YESAYA 8 - WUKE SUSI WATTI'U AL᷊AL᷊USASSAAna'i Yesaya naola'a tatiala su pabbawala udde 1 Mawu nabbisara si ya'u, “Panganute sambau watunlei wahewalla, ana see'e woṛṛeta'e ringannu manga huruppa apan masemakka: ‘Pallaṛṛampassa apan Matal᷊ingkassa, Pangangaṛṛo apan Mal᷊ihakka.’ 2 Waggoite maola'a matatialane ruan katou apan wotongnge apangimananna, eteudde i Imam Uria wuṛṛu i Zakharia, ana'i Yeberekhya.” 3 Manga pira tempo wua'udde awingku piate illoṛṛo. Sutempo ana'i yami niasungkangnga, Mawu nabbisara si ya'u, “Saggoa'e i tou ‘Mallaṛṛampassa apan Matal᷊ingkassa, Pangangaṛṛo apan Mal᷊ihakka.’ 4 Waugu tantal᷊anna ana'a udde ta'e addio'a taambe maasaggo ‘Papa’ wuṛṛu ‘Mama’, anambon paa'alan Damsyik wuṛṛu anambon saranapa niṛṛampassu Samaria sarun ṛuwoanna ringannu ratun Asyur.” Ratun Asyur nirumanta 5 Mawu nabbisara apia si ya'u, 6 wisara-Ne, “Walahanna indi nanol᷊a'u ua'e apan matilangnga wuassu ana'u Sal᷊ukku Syiloah, wuṛṛu mal᷊uassa ringanni Ratu Rezim wuṛṛu i Ratu Pekah. 7 Ana waugu udde i Ya'u, Mawu, sarun maparantan ratun Asyur wuṛṛu anambon tantarane mapapangalo Yehuda. I mangitou sarun lumempangnga ere Sal᷊ukku Efrat apan mattaṛṛatompe'a wuṛṛu mangngelekka su manga rampinne. 8 I mangitou sarun mangelekka su Yehuda ere manawangnga atanggakke sara ullekka manggal᷊amon kal᷊awo'a.” Ruata uarundinganna si ite! Papaid-De apan uasiappakka uatillumma wanuan kite. 9 Pa'ammule ringannu mangngindo, ei anambon al᷊awo'u walahanna! Paddaringikke ei manga pentakku runia! Pasasaddiate inai mappangalo, arawe ringannu naungnga apan mawawo! Ore, pasasaddiate, arawe ringannu apendamma mangngindo! 10 Panngol᷊age, arawe sarangkanambone tawe maola'a. Pakkawesse, arawe tawe gunane, ana waugu Ruata uaṛundinganna si yami. Mawu nangonggollu tataggu si Yesaya 11 I ya'u nitaṛṛinoannu Mawu wuṛṛu nionggol᷊annu tatagu tadea'u tawe mallaṛṛenggenna lal᷊anna apan amatannu walahanna udde. Wisara-Ne, 12 “Arie massunna komplotanna apan aellehanni mangitou komplotanna, wuṛṛu arie mata'uttu manga inolaanna apan iaata'utti mangitou. 13 Naungete manungku i Ya'u, Mawu Apan Lembontaṛṛino uddewe susi. Tumba'u i Ya'u apan ṛinone iaata'unnu. 14 Ana waugu i Ya'u lembon susi, i Ya'u na'ola'a watu atarannu tumana'u Yehuda wuṛṛu Israel, wuṛṛu sedda apan mannametta tumana'u Yerusalem. 15 Manambo taumata apan sarun manawo matara wuṛṛu mal᷊essa. I mangitou sarun mawul᷊ussa sulal᷊ummu sedda.” Sasingadda maddorongnga tatantiro wuassu taṛṛa pasangkadda ara'e dukun 16 I yamiu, mallal᷊aṛṛenggengku ṛinone manahipunna wuṛṛu mappadul᷊i manga tanata apan nionggollu Ruata si ya'u. 17 Mawu buatte namunin batangan-Ne wuassu pallaṛṛiten Yakub, uman-Ne, arawe i ya'u mangngimanna wuṛṛu uaantimma si Tou. 18 Indite i ya'u wuṛṛu al᷊aṛṛana'u apan nionggollu Mawu si ya'u. Mawu Apan Lembontaṛṛino apan uaparenta su Sion, nandolokki yami maola'a tiala su umattu Israel. 19 Arawe manga taumata apan mandolokki yamiu madorongnga tatantiro wuassu manga taṛṛa pasangkadda apan uasasal᷊imburunga wuṛṛu wiwikke u'alore. Taumata udde sarun mabbisara, “Wal᷊inewe i ite ṛinone maddorongnga tatantiro wuassu manga ṛimuuddu taumata nate tadea'u hunan taumata wiakka?” 20 Simbakke arendi, “Paddaringikke al᷊aṛṛa'u Mawu! Taumata apan tawe mabbisara uasul᷊ungngu al᷊aṛṛa'a udde, tawe antimma.” Tempo napenen asasuṛṛipitta 21 Manga taumata apan naṛṛiaannu susa wuṛṛu mal᷊unussa sarun mamal᷊intaddu wanua udde. Ana waugu mal᷊unussa, i mangitou mangke mandona na'oman sara mangnganen datu wuṛṛu Ruata mangitou. Suapan tampa i mangitou ma'ellega, tumatingngara, 22 ara'e mangngintanno, i mangitou tawe maasilo manga apa tumba'u asasuṛṛipitta wuṛṛu ararandumma se'e lai asasul᷊aubba apan mangngaitta. I mangitou sarun iramme sutampa apan marandumma udde. 23 Arawe tawe saran mal᷊annu-l᷊annu wanua udde aṛṛiaannu asasuṛṛipitta. Wageangngu leta'a apan atatanaannu manga ṛuanganni Zebulon wuṛṛu Naftali tawe ellehannu Mawu mawawo. Arawe sutempo apan addantane, i Tou sarun mangaddatta su ahewallu leta'a wuassu Tahal᷊oangnga Tangngane watukku ra'i maddatingngu samba'an Sal᷊ukku Yordan, ewe'e lai maddatingngu Galilea apan wawanuannu taumata raho. |
@ LAI 2003
Indonesian Bible Society