YESAYA 5 - WUKE SUSI WATTI'U AL᷊AL᷊USASSA

Antari su ola'u hawe'u wuṛṛu waillu anggorene

¹ Paddaringikke antari'u su ola'u waillu anggoru hawe'u. Hawe'u uatahuanna waillu anggore su welen buidda apan masuwukka.

² I tou mammasolla letangnge wuṛṛu mandamme manga watune. I tou nassuannu anggore apan nipilene i tou napararisikku wal᷊en matanggakka pandiagganna. I tou naal᷊i sambau loṛṛangnga tampa pamakkannu anggore, ana see i tou naṛṛaddo wuane mal᷊aha arawe wuane ewe'e anggore apan mapakkadda.

³ Nariaddi orassa indi hawe-U mabbisara, “I yamiu sarangkanambone, tumana'u Yerusalem wuṛṛu Yehuda, ṛuunga'e waillu anggore-U wuṛṛu i Ya'u.

⁴ Apate lai apan sarun Ta'u olaanna, arawe taambe Ta'u niola'a su waillu anggore-U udde? Anio wua mapakkadda apan niapasabbangnge, wal᷊inewe wua mapia ere apan a'antimang-Ku?

⁵ Arendi Ta'u paddul᷊iananna waillu anggore-U udde: Paggalla apan uapal᷊iwutta sarun Ta'u sawutanna, tanda'a apan ual᷊indumma wailla udde sarun Ta'u iṛṛa'a, ana see Ta'u iwala winatangnga mal᷊aṛṛaga mandusa wuṛṛu makkinda wailla udde.

⁶ I Ya'u sarun mamalane tuwoannu ahuranganna waine. Punnu anggorene tawe Ta'u tontoanna, wuṛṛu tawe Ta'u wabbasanna. Ewe'e Ta'u iwala tataapannu ahuranganna ṛoaanna wuṛṛu nannal᷊o, ewe'e lai manga winabbawa Ta'u isingadda mangema'u uranna su wailla udde.”

⁷ Ana waugu waillu anggoru Mawu Apan Lembontaṛṛino uddewe umattu Israel, wuṛṛu manga taumatan Yehuda uddewe punnu anggore apan nisuan-Ne. Wuassi mangitou i Tou uaantimma atatul᷊idda, arawe tumba'u pia araṛṛagissa. I Tou uaantimma i mangitou mandisikku apapia, arawe tumba'u pia sasal᷊iomanna maddorongnga atatul᷊idda.

Al᷊al᷊eo apan niola'u taumata

⁸ Nasilakate i yamiu apan namalli manga wal᷊en wuṛṛu nangaṛṛo manga wailla ipanimu darotongngu! Tate mal᷊annu lai masuete tampan taumata waine wuṛṛu ete i yamiu apan matana'a su wanua udde.

⁹ I ya'u ma'aringikka Mawu Apan Lembontaṛṛino nassalu, “Manga wal᷊en apan bahewalla wuṛṛu mapia indi sarangkanambone sarun mahangginna tawe lal᷊oṛṛone.

¹⁰ Hessin bawail᷊anna tawe maola'a, waillu anggore apan ahewalle mapul᷊o hektare tumba'u nangonggollu wuane mapul᷊o litere anggore. Maṛṛasutta su literene wualanna tumba'u nangonggollu wuane mapul᷊o litere gandumma.”

¹¹ Nasilakate i yamiu! Wuassu rua'allo maddatingngu ṛabbi manaranu tumba'u ma'inumma ua'e ma'awu'anna wuṛṛu mabbu'anna.

¹² Su manga andeangnga pia tingikku kecapi, gambus, rebana wuṛṛu wansi see lai anggore. Arawe i yamiu tawe mandeengngu manaran Mawu wuṛṛu apa apan a'olaan-Ne.

¹³ Ana waugu udde uma-U apan waggan napa sarun ehetanna inai maola'a taumata niatawanna. Manga mamamiaṛṛa'a wuṛṛu tumana'u soa sarun mate amal᷊unusanna wuṛṛu amarouanna.

