YESAYA 48 - WUKE SUSI WATTI'U AL᷊AL᷊USASSA

Ruata uataṛṛino sutempo addantane

¹ Paddaringikke, ei papapulunni Yakub, papapulunni Yehuda apan mappa'attu arannu Israel, naudde i'o mangnga'u Ruatan Israel, wuṛṛu massalu ringannu arannu Mawu. Arawe manga wisaranu udde tawe suṛṛinone.

² Salaiwe aroddi, i'o mangnga'u ringannu mal᷊uassa manungku i'o tumana'u soa na'ukkassa; wuṛṛu manungku i'o uaantimma Ruatan Israel apan isassaggo Mawu Apan Lembontaṛṛino.

³ Mawu nabbisara, “Paddaringikke, ei Israel! Apa apan nariaddi dorone, mal᷊annute Ta'u niwal᷊o; apa apan niwisara-U, aṛṛombanganne olaang-Ku wuṛṛu Ta'u iapal᷊iatta'a.

⁴ I Ya'u masingkatta manungku naungngu maattikka, pua maattikka wuṛṛu puane watu.

⁵ Ne ro'en dorone i Ya'u buatte nani'atta; tantal᷊anna taambe nariaddi, buatte Ta'u niapasingkatta, tadea'u i'o arie mabbisara manungku udde inolaannu manga paal᷊uanna sassubbannu.

⁶ Anambon nubbua-U apan niaringiṛṛannu natipusse; i'o ṛinone manga'u manungku wisara-U udde atonna. Orassa indi Ya'u mamasingkattu manga inolaanna apan bakku, manga addapingnga apan ta'e awaganannu.

⁷ Wakkute orassa indi Ya'u nandiandi udde wuṛṛu wal᷊ine dorone; taambe saran paassa i'o naaringikka hatto udde, tadea'u i'o tawe maawisara, manungku i'o masingkattu al᷊awo'a.

⁸ I Ya'u masingkatta i'o tawe apangimananna, ro'en dorone i'o tinumelengnga mapontol᷊osanna. Ana waugu udde i'o waggan olangnge udde, tawe sampaddi wisara apan na'oma su tal᷊inganu.

⁹ I Ya'u naṛṛaddannu asasa'u-U tadea'u arang-Ku tumelengnga. I Ya'u naṛṛaddannu udde si'o, tadea'u i'o tawe ṛaddaanna.

¹⁰ I Ya'u maddalo Si'o sulal᷊ummu putungngu asasusa, ere sal᷊a'a apan niwaresi su auntapanna.

¹¹ Udde Ta'u niola'a hunan batangang-Ku sassane, ana waugu i Ya'u tawe mamalan arang-Ku lal᷊eoanna; awawantu-U tawe tahiang-Ku sisai-sai.”

Kores, piaṛṛa'a nipile Mawu

¹² Mawu nabbisara, “Paddaringikke Israel, umatta apan niwagoang-Ku, i Ya'u sidutu Ruatanu. Ete i Ya'u paarorone, wuṛṛu i Ya'u lai panguddusanne.

¹³ Lima-U nangaddon mal᷊ita'u runia wuṛṛu namil᷊attu winalanganna. Napawe i Ya'u mamaggo aranne, ringannu mal᷊ihakka i mangitou rumanta.

¹⁴ Paammulle i yamiu sarangkanambone wuṛṛu paddaringikke! Suwallattu manga monganna taweddu maasi'tