YOEL 1 - WUKE SUSI WATTI'U AL᷊AL᷊USASSA

¹ Eteindi tanatan Mawu si Yoel ana'i Petuel.

Umattu Israel massusa ana waugu wuan bawail᷊anna nasue niannu saṛṛappalanna

² Paddaringikke, ei manga timma-timmadde; panutukke, anambon taumata su Yehuda. Buattewe olangnge indi nariaddi su temponu, ara'e sutempon manga iupungngu al᷊amonanu?

³ Wattia'e arariaddiannu udde su manga anangngu; tadea'u i mangitou mabbatti'a lai su manga ana'i mangitou watti'a udde. Papapulunnu mananasunna ṛinone maaringikka lai watti'a udde, wuṛṛu manassu lai mabbatti'a su papapulunna manansunna.

⁴ Ammul᷊annu saṛṛappalanna apan tawe iareengnga anambone, na'oman sara su manga wawail᷊anna sarun nanaṛṛangassa wuane. Apate apan nilamben ammul᷊annu saṛṛappalanna indi, niinsuen ammul᷊annu saṛṛappalanna waine lai.

⁵ Ei manga taṛṛa wu'anna, apu'ote! Ei manga taṛṛa inumma, lalluaite! Ana waugu anggore apan wakku buatte niaṛṛo wuassu moṛṛongngu.

⁶ Ammul᷊annu saṛṛappalanna namangalo wanuan kite; i mangitou matohassa wuṛṛu tawe iareengnga anambone, isine maṛṛoro ere isin singa wawine.

⁷ I mangitou nanginsue pannu anggore ite, wuṛṛu punnu alu aran kite, ete nallame tuidde. Manga alune niluussi mangitou, na'oman sara manga rannane nabbal᷊i mawira.

⁸ Lalluaitte, ei umatta, naal᷊ihidda maṛṛuala apan massusa apan lulluain papaten tunangane apan arangnguanne.

⁹ Gandumma wuṛṛu anggore nawul᷊ite wuassu Wal᷊en Mawu. Ne nilumal᷊ote manga imam, apan satia mangngimbe Mawu.

¹⁰ Manga wawail᷊anna orassa indi nassongkakke. Leta'a lullal᷊o, ana waugu naṛṛangute al᷊awo'u gandumma namarate wuan anggore, wuṛṛu nasuete lanan zaitun.

¹¹ Ei manga mabbawailla, lalluaite! Ei mabbawaillu anggore, sasangitte! Ana waugu gandumma, jelai wuṛṛu anambon pangitinganna nal᷊al᷊eo.

¹² Manga aaluannu wua su wadda'a naṛṛangute sarangkanambone: punnu anggore, apel, ara, kurma wuṛṛu delima. Ne tumana'u soa tate lai lumuassa.

¹³ Ei manga imam apan mangngimbe su mezbah, palluṛṛeten nasa karongnga, wuṛṛu lalluaite. Suttate su Wal᷊en Mawu tadea'u sumangitta saṛṛabbi tuudda, ana waugu tate sasamba anggore wuṛṛu gandumma su Ruatanu.

¹⁴ Doloṛṛa'e umannu mappuasa, al᷊iata'e paammul᷊anna wahewalla! Pannotete manga piaṛṛa'a wuṛṛu matatimmade see lai anambon tumana'u Yehuda, tadea'u rumanta su Wal᷊en Duata, tadea'u sumal᷊ande maiontolla si Tou.

¹⁵ Allon Mawu maranite, allo apan maata'utta; sutempo Apan Lembon Taṛṛino mandantan araṛṛimunsa'a.

¹⁶ Anna manga nasue-sue su saruannu matan kite su Wal᷊en Duatan kite tate lai hion al᷊uassa.

¹⁷ Wualanna nate su leta'a apan mamara. Tate gandumma sahipunanna, ne manga wal᷊ingkakka tate loṛṛone wuṛṛu nabbal᷊i ombon sapadda.

¹⁸ Winatangnga papadul᷊iananna mammiṛṛonganna wuṛṛu u'ambul᷊isadda; tate lai wadda'u nannal᷊o si tou. Ammul᷊annu domba lai ringanna naṛṛasa.

¹⁹ I ya'u ma'iontolla Si'o, oh Mawu ana waugu manga wadda'u nannal᷊o mangke naṛṛangu mamara manga aluanna lai naṛṛangu wuṛṛu nate naal᷊ihidda ere nisoṛṛobbu putungnga.

²⁰ Ewe'e lai manga winatangnga mal᷊aṛṛaga su mahurangnge sussal᷊ande Si'o maddorongnga sasumbala. I mangitou tawe mapangulen ararou, ana waugu manga sal᷊ukka mangke natti abbi ua'ene.