YESAYA 64 - WUKE SUSI WATTI'U AL᷊AL᷊USASSA

¹ Hesa'e langitta wuṛṛu sossokke, oh Mawu, ola'e manga wowone u'io'a su saruan-Nu,

² naal᷊ihidda putungnga mappaṛṛenggamu alu wuṛṛu napahoggokku ua'e. Papal᷊iattaa'e taṛṛino-Nu su manga seen-Nu, na'oman sara manga walahanna mangngiladda su saruan-Nu.

³ I'o buatte na'ola'a inolaanna apan bahewalla, apan tawe niaṛṛangngo kami. I'o sinumossokka, wuṛṛu su saruan-Nu manga wowone niumio'a.

⁴ Taambe saran paassa piaddu naaringikka, wuṛṛu taambe saran paassa piaddu naasilo manungku wal᷊ine wuas-Si'o, pia mawu apan mammanara, su taumata apan uaantimma si tou.

⁵ I'o mannal᷊oho taumata apan matul᷊idda, wuṛṛu ingana'a apan mabbiakka tuttuṛṛuta apulu-Nu. I'o massa'u si yami, arawe i yami sidutu ma'ola'a rosa atonna ro'en dorone i yami nassal᷊a.

⁶ I yami sarangkanambone uddewe taumata marosa, ewe'e lai inolaanni yami apan mapia udde lal᷊eo wuṛṛu tawe waresi. I yami sarun mawul᷊i ana waugu al᷊al᷊eong kami naal᷊ihidda rongnga tinumolangnga nitalla'u anginna.

⁷ Taweddu niumal᷊iomanna Si'o, ara'e maddorongnga a'ontolla Si'o, ana waugu I'o mammunin hati-Nu si yami, wuṛṛu namalang kami pappateannu rosang kami.

⁸ Arawe I'o, oh Mawu, uddewe Iamangngi yami, i yami leta'a madde'etta, wuṛṛu I'o na'ola'a saṛṛene; i yami sarangkanambone uddewe lanna'u lima-Nu.

⁹ Nariaddi ariewe tumanite masa'u, oh Mawu, ariete lai mannaungnga rosang kami; ellehete, i yami indi uman-Nu.

¹⁰ Manga soa-Nu apan na'ukkassa naal᷊ihidda wadda'u anne, Yerusalem naola'a wadda'a maṛṛasa wuṛṛu mal᷊annabba.

¹¹ Wal᷊en Duata apan susi wuṛṛu mawantuga tampan al᷊amonan kami maddalo Si'o, buatte niepoddu putungnga; anambon tampa apan ipa'apulung kami naola'e winalal᷊anna.

¹² I'o ma'ellega sarangkanambone udde, oh Mawu, ṛatadde I'o tumba'u mal᷊annabba? Apa I'o sarun mamalan kami tumaniten uatataṛṛanga mawakkatta?