maannammu atatohassa! Pasabbanga'e manga taumata waṛṛani wuṛṛu atumannaṛṛanne, ammul᷊a'e anambon tantara, wuṛṛu inaite!

¹⁰ Sassalle matan pajekonu maola'a hal᷊ele, wuṛṛu lari'a bawabbassa sambeangnga. Wuṛṛu lai taumata lome ṛinone mabbisara, ‘I ya'u lai wotongnge mapapangalo ere tantara!’

¹¹ Wette, rantate paasaṛṛawutta, ei manga walahanna wuassu al᷊awo'u pappi'uanne! Paammulle su wawal᷊anne poi.” Oh, Mawu, doloṛṛa'e tantara-Nu mamangalo si mangitou!

¹² Mawu nabbisara, “Manga walahanna ṛinone uariahite wuṛṛu inaite watukku Wawal᷊annu Pakkuunganna. Isudde i Ya'u Mawu sarun mamarikissa manga walahana uaal᷊indongannu uma-Ku.

¹³ I mangitou tumaniten dal᷊eo; ṛassi'e i mangitou naal᷊ihidda gandumma nal᷊ahate su wawail᷊anna. Mangke ṛindate i mangitou ere anggore sulal᷊ummu pamamakkan nu anggore apan napene na'oman sara tinumompe'a.

¹⁴ Suṛṛiwune taumata poi su Wawal᷊annu Pakkuunganna. Ana waugu poiaroddi allon Mawu mal᷊ihakke rumanta.

¹⁵ Matannallo wuṛṛu wul᷊anna mabbal᷊i marandumma, wuṛṛu manga anumpitanna tate lai semakke.”

Ruata sarun mangal᷊amatta uman-Ne

¹⁶ Mawu u'ui wuassu Sion, wowonen Tou; wuasu Yerusalem nirumallu'a tingik-Ke. Langitta wuṛṛu runia niumio'a ana waugu i Tou. Arawe Mawu sidutu sarun mannamba'a wuṛṛu manirungnga Israel, uman-Ne.

¹⁷ “Ei Israel, orassa indi i yamiu massingatte, manungku ete i Ya'u Mawu Ruatanu. I Ya'u uatana'a su Sion, wowone-U apan susi. Ne Yerusalem lai sarun maola'a soa apan susi, taumata raho tate maasutta isudde apia.

¹⁸ Sutempo udde manga wowone sarun mapenen wawail᷊annu anggore. Winatangnga papadul᷊iananna sarun umanna nannal᷊o su manga wuidda apan masuwukka. Manga sal᷊ukka su Yehuda tawe saran passa matti ua'ene. Sambau sal᷊ukka sarun mengelekka wuassu Wal᷊en Mawu, wuṛṛu lumiwanno su Wawal᷊annu Akasia ringannu ua'e apan maal᷊uassa.

¹⁹ Mesir sarun maola'a wadda'a apan mamara, wuṛṛu Edom mabbal᷊i lol᷊okka, tawe atanaannu taumata. Ana waugu i mangitou buatte namangalo taumatan Yehuda, wuṛṛu namate tumana'u wanua apan tawe pasasal᷊ane.

^20-21 Su daṛṛan mangitou i Ya'u sarun mabbal᷊issa, iapa apan namate sarun mate lai Ta'u rasi'anna. Arawe Yehuda wuṛṛu Yerusalem sidutu sarun pia mamanuane, wuṛṛu Wowon Sion sidutu sarun atanaang-Ku.”