YESAYA 61 - WUKE SUSI WATTI'U AL᷊AL᷊USASSA

Watti'u al᷊al᷊uassa su ola'u pamamallossa

¹ Taṛṛino Mawu Apan Atanggaṛṛanne indi si ya'u; i Tou namile wuṛṛu nandolo'u iappa'apiddu watti'u al᷊al᷊uassa su taumata asiangnga wuṛṛu iappa'apia taumata apan naungnge natumma'a; iappapasingkatta su taumatan ṛuumanna manungku i mangitou mal᷊ihakke ipallossa, wuṛṛu su manga taumata sulal᷊ummu tuttupanna manungku i mangitou sarun iapasabbangnga.

² I tou nandolo'u iappawatti'a manungku nia'omante tempone Mawu manal᷊amatta; hunan ipalluassa anambon taumata apan massusa, wuṛṛu mabbal᷊issa manga seetti mangitou;

³ hunan ipangonggollu al᷊al᷊uassa wuṛṛu lal᷊ala'a su taumata apan massusa wuṛṛu lullal᷊o; hunan ipamal᷊u asasusan mangitou maola'a aantarin daralo. I mangitou sarun maola'a ere alu apan nisuannu Mawu sassane. I mangitou sarun pia pallal᷊aghu mapia wuṛṛu naṛṛino, na'oman sara Mawu sarun bantuhanna.

⁴ I mangitou sarun mapararisikku manga soa apan mal᷊annute nahohakka wuṛṛu manul᷊e manga tampa apan mal᷊annute mal᷊annabba.

⁵ Ei, pabbawala'u, taumata raho sarun mangimbe si yamiu; i mangitou sarun mallu'adda winatangngu wuṛṛu mammanara wailla se'e lai waillu anggorenu.

⁶ I yamiu sarun isaggo allangngu Ruata wuṛṛu isaggo imam wuassu Mawu kite. I yamiu sarun maatemma pa'aala manga walahanna wuṛṛu maapendamma lulluassa ana waugu darotongngi mangitou.

⁷ Ana waugu i yamiu naasombate asasili paarua lappuanna, wuṛṛu luhudda wuṛṛu aal᷊uandaga naola'e wageangnge, ne i yamiu sarun maasomba pussa'a paarua lappuanna lai su wanuanu wuṛṛu uatahuanna al᷊al᷊uassa tutune.

⁸ Mawu nabbisara, “I Ya'u marangngu atatul᷊idda wuṛṛu maddantinnu pangangallanga se'e lai al᷊al᷊eo. I Ya'u sarun mangonggollu hadinu ringannu uaatokka, wuṛṛu mangiittu paddariandi sarangkal᷊o'enge ringanni yamiu.

⁹ Pallaṛṛitenu tumelengnga su anambon tampa, maddingikka suwallattu al᷊awo'u walahanna. Ne anambon taumata apan naasilo sarun manga'u, manungku walahanna indi Ta'u nial᷊amatanna.”

¹⁰ Yerusalem nabbisara, “I ya'u lulluassa ana waugu Mawu, naungku lullal᷊a'a ana waugu Ruata. Naal᷊ihidda ma'aawingnga esakka wuṛṛu wawine uapa'attu lal᷊oggakka mangkaṛṛansanga, etearoddi Mawu nameddetta si ya'u laubbu asasal᷊amatta wuṛṛu auntunganna.

¹¹ Ere wualanna apan niasi'a sarun tumuwo maola'a sinuananna, etearoddi Mawu Ruata mapaatuwon asasal᷊amatta wuṛṛu anambon walahanna sarun maddalo si Tou.”