YESAYA 59 - WUKE SUSI WATTI'U AL᷊AL᷊USASSA

Nabi namontogga manga rosan walahanna udde

¹ Imbaṛṛangnga massunna manungku tumaniten lome manal᷊amatta si yamiu, ara'e tumaniten bengella maddaringikka sasal᷊andenu.

² Ana waugu ete al᷊al᷊eonu i Tou tawe maddaringikka sutempo i yamiu umal᷊iomanna si Tou. Ete manga rosanu apan nakkaen kamiu wuassu Ruata.

³ I yamiu nassal᷊a ana waugu namahia wuṛṛu nallinga, ana waugu na'ola'a araṛṛagissa wuṛṛu mammate.

⁴ I yamiu mangngalaen hatto tawe pangiananne wuṛṛu makkuungnga ringannu tawe atatul᷊idda. I yamiu mangngawusu wuṛṛu mangngasakku apa apan tawe gunane; i yamiu makkiinna ipandal᷊eo taumata waine wuṛṛu ma'ola'a al᷊al᷊eo.

^5-6 Manga ṛiinni yamiu apan dal᷊eo mangngapiddu papate ere tallukku atoanna mawisa. Amungkangngu tallukka udde pesanganna, sumabbangke atoanne. Ṛiinna udde mangke tawe gunane si yamiu, naal᷊ihidda laubba apan niraddu'a wuassu sal᷊akku al᷊imbuwutta!

⁷ I ya'u tawe illol᷊one makkiinnu al᷊al᷊eo, wuṛṛu mangke mappulute mal᷊ihakka olaanna. Ringannu tawe go'ane i yamiu mammate taumata apan tawe sal᷊ane; suapan tampa i yamiu inai, i yamiu mannantangngu ahaho akka wuṛṛu awawinasa.

⁸ I yamiu tawe maddea'a paddarame, wuṛṛu anambon inolaannu tawe atatul᷊idde. Lal᷊annu mangke wengkolla, wuṛṛu taumata apan umamatta su lal᷊anna udde sarun mabbiakka susa.

Walahanna udde nanga'u rosa mangitou

⁹ Pabbawalaga udde nabbisara Ruata, “Orassa indi i yami masingkatte anio I'o tawe nanal᷊amatta si yamiu wuassu manga taumata apan mangngallanga si yamiu. I yami uaṛṛaddo semakka, arawe tumba'u pia ararandumma.

¹⁰ I yami uasasaṛṛipo naal᷊ihidda taumata wuta; allattune i yamiu iattara ere ṛabbi mattangnga; su tangngan taumata wiakka yami naal᷊ihidda taumata nate.

¹¹ I yami su atata'utta wuṛṛu su asasusa; i yami maddea'a atatul᷊idda, arawe tawe baddi'a; i yami mangngantimma asasal᷊amatta, arawe tawe gunane.

¹² Tumanite manambo al᷊al᷊eong kami su saruan-Nu; manga rosang kami mapaasal᷊ang kami. I yami atonna-tonna naatutukka al᷊al᷊eong kami, wuṛṛu naasingkatta manga rosan kami.

¹³ I yami buatte nassinaadda wuṛṛu nilumawangnga Mawu, wuṛṛu maddiri tumantalongnga Ruatang kami. I yami buatte nangallangnga taumata waine wuṛṛu sinumewadde; ṛingiranni yami niumal᷊iwu, wuṛṛu manga wisaran kami awusu.

¹⁴ Tita apan matul᷊idda buatte niramme, wuṛṛu atatul᷊idda niapaarau. Apapia naungnga tate iaregga su tangngan awadaalla, wuṛṛu asasaṛṛionto'a nital᷊i'uranna.

¹⁵ Tate lai taumata apan tawe mamahia, wuṛṛu isai apan mangngindaun al᷊al᷊eo, i tou sassane maola'a sol᷊eng kal᷊al᷊eo.” Mawu buatte naasilo udde, wuṛṛu i Tou tawe mal᷊uassa manungku tate lai atatul᷊idda.

Mawu nariahite manal᷊amatta uman-Ne

¹⁶ I tou nahrangnga manungku taweddu nirumanta wuṛṛu tate laiddu nanamba'a. Ne i Tou nappaattu taṛṛino-Ne sassane ipanal᷊amatta wuṛṛu ipangonggollu auntunganna si mangitou.

¹⁷ I tou nappaattu atatul᷊idda wuṛṛu asasal᷊amatta ere laubba atta'a wuṛṛu araposa waja. I tou mappulu mangapia olangnge udde wuṛṛu mabbal᷊issa apan tawe su atatul᷊idda.

¹⁸ I tou nabbal᷊issa manga seen-Ne uasul᷊ungngu inolaanni mangitou. Ewe'e lai manga araratuanna su manga taṛṛanusa apan marau tawe mal᷊iudda wuassu ṛuuman-Ne.

¹⁹ Taṛṛino wuṛṛu awawantu-Ge sarun ia'ata'uttu anambon taumata wuassu ra'i maddatingngu waṛṛatta. I tou sarun dumanta ere sal᷊ukka apan masassagga apan tattiupannu anginna ma'ikkatta.

²⁰ Mawu nabbisara uman-Ne, “I Ya'u sarun dumanta su Yerusalem tadea'u manal᷊amatta si yamiu sarangkanambone apan nawal᷊u wuassu manga rosanu.

²¹ I Ya'u nakkiinnu pa'aire ringanni yamiu: I yamiu onggol᷊annu taṛṛino-U wuṛṛu al᷊aṛṛa-U saran mal᷊annu-l᷊annu. Ara'e lai ionggolla su manga anangngu tadea'u i mangitou lai wotongnge mangaṛṛa'u udde su ana'a pulunne orassa indi maddatingngu saran mal᷊annu-l᷊annu.”