YESAYA 50 - WUKE SUSI WATTI'U AL᷊AL᷊USASSA

¹ Mawu nabbisara su Israel, “Ei uma-U, sunnanu i Ya'u mallimbuakka si'o naal᷊ihidda sangkatou esakka mallimbuakka awingnge? Amungkangngu aroddi, suapa surattu sindo? Sunnanu i Ya'u mabbalungngu, ere sangkatou iamangnga nabbal᷊u'u anangnge ipamaekka awallassa? Wal᷊ine! I'o niatawanna wuṛṛu niwuangnga, ana waugu rosa wuṛṛu al᷊al᷊eonu sassane!

² Anio wuassu uma-U tawe saran sangkatou sinumimbakka, sutempo i Ya'u mammaggo si mangitou? Apa i mangitou mal᷊annabba ana waugu massunna i Ya'u tawe mapaamallossa wuṛṛu maapanal᷊amatta si mangitou? Atonna-tonna, wuassu parenta-Ku tahal᷊oangnga nabbal᷊i mamara, manga sal᷊ukka Ta'u niola'a wadda'u anne, na'oman sara manga inassa nate wuṛṛu hal᷊urune mawukku'a.

³ Langitta Ta'u niola'a ma'itumma marandumma, i Ya'u nana'appa udde naal᷊ihidda ringannu nasan lallal᷊o.”

Tatuṛṛuttu allangngu Mawu

⁴ Mawu Apan Atanggaṛṛanne mangngaṛṛa'a si ya'u mabbisara, tadea'u wisara'u maatohassa taumata apan su al᷊allome. Suapan marua allo mannohassa naungku tadea'u maddaringikka al᷊aṛṛang-Ne si ya'u.

⁵ Mawu nangonggollu pasasunna si ya'u; i ya'u tawe lumawangnga ara'e tinumal᷊iudda si Tou.

⁶ I ya'u nangonggollu liu'u su taumata apan mamuulla si ya'u; wuṛṛu wambala'u su taumata apan mangabutta omengku. I ya'u tawe nallinda'u hati'u sutempo i ya'u haggeloanna wuṛṛu a'adduanna.

⁷ Ana waugu Mawu Ruata nantul᷊ungku, ne i ya'u tawe nipansilianna. I ya'u mannohassa naungku tadea'u masabbare; i ya'u masingkatta manungku i ya'u tawe pansilianna.

⁸ Ana waugu Ruata marani, i Tou namasingkatta i ya'u tawe sal᷊ane. Isaite apan maapulu matatiakka ringangku? Wette i ite rumante suadio'a. Isaite apan lumawangnga si ya'u? Doloṛṛa'e i tou mangundani'u.

⁹ Atonna, Mawu Apan Atanggaṛṛanne mannamba'a si ya'u, isai waṛṛani mabbisara manungku i ya'u nassal᷊a? Sarangkanambone apan mangngansilla si ya'u sarun mawul᷊i naal᷊ihidda laṛṛeme niannu wa'u'a.

¹⁰ Ei i yamiu apan mangngaddatta Mawu, wuṛṛu maddaringikka wisaran allang-Nge, lal᷊anna apan amatanni yamiu asinungka marandumma, wuṛṛu tawe semakka apan mannemakka si yamiu; arawe pangimante Mawu; pangunsandakke su Ruatanu.

¹¹ Ei i yamiu apan mappandumma manilaka taumata waine, i yamiu sarun pateannu ṛiinni yamiu sassane. Ete Mawu apan ma'ola'a udde matipussa, i yamiu sarun sansaranna ringannu mawakkatta.