YESAYA 57 - WUKE SUSI WATTI'U AL᷊AL᷊USASSA

Pasasubba paal᷊uanna niwontohanna

^1-2 Taumata mapia wuṛṛu maagama nate, taweddu maasunna ara'e ma'innunu olangnge udde. Napawe buatte nate, i mangitou nal᷊iute wuassu asasilaka wuṛṛu mangngillol᷊ote ringannu paddarame.

³ Arawe i yamiu, ammul᷊annu taumata marosa, rantate parikisanna! I yamiu tawe mappianne wuassu taṛṛa wal᷊i'immata, taumata apan apulune sussandagga wuṛṛu mabbal᷊u'u watanganne!

⁴ Isaite apan ilaggen kamiu? Isaite apan aal᷊uandahanni yamiu? Wal᷊inewe i yamiu pallaṛṛiten taṛṛa awusu wuṛṛu mal᷊awangnga?

⁵ I yamiu massubba manga mongannu asasuwukka ringannu mamalan batangannu iaapiddu apulun dunia su al᷊ungngu manga alu mangal᷊eng kamiu. I yamiu nallabbingu manga anangngu su wawal᷊annu sal᷊ukka, nisalle'a su manga wallattu watu.

⁶ Nariaddi naṛṛinote i yamiu mangammullu manga watu mal᷊ewakka wua isudde. Eteudde wageangngu! Ete su manga watu udde lai i yamiu nallal᷊innu anggore wuṛṛu nangonggollu gandumma. Unnu pahinu i Ya'u mal᷊uassu sarangkanambone udde?

⁷ I yamiu inaite watukku manga puiddu wowone wuṛṛu mangonggollu sasamba wuṛṛu mapaawusa apulu naungngu runianu.

⁸ I yamiu napararisikku manga paal᷊uannu apan masandaga su pua ngaran wal᷊en i yamiu. I Ya'u nitantangkeng kamiu. I yamiu nalluatta laubbu wuṛṛu nilumallowangke su antilla apan nilal᷊akku wawine apan nisewannu tadea'u matiilla suadio'a ringannu, see i yamiu nabbalate apulu naungngu.

⁹ I yamiu mappaattu lana wuṛṛu manga awawangngi wua'udde inaite massubba monganni Molokh. I yamiu nandolokku manga daroloṛṛanna su manga wanua marau, naddatingngu lai wanuan taumata nate.

¹⁰ Ringannu tawe illol᷊one i yamiu maddea'a manga monganna. I yamiu massunna manungku i mangitou wotongnge manonggollu atatohassa wakku, na'oman sara i yamiu tawe mallome.

¹¹ Mawu nabbisara, “Isaite manga monganna udde apan naaola'a si yamiu matta'utta, na'oman sara i yamiu mangngawusu wuṛṛu tate mannaungnga si Ya'u? Apa i yamiu tate massubba si Ya'u lai ana waugu i Ya'u tumanite mal᷊annu uatine?

¹² Arawe i Ya'u mamasingkatta si'o; pangangagamanu udde awusu, wuṛṛu anambon inolaannu udde tawe gunane si'o.

¹³ Napawe i yamiu mangintul᷊i, wala'e manga paal᷊uanna udde manal᷊amatta si yamiu! I mangitou sarun mawul᷊i italla'u anginna wuṛṛu mahangginna ringannu tiupanna paassa sumangngo! Arawe taumata uatullindumma si Ya'u sarun maapussa'a wanua udde wuṛṛu massubba Si ya'u su Wal᷊e-U.”

Ruata naddiandi sarun mangontolla wuṛṛu mapaapian uman-Ne

¹⁴ Piaddu mabbisara, “Pa'ola'e wuṛṛu saddiate lal᷊annu uma-U, rammea'e al᷊awo'u hal᷊ahene.”

¹⁵ Ana waugu ete arendi wisaran Duata Apan Atanggaṛṛanne wuṛṛu na'ukkassa, apan uataṛṛino saran mal᷊annu-l᷊annu, “I Ya'u uatana'a su tampa apan matanggakka wuṛṛu susi, ewe'e lai suwallattu manga taumata apan masaṛṛionto'a wuṛṛu apan sussassillu manga rosane, ipanal᷊i'u atatohassa wuṛṛu antimmi mangitou.

¹⁶ Tawe sarangkal᷊o'enge i Ya'u mapasal᷊an uma-U; tawe saran mal᷊annu-l᷊annu i Ya'u massa'u, tadea'u i mangitou tawe mapaddi apulu naungnge, sumbal᷊i ete i Ya'u apan mabbiakka si mangitou.

¹⁷ Rosan awawal᷊iu mangitou naasa'u si Ya'u, ana waugu udde i mangitou Ta'u niṛṛuumanna wuṛṛu Ta'u nitantangnga. Arawe i mangitou maattikka puane wuṛṛu sidutu mammile lal᷊anne sassane.

¹⁸ I Ya'u naasilote pallal᷊aghun mangitou, arawe i mangitou i Ya'u iapaapia lai. I Ya'u sarun mangehetta wuṛṛu mantul᷊ungngi mangitou wuṛṛu mapaal᷊uassu taumata apan naungnge massusa.

¹⁹ I Ya'u sarun mangonggollu atatammudda su anambon taumata, mawae ete marani aroddi lai marau. I Ya'u sarun mapaapian uma-U.

²⁰ Arawe taumata lal᷊eo uddewe naal᷊ihidda tahal᷊oangnga apan mal᷊ua'a wuṛṛu tawe mal᷊enakka. Saggane mangngapiddu sapadda wuṛṛu labbo.

²¹ Tawe atatammudda su taumata marosa,” wisara Mawu.