YESAYA 55 - WUKE SUSI WATTI'U AL᷊AL᷊USASSA

Mawu nangonggollu aakkanna

¹ Mawu nabbisara, “Wette i yamiu sarangkanambone apan marou, pa'inumpe, ua'e nasaddiate. Rantate i yamiu apan tawe uatahuanna roitta, panengkampe gandumma apan tawe bawaekke, wuṛṛu ante! Anggore wuṛṛu susu nasaddiate, sengkampe ringannu tawe bawaekke.

² Apa hunane mamalli sambau saranapa apan tawe maal᷊uassa naungnga, wuṛṛu mammanara hunan apa apan tawe maal᷊aidda? Tuṛṛutte parenta-Ku, ne i yamiu sarun umanna anna apan mapia, wuṛṛu mattemma anna uaimbe apan matemangnga.

³ Paddaringikke, ei pabbawala-U, rantate ringang-Ku, i yamiu sarun Ta'u onggol᷊annu wiakka tutune. Ringannu darangngu wuṛṛu tatuṛṛutta apan pina'ire-U si Daud, i Ya'u nangiittu riandi apan tawe auddusanne si yamiu.

⁴ Mangke atonna, i tou Ta'u itenega piaṛṛa'a wuṛṛu panglima, tialan taṛṛino-U su manga walahanna.

⁵ I yamiu sarun mamaggo manga walahanna waine, wuṛṛu i mangitou sarun dumanta ringanni yamiu, ana waugu i Ya'u, Mawu Ruatanu, Ruata na'ukkassu Israel, ana waugu i Ya'u buatte namantuga si yamiu.”

⁶ Pabbelengke ringannu Mawu tantal᷊anna ta'e wotongnge; pailelarete si Tou tantal᷊anna i Tou ta'e marani.

⁷ Ṛinone taumata lal᷊eo mangapia pabbiaṛṛanne, wuṛṛu mamal᷊u lal᷊annu ṛingidde. Wala'e i tou mabbelengnga ringannu Mawu, wuṛṛu maasomba darangngu-Ne. Ṛinone i tou mabbal᷊i'a ringannu Ruatan kite, ana waugu Mawu mangampungnga ringannu naungnga awasa.

⁸ Mawu nabbisara, “Ṛingirang-Ku wal᷊ine ere ṛingirannu, wuṛṛu lal᷊ang-Ku wal᷊ine lal᷊annu.

⁹ Ere atanggakku langitta wuassu wowon dunia, ete aroddi lai atanggakke ṛingirang-Ku wuassu ṛibgirannu, wuṛṛu lal᷊ang-Ku su su wowon dal᷊annu.

¹⁰ Naal᷊ihidda uranna nangansalla wuassu langitta, wuṛṛu tawe mabbelengnga, ewe'e namokka runia, nanuwukka wuṛṛu napaatuwo manga sasuanna, nangonggollu wuane tadea'u isuanna wuṛṛu annananna,

¹¹ Aroddi lai wisara apan niwisara-U tawe mabbelengnga ringang-Ku ringannu tawe gunane, arawe mahessi maola'a apa apan ipa'apulu-U, wuṛṛu manuungngu al᷊awo'u pandumang-Ku.

¹² I yamiu sarun manantangngu Babel ringannu al᷊al᷊uassa, wuṛṛu iuntudda sumabbangnga ringannu sal᷊amatta. Wowone wuṛṛu wuidda sarun lumuassa wuṛṛu maggio, manga aal᷊uanna su wawail᷊anna mattal᷊o'appu lima.

¹³ Alu cemara sarun mangganti aputta ṛoaanna sasuanna bunga mangganti manga pal᷊ampungnga. Udde mariaddi tadea'u i Ya'u tumelengnga; maola'a tatiala sarangkal᷊o'enge apan tawe mawul᷊i.”