YOEL 2 - WUKE SUSI WATTI'U AL᷊AL᷊USASSA

Iapaanaungnga su ola'u Allon Mawu apan sarun dumanta

¹ Paniuppe trompetta, patuntingia'e tatialan asasilaka su wuiddu Sion apan susi, aṛṛa'uanu Ruata. Pangngiladde, ei tumana'u Yehuda! Ana waugu Allon Mawu maranite wuṛṛu mal᷊ihakke rumanta.

² Allo udde marandumma wuṛṛu wasa, napenen ṛawu'a apan mal᷊abbukka. Tantaran saṛṛappalanna mangke pasi ranta naal᷊ihidda winabbawa apan namare su puiddu panenteanna. Araradiana ereudde taambe saran paassa pia, wuṛṛu tawe masul᷊e apia saran mal᷊annu-l᷊annu.

³ Naal᷊ihidda putungnga apan mannoṛṛobba wuṛṛu maatutungnga i mangitou nangepoddu al᷊awo'u sasuanna. Dorone, wanua udde naal᷊ihidda Eden, waillu Mawu, wua'udde, naal᷊ihidda wadda'u anne apan maṛṛasa. Tawe saran sambau apan nallambe, taweddu naatal᷊angnga wuassu aenggenni mangitou.

⁴ Hatin mangitou naal᷊ihida awal᷊o; tatal᷊angnga naal᷊ihidda awal᷊o su tampan pattalumanna.

⁵ I mangitou sussassolo'a su puiddu panenteanna, tingikke ere haṛṛagittu keretan pangalo wuṛṛu ere rente'u putungnga apan mannoṛṛobba raen amme. I mangitou uawarissa naal᷊ihidda ammul᷊annu tantara waṛṛani, apan nariahite inai mapapangalo.

⁶ Sutempo i mangitou namangalo, anambon taumata mangngiladda, anambon hati nampamikkassa wuṛṛu mawira-wira.

⁷ Naal᷊ihidda atumannaṛṛane, i mangitou namangalo, wuṛṛu nimawitta su darandungnga ere taumata waṛṛani. I mangitou uawarissa matul᷊idda watukku saruanne, tawe nabbeṛṛo ara'e namal᷊u monane.

⁸ I mangitou tawe nasaseppe'a, su lal᷊anne sasane i mangitou u'amatta. Mangke suadio'a i mangitou nanggohakku al᷊awo'u tanda batu, barisanni mangitou taweddu mapaataalla.

⁹ I mangitou namangalo sulal᷊ummu soa, wuṛṛu tuttal᷊angnga su wowon darandungnge. I mangitou niumawitta sulal᷊ummu manga wal᷊en; naal᷊ihidda taṛṛa ta'o, i mangitou sinumolo'a su jandela.

¹⁰ Tantal᷊anna i mangitou inai, runia nangindo, wuṛṛu langitta lai mangngiladda. Ana see naddandumpe matannallo wuṛṛu wul᷊anna, wuṛṛu semakku manga anumpitanna nawul᷊ite.

¹¹ Tingikku Mawu nirumallu'a, nangonggollu parenta, su tantaran pangalone. Tumaniten manambo reengannu tantarane! Tumaniten matohassa tantara apan mappaamattu parenta-Ne! Mangke maata'utta wuṛṛu wahewalla Allon Mawu! Tawe saran sangkatou apan maataṛṛangnga.

Wawaggo tadea'u mangapia pabbiaṛṛanna

¹² Mawu nabbisara, “Arawe orassa indi, pabbelengke ringang-Ku ringannu al᷊al᷊uassu naungnga, lapiddu mappuasa, sumangitta wuṛṛu lumuai.

¹³ Hesa'e naungngu wuṛṛu wal᷊ine sahenggellu.” Panailete Mawu Ruatanu. I Tou masabbare wuṛṛu maakkanna masaṛṛionto'a wuṛṛu napenen darangngu. Mal᷊uassa mangampungnga wuṛṛu maddiri makkuumanna.

¹⁴ Asinungka Mawu Ruatanu mawal᷊u ṛingiranna, wuṛṛu mangal᷊amatta si yamiu ringannu nilumambalanna. Na'oman sara i yamiu wotongnge mangonggollu sasamba sasamba anggore wuṛṛu gandumma su Mawu, Ruatanu.

¹⁵ Tiuppe trompetta su Sion, wowonen Duata, al᷊iata'e allon puasa, pa'ola'e ammul᷊anna wahewalla.

¹⁶ Ammula'e anambon tumanangnge, apira'e ammul᷊annu umatta. Doloṛṛa'e paaranta'a matatimmade, al᷊aṛṛana'a wuṛṛu ana'a maraddio'a lai. Ewe'e manga maawingnga wakku ṛinone rumanta lai. Doloṛṛa'e i mangitou manantangngu wabbo'ane.

¹⁷ Doloṛṛa'e manga imam apan mangimbe Mawu, lummuai suwallattu mezbah wuṛṛu panumbal᷊e su saruanne, lapiddu mabbisara, “Akkanaawe uman-Nu, oh Mawu; arie pabbala'a pussa'a-Nu mabbal᷊i pia angngone,” ma'oman sara manga walahanna waine mammasendekka wuṛṛu mabbisara, “Suapa Ruatan mangitou?”

Ruata na'ola'a leta'a masuwukka apia

¹⁸ Wua'udde Mawu nanutukka letang-Nge, wuṛṛu niumakkannu uman-Ne.

¹⁹ I tou sinumimbakka si mangitou arendi, “Orassa indi i yamiu sarangkanambone Ta'u onggol᷊annu: gandumma, anggore wuṛṛu lanan zaitun maola'a wiakki yamiu, tadea'u i yamiu sarangkanambone iapaal᷊aidda. I Ya'u tawe mamalan kamiu lallobbosanna ara'e ilallaggen manga walahanna.

²⁰ Ammul᷊annu saṛṛappalanna wuassu sawannakka sarun Ta'u limbuaṛṛanna, sambageanganna Ta'u ul᷊uhanna watukku wadda'u anne. Watukku Tahal᷊oangnga Nate Ta'u itol᷊a'a warisanna su monane, watukku Tahal᷊oangnga Tangngane Ta'u limbuaṛṛanna warisana su liudde. Manga winal᷊unanne sarun mahal᷊uru. I mangitou Ta'u pateanna ana waugu buatte nanansara si yamiu.

²¹ Arie paata'utta, ei wawail᷊ainna, paal᷊uasse naungngu; naungete inolaanna wahewalla apan manarannu Mawu si'o!

²² Ei manga winatangnga, ariete masusa. Manga wadda'u nannal᷊o orassa indi nangelompe. Ringannu nabelle'a manga aaluanna nabbua, wuan anggore wuṛṛu ara mangke pia serege.

²³ Ei tumana'u Sion, lalluasse! Lallala'e wuṛṛu paggiote! ana waugu al᷊owo'u apapia wuassu Mawu Ruatanu. Sutempon manontongnga i Tou nangonggollu uranna manambo si'o. Sutempon masunge urana niwambin-Ne, wuṛṛu lai sutempo mallal᷊uwo ere su inanaramanne.

²⁴ Ne gandumma sarun malloṛṛo apia tampa paṛṛindanne; anggore wuṛṛu lanan zaitun sarun lumawebbessa wuassu tampa pamakkanna.

²⁵ I Ya'u sarun mallana'a al᷊awo'u ararugiannu su manga tonna sutempo saṛṛappalanna niumanna hessin pangitingannu. Ana waugu ete i Ya'u apan nandolokku ammul᷊annu saṛṛappalanna udde si'o.

²⁶ I yamiu sarun masuungnga anna wuṛṛu maapendamma mal᷊aidda. Mawu Ruatanu sarun bantuhanni yamiu, ana si yamiu niolang-Nge manambo al᷊aṛṛindu'a. Uma-U tate lai maola'a hatto aal᷊uandaga!

²⁷ Ne i yamiu masingkatte, Israel, manungku i Ya'u udde su pattangngannu, wuṛṛu manungku i Ya'u, Mawu, uddewe Ruatanu. Tawe Duata waine, tumba'u i Ya'u sassane. Uma-U tate pansilianna apia!”

Allon Mawu

²⁸ “Wua'udde sal᷊immurine anambon taumata sarun Ta'u onggol᷊annu ghaṛṛaho-U. Ne manga anangngu umbasanna maṛṛuala sarun mamasingkattu manga tanata-U; manga matatimmade suwallannu sarun maasomba wal᷊iawa sodappa sarun ionggolla su manga umbasanna maṛṛuala.

²⁹ Sutempo udde ghaṛṛaho-U sarun Ta'u iwambinna lai su manga mangangimbe esakka wuṛṛu wawine.”

³⁰ Su langitta wuṛṛu su runia sarun Ta'u olaanna manambo al᷊aṛṛindu'a. Sarun pia papaturon daṛṛa, renggammu putungnga wuṛṛu sal᷊oin timbulla.

³¹ Matannallo sarun mabbal᷊i marandumma wuṛṛu wul᷊anna mabbal᷊i maṛṛamu ere daṛṛa. Sarangkanambone udde sarun mariaddi tantal᷊anna Allon Mawu taambe nia'omanna, allo apan wahewalla wuṛṛu maata'utta!

³² Arawe isai-sai apan maddorongnga aontollu Mawu, sarun iapasal᷊amatta. Mawu nabbisara, “Su Yerusalem manga taumata apan Ta'u nipile sarun masal᷊amatta.”