YESAYA 54 - WUKE SUSI WATTI'U AL᷊AL᷊USASSA

Darangngu Mawu su Israel

¹ Yerusalem, dorone i'o naal᷊ihidda wawine tinna apan tawe wotongnge manungkangnga. Arawe orassa indi paggiote, wuṛṛu pangantarite ringannu lulluassa! Ana waugu manga anangngu marasai nilumebbe wuassu ana'a wawine apan tawe nitantangngu awingnge.

² Tambaite ahewallu manga rasanna atatanaannu; lo'engke manga tal᷊ine wuṛṛu tohasse manga pasa'e!

³ I'o sarun aatambanna ahewalle watukku aikkatanna ara'e lai aiṛṛi, tumanangngu sarun mangintaṛṛe su leta'u manga walahanna wuṛṛu matana'a su manga soa apan orassa indi mal᷊annabba.

⁴ Arie pa'ata'utta, i'o sarun tawe pansilianna; tawe aal᷊uandahanna wuṛṛu tappissi'anna. I'o sarun maabul᷊i lal᷊awangngu sutempo ta'e dario'a; tate mannaungnga lai mabbiakka sassane ere inawal᷊uanna.

⁵ Mandariaddinu naola'a ere awingngu, Ruata na'ukkassu Israel uddewe Mananal᷊amannu. Mawu Apan Lembontaṛṛino, uddewe aran-Ne, i Tou Ruata uataṛṛino ahewallu runia.

⁶ Israel, i'o naal᷊ihidda sangkatou awingnga maṛṛuala apan massusa ana waugu nitantangngu iamangngu ana'a. Arawe Ruata namaggo si'o apia wuṛṛu nabbisara,

⁷ “Tumba'u tal᷊angkadio'a i Ya'u manantangngu ringannu napenen darangngu i'o Ta'u al᷊apanna apia.

⁸ Tumba'u tal᷊angkadio'a i Ya'u manantangngu ana waugu asasa'u-U apan bahewalla. Arawe ringannu darangngu tutune i Ya'u mandangngu si'o.” Ete aroddi wisaran Duata Mananal᷊amannu.

⁹ “Ere sutempo i Nuh i Ya'u maddiandi manungku manawangnga wahewalla tate lai mangammon dunia, aroddi lai orassa indi Ya'u maddiandi manungku i Ya'u tate masa'u ara'e mamansaggi yamiu apia.

¹⁰ Salaiwe manga wowone manga wuidda umio'a, i Ya'u tawe illol᷊one tumal᷊antummu. Pa'airen paddarame-U sidutu Ta'u aggasanna,” wisara Mawu apan mandangngu si'o.

Yerusalem apan bakku

¹¹ Mawu nabbisara, “Ei Yerusalem, soa apan nial᷊al᷊eoanne, i'o tawe maail᷊ore wuṛṛu tawe mallal᷊imbanne. Manga mal᷊itangngu indete iaddo-U apia, ringannu manga watu apan maarega.

¹² Manga tanda batu Ta'u iapararisikka wuassu watun delima, manga ngara pasallangannu ahewalla wuassu watu permata, manga darandungngu wuassu ratna mutu manikam.

¹³ Anambon tumanangngu nabbal᷊i mallal᷊aṛṛenggeng-Ku, i mangitou sarun tawe su awussa ewe'e su lal᷊umanna'a.

¹⁴ I'o niapararisikki su wowo mal᷊ita'u atatul᷊idda, niapaarau wuassu atata'utta wuṛṛu pangangallanga.

¹⁵ Napawe i'o pangaloanna, wal᷊inewe i Ya'u apan nandolokka, salaiwe isai mamangalo si'o sarun manawo.

¹⁶ Ete i Ya'u apan na'ola'a mananassalla apan mangngalabba putungnga ipanassalla lutangnga. Ete i Ya'u lai apan na'ola'a tantara apan mappa'attu lutangnga udde ipamate.

¹⁷ Arawe suapan lutangnga apan nisassalla ipando'appa si'o, sarun tawe ma'apate. Wuṛṛu suapan a'ansilla sulal᷊ummu pallaṛṛuungnganna sarun iapasingkannu nassal᷊a. I Ya'u sarun mangonggollu auntunganna su manga allang-Ku,” etearoddi wisara Mawu.