YESAYA 56 - WUKE SUSI WATTI'U AL᷊AL᷊USASSA

Anambon walahanna sarun masutta su reengannu umattu Ruata

¹ Mawu nabbisara su uman-Ne, “Pa'ola'e atatul᷊idda wuṛṛu apan uasul᷊ungngu tita-U. Ana waugu tal᷊ang kadio'a lai Ya'u rumanta manal᷊amatta si yamiu wuṛṛu atatul᷊i-U iapal᷊iatta'a.

² I Ya'u mangal᷊amatta taumata apan mallaghun allon Sabat wuṛṛu tawe ma'ola'a rosa su allo udde. Taumata apan tawe ma'ola'a al᷊al᷊eo sarun Ta'u olaanna ringannu mapia.”

³ Taumata raho apan na'ammullu umattu Mawu tawe wotongnge mabbisara, “Mawu tawe namala'u massubba si Tou suaddio'a ringannu uman-Ne.” Taumata apan niwutu tawe wotongnge maṛṛingidda “I ya'u masahadda maola'a reengannu umat-Tu Mawu, ana waugu i ya'u tate maasomba papapulunna.”

⁴ Mawu nabbisara si mangitou, “Amungkangngu i yamiu mallaghun allon Sabatta, amungkangngu i yamiu satia su pa'aire-U wuṛṛu inolaannu maal᷊uassa naung-Ku,

⁵ ne arannu sarun naunganna sulal᷊ummu Wal᷊e-U wuṛṛu suwallattu pabbawala-U. Udde mappianne wuassu uatahuanna manga ana'a esakka wuṛṛu wawine. I yamiu Ta'u onggol᷊annu aranna tawe auddusanne apan tawe abbul᷊iananna.”

⁶ Mawu nabbisara su manga taumata raho iapa nasuttate reengannu umattu Mawu, apan mandangngu Mawu wuṛṛu mattaṛṛamawu si Tou apan mangngaddatta allon Sabatta wuṛṛu matuṛṛutta su pa'aire-Ne,

⁷ “I Ya'u sarun Ta'u iapidda watukku Sion, su wui-U apan susi, wuṛṛu Ta'u onggol᷊annu al᷊al᷊uassa su wal᷊en patataṛṛamawuanna si Ya'u. Manga sasamba apan nionggolli yamiu su mezbah-U sarun Ta'u sengkamanna. Wal᷊e-U sarun isaggo wal᷊en a'al᷊iomanannu anambon walahanna.”

⁸ Ete arendi wisara Mawu Apan Atanggaṛṛanne apan nanguntuddu Israel napul᷊e wuassu pamamuanganna, “I ya'u sarun mangapiddu manga taumata waine tadea marimpul᷊e suaddio'a ringanni mangitou apan naammulle.”

Manga piaṛṛa'u Israel niṛṛuumanna

⁹ Mawu nandolokku manga walahanna waine nirumanta ere winatangnga mal᷊aṛṛaga iapatambo uman-Ne.

¹⁰ Mawu nabbisara, “Manga piaṛṛa'u pabbawala-U uddewe manga taumata wuta! I mangitou waggan apa-apa. I mangitou naal᷊ihidda asu mou apan tawe tumawanna, arawe sidutu mattiilla wuṛṛu mabbal᷊iawa. Lal᷊umanna'a atonna i mangitou mattiilla!

¹¹ I mangitou naal᷊ihidda asu a'ombanganna apan tawe mal᷊aidda. Manga piaṛṛa'a udde tawe maasunna. Sangkatou-sangkatou ma'ola'a walate apulu naungnge wuṛṛu maddea'a auntunganne sassane.

¹² Manga mabbawu'anna udde mabbisara, ‘Wette i ite ma'inumma anggore wuṛṛu ma'inumma sara mawusa! Tiṛṛabbi sarun mappianne wuassu allo indi!’ ”