YESAYA 63 - WUKE SUSI WATTI'U AL᷊AL᷊USASSA

Auntungannu Mawu su manga araratuanna Mandariagga

¹ “Isaite i tou apan nirumanta wuassu Bozra su Edom? laungnge maṛṛamu, peddenne maṛṛamaga; i tou u'amatta ringannu waṛṛani matohassa.” “Ete i Ya'u Mawu apan botongnge manal᷊amatta wuṛṛu nirumanta ringannu uaapiddu watti'u auntunganna.”

Mawu Mandariagga

² “Anio laungngu aroddi aṛṛamunne, naal᷊ihidda laubbu mamamakka wuan anggore?”

Mawu

³ “Sassane i Ya'u sutampa pamamakkannu anggore suwallattu uma-U taweddu nantul᷊ung-Ku. Manga walahanna mangke Ta'u niṛṛinda sulal᷊ummu asasa'u-U, naal᷊ihidda ere makkinda wuan anggore. Daṛṛa mangitou namiti'a naṛṛolo lau-U, naal᷊uhudda ahewallu lau-U.

⁴ I Ya'u buatte nanggol᷊agu allo ipabbal᷊issa, wuṛṛu tempon pamamallossu uma-U.

⁵ I Ya'u maddea'a, arawe taweddu natul᷊ungnga, i Ya'u naherangnga manungku taweddu massumbala. Wua'udde atatoha-U sassane apan natul᷊ung-Ku, asasa'u-U apan nassumbala si Ya'u.

⁶ Sulal᷊ummu asasa'u-U apan lukkenggamma, Ta'u niṛṛinda manga walahanna; Ta'u niṛṛadda'a i mangitou, wuṛṛu daṛṛa mangitou Ta'u niwoso su leta'a.”

Apapian Duata su Israel

⁷ I Ya'u indete mabbatti'u darangngu Mawu wuṛṛu maddalo si Tou ana waugu al᷊awo'u inolaan-Ne. Ringannu nilumambalanna i Tou nangal᷊amatta uman-U, ana waugu i Tou marangngu wuṛṛu darangngu-Ne tawe panguddusanne.

⁸ Mawu nabbisara, “Atonna-tonna, i mangitou uddewe uma-Ku, manga al᷊aṛṛana'a apan tawe nandal᷊eo naungnga.” Ne i Tou nabbal᷊i Mananal᷊amatti mangitou,

⁹ i Tou sassane niaṛṛiaannu asasusa mangitou, Mawu tawe nandolokku daroloṛṛanna ara'e maṛṛinu; Ete i Tou sassane namallossi mangitou ana waugu darangngu wuṛṛu tatal᷊antum-Me. I Tou sidutu mammadul᷊i si mangitou ro'en al᷊amonane.

¹⁰ Arawe i mangitou nilumawangnga wuṛṛu napaasusan naungngu Mawu. Ne i Tou nawal᷊elongnga naola'a seetti mangitou i Tou sassane napapangalo nando'appa si mangitou.

¹¹ Wua'udde i mangitou nanaungke tempon al᷊amona, tempo Musa, allangngu Mawu. I mangitou naiwal᷊o, “Suapate Mawu apan nangehetta manga piaṛṛa'u uman-Ne niumamatta su tahal᷊oangnga? Suapate Mawu apan nangonggollu taṛṛino-Ne si mangitou?

¹² Suapate Mawu apan uaringanna si Musa ringannu lima-Ne apan tumanite matohassa, wuṛṛu nama'a ua'e su saruanni mangitou tadea'u aran-Ne tumelengnga sarangkal᷊o'enge?

¹³ Suapate Mawu apan nangehetta si mangitou u'amatta su ua'e apan mal᷊al᷊umma? Naal᷊ihidda awal᷊o u'amatta su wadda'u anne, i mangitou tawe saran paassa natara.”

¹⁴ Mawu nangapiddi mangitou sutampa pangillol᷊oanna, naal᷊ihidda winatangnga a'ul᷊uhanna iapasioma nannal᷊o su wadda'a. Etearoddi i Tou nangehetta uman-Ne, tadea'u aran-Ne wantuhanna.

Aal᷊iomanna maddorongnga aakkanna wuṛṛu sasumbala

¹⁵ Oh Mawu, pangintannote wuassu surga, wuassu atatanaan-Nu apan na'ukkassa wuṛṛu mawantuga. Suapate darangngu wuṛṛu awawaṛṛani-Nu? Suapate apapia wuṛṛu darangngu-Nu? Ariewe udde taṛṛanganna si yami.

¹⁶ Wal᷊inewe I'o Iamangngi yami? Abraham wuṛṛu i Yakub waggan kami. Arawe I'o Mawu, uddewe Iamangngi yami, Mananal᷊amatta si yami ro'en al᷊amonane.

¹⁷ Oh Mawu, anio i yami niwala-Nu niumal᷊iwu? Anio I'o napaattikku naungngi yami na'oman sara i yami tate mata'uttu Mawu? Pabbelengke ana waugu manga allang-Ngu, wuṛṛu uman-Nu, pussa'a-Nu.

¹⁸ Anio niwala-Nu seetta mangke makkinda Wal᷊en-Nu, wuṛṛu manga taumata mandal᷊eo wuid-Du apan susi?

¹⁹ I'o ma'ola'a si yami ereola'u taambe namarenta si yami, ereola'u i yami taambe naola'a uman-Nu.