YESAYA 66 - WUKE SUSI WATTI'U AL᷊AL᷊USASSA

Mawu nakkuungngu manga walahanna

¹ Mawu nabbisara, “Langitta uddewe adderan araratuang-Ku, wuṛṛu runia pangangaddoannu ledda-U. Nariaddi wal᷊en saṛṛene ereapa sarun Ta'u iapararisikka maola'a atatanaang-Ku, wuṛṛu tampa ereapa sarun pamanuang-Ku?

² Ul᷊ilin pati'uppa uddewe lanna'u lima-U, ne sarangkanambone udde niola'a. Arawe apulu-U eteudde taumata naungnge masaṛṛionto'a, apan mangnga'u manga rosane, apan matta'utta wuṛṛu matuṛṛutta si Ya'u.

³ Arawe walahanna udde ma'ola'a walate apulu mangitou; i mangitou mal᷊uassa mattaṛṛamawu ringannu atokke apan ma'arantinna. Si mangitou tawe paddaṛṛalanne: mangngonggollu sapi esakka wuṛṛu mangngonggollu taumata, mangngonggollu ana'u domba wuṛṛu mammaddi ullekkan asu; mangngonggollu gandumma wuṛṛu mangngonggollu daṛṛan bawi, mannambunnu amania wuṛṛu massubba pa'al᷊uanna.

⁴ Ana waugu udde i Ya'u ma'ola'a walate apulu-U wuṛṛu mangema'a si mangitou manga asasilaka apan iaata'utti mangitou. Anawe sutempo i Ya'u mammaggo, taweddu sumimbakka; sutempo i Ya'u mabbisara, taweddu maddaringikka. I mangitou apulune lullawangnga si Ya'u i Ya'u sarun ma'ola'a al᷊al᷊eoanne.”

⁵ Paddaringikke apa apan iwabbisara Mawu, ei i yamiu apan matta'utta wuṛṛu matuṛṛutta si Tou, “Ana waugu i yamiu satia si Ya'u, pia suwallattu walahannu apan maddantinni yamiu, wuṛṛu maddiri massagal᷊omang kamiu. I mangitou mangngal᷊uandaga si yamiu ringannu mabbisara, ‘Wala'e Mawu mapal᷊iatta'u awawantu-Ge, tadea'u i yami maasilo al᷊al᷊uassi yamiu.’ Arawe ete i mangitou sassane apan maasomba asasili.

⁶ Paddaringikka! Pia tingikka ruddallu'a su soa; pia tingikka su Wal᷊e-U; eteudde tingi-U apan tantal᷊anna mabbal᷊issa seetta!

⁷ Soa susi-U ere sangkatou inangnga apan mangngunsiwe tantal᷊anna taambe naapendamma taddu'a; apan nanungkangngu ana'a esakka tantal᷊anna taambe namendamma taddu'a ṛumana'a.

⁸ Isai buatte naaringikka olangnge ereudde? Isai buatte naasilo arariaddianna lihidde ereudde? Arawe walahannu Israel nasungkangke sutempo Sion mannatakke ma'apendamma taddu'a manungkangnga.

⁹ Imbaṛṛangnga massunna i Ya'u nangapiddu uma-U ma'oman sutempone iasungkangnga wuṛṛu tawe namala mangitou iasungkangnga.” Etearoddi wisara Mawu.

¹⁰ Lallala'e suadio'a ringannu Yerusalem, ei anambon taumata apan marangngu. I yamiu apan lullal᷊o ana waugu i tou, orassa indi wotongngete lumuassa.

¹¹ I yamiu sarun maatemma pa'aalane, naal᷊ihidda sangkatou ana'a sussusu inangnge.

¹² Ana waugu Mawu nabbisara, “I yamiu sarun Ta'u onggol᷊annu lal᷊umanna'a naal᷊ihidda sal᷊ukka apan mangngelekka; pa'aala manga walahanna sarun iapidda ringannu naal᷊ihidda sal᷊ukka apan tuttompe'a. I yamiu naal᷊ihidda ana'a apan iappasusu wuṛṛu sasal᷊uruannu inangngene, see lai sassaṛṛiolohanna su ṛiwane.

¹³ I Ya'u sarun malluassa si yamiu su Yerusalem, ere sangkatou inangnga mallimbatta anangnge.

¹⁴ Naasilo udde, i yamiu sarun lumuassa, wuṛṛu mabbal᷊i matohassa wuṛṛu sehatta ere nannal᷊o wakku. Ne manga allang-Ku sarun ma'apendamma taṛṛino-U wuṛṛu manga see-U sarun ma'apendamma asasa'u-U.”

¹⁵ Atonna, Mawu sarun dumanta ringannu putungnga; i Tou sarun suma'e kereta-Ne naal᷊ihidda anginna al᷊isusu, tadea'u mapasabbangngu asasa'u-Ne, wuṛṛu mammuṛṛeangnga ringannu ma'ikkatta.

¹⁶ Ana waugu anambon taumata apan niasangkal᷊anna nassal᷊a sarun iṛṛuuman-Ne ringannu putungnga wuṛṛu hal᷊ele, wuṛṛu manambote apan niṛṛuumanna pateanna.

¹⁷ Mawu nabbisara, “Anambon taumata apan mapaasusin batanganne tadea'u inai su manga wailla massubba manga monganna wuṛṛu mattaṛṛamawu si mangitou, sarun mawul᷊i suadio'a ringannu manga taumata apan u'inassa ṛemessu wawi wuṛṛu wal᷊awo see lai anna waine apan ma'arantinna.

¹⁸ I Ya'u masingkattu ṛingiranna wuṛṛu inolaanni mangitou. I Ya'u nirumanta tadea'u mangammullu manga taumata wuassu al᷊awo'u walahanna. Sutempo i mangitou uaammulle, i mangitou sarun maasilo taṛṛino-U.

¹⁹ I Ya'u sarun mangaddon sambau tatiala su pattangnganni mangitou. Sambageanganna addio'a suwallatti mangitou Ta'u iapaasal᷊amatta. I mangitou sarun Ta'u irolokka ringannu manga walahanna su manga wanua marau apan taambe saran paassa naaringikka si Ya'u ara'e naasilo awawantuga wuṛṛu taṛṛino-U: watukku Spanyol, Libia, wuṛṛu Lida ringannu manga mamamitingnge apan masiṛṛongnga, watukku Tubal wuṛṛu Yunani. I mangitou sarun mamasingkattu awawantu-Ku su pattangngannu manga walahanna udde.

²⁰ Wuassu manga wanua udde i mangitou sarun mangapidda apia manga tuṛṛangngi yamiu sambalahanna maola'a aonggolla si Ya'u. I mangitou sarun mangapiddu manga taumata udde su wui-U apan susi su Yerusalem ringannu uasa'e awal᷊o, keledai wuṛṛu unta, wuṛṛu ringannu kereta see roda, ere inanaramannu taumatan Israel mangngapidda su Wal᷊en Mawu sasamba gandumma sulal᷊ummu tampane apan baresi.

²¹ Sambageanganna suwallatti mangitou sarun Ta'u itenega maola'a imam wuṛṛu taumatan Lewi.

²² Naal᷊ihidda langitta wakku wuṛṛu runia wakku sarun matatana'a ana waugu taṛṛino-U, aroddi lai pallaṛṛitenu wuṛṛu arannu sarun sidutu matatana'a.

²³ Suapan Bul᷊anna wakku wuṛṛu suapan allon Sabat anambon umattu taumata sarun dumanta massubba si Ya'u su Yerusalem.

²⁴ Sutempo umamatte, i mangitou sarun maasilo winal᷊unannu manga taumata apan buatte nilumawangnga si Ya'u. Ul᷊idda apan u'inassa winal᷊unanni mangitou sarun tawe mate, wuṛṛu putungnga apan mannoṛṛobba si mangitou tawe mappadumma; sambau inolaanna aellehanna apan maata'utta su anambon taumata.”