¹⁴ Loṛṛangngu papate nawu'ate mal᷊oa-l᷊oangnga ipangalluppa manga taumata piaṛṛangnge su Yerusalem ringannu tumana'u soa apan maddea su andeangnga udde.

¹⁵ Suapan taumata sarun pansilianna, wuṛṛu iapa mawunga sarun iapawawo.

¹⁶ Arawe Mawu Apan Lembontaṛṛino namasilon awawantu-Ge ringannu ma'ola'a manara apan atonna. I Tou sarun mamasilon asasusi-Ne ringannu makkuungngu walahanna.

¹⁷ Su winal᷊alannu soa ana'u ambingnga wuṛṛu domba sarun umanna nannalo wuṛṛu tawe asueannu pabbawiakka.

¹⁸ Nasilakate i yamiu apan tawe illol᷊one ma'ola'a rosa!

¹⁹ Wisaranu, “Wala'e Mawu Ruata susin Israel mal᷊ihakka ma'inolaanna! Wala'e i Tou mapaamattu ṛiin-Ne, tadea'u i ite maasilo wuṛṛu maasingkatta.”

²⁰ Nasilakate i yamiu apan mammal᷊elongngu apapia wuṛṛu al᷊al᷊eo, apan marandumma wuṛṛu masemakka, apan mapetta wuṛṛu matemangnga!

²¹ Nasilakate i yamiu apan mammendamma watangannu pande wuṛṛu lembon masingkatta!

²² Nasilakate i yamiu apan pande ma'inumma anggore! I yamiu apan waṛṛani wuṛṛu pande mallo'an ua'e ma'awu'anna!

²³ Arawe tumba'u ana see maasomba roitta sasoggokka, i yamiu namallossu taumata nassal᷊a, wuṛṛu mammal᷊aatta taumata tawe sal᷊ane apan maddea'a atatul᷊idda.

²⁴ I yamiu buatte nanol᷊a'u al᷊aṛṛa'u Mawu Apan Lembontaṛṛino, wuṛṛu mallobbossa parentan Duata susin Israel. Ana waugu udde, naal᷊ihidda laṛṛami wuṛṛu nannal᷊o mamara nasue natutungnga sulal᷊ummu putungnga, aroddi lai manga ṛamunnu sarun mabbal᷊i mawukku'a, manga wunganu maṛṛagassa wuṛṛu masue italla'u anginna.

²⁵ Mawu nasa'u su pabbawala-Ge. I Tou nariahite makkuumanni mangitou. Manga wowone sarun umio'a; manga winal᷊unanna uatal᷊eṛṛonga naal᷊ihidda sapadda su manga lal᷊anna. Arawe Mawu ta'e massa'u wuṛṛu sidutu sarun makkuumanna.

²⁶ Mawu sarun mamaggo walahanna apan marau wuṛṛu i mangitou sarun dumanta ringannu mal᷊ihakka!

²⁷ I mangitou sidutu uasaddia mapapangalo wuṛṛu tawe mamendamma lotakka. I mangitou lumobba matane ara'e aamatiil᷊anna.

²⁸ Anaanne maṛṛoro wuṛṛu al᷊ati'anne nasaddiate mamiti'a. Anu'un awal᷊one aatikke ere watu putungnga, wuṛṛu bolan keretane tuttal᷊inggi ere anginna al᷊isusu.

²⁹ Manga tantarane mammaṛṛo ere singa apan wakkute nanametta sinangngone, see tinal᷊angnge, wuṛṛu taweddu maapallossa.

³⁰ Su allo udde su ahewallu Israel niaringikka hahuressa ara'e hiom pangalo aikkanne ere lua'a mabbasse. Pa'ellege, ahewallu wanua udde marandumma wuṛṛu napenen asasuṛṛippitta. Asasemakka naola'e wasa tuudda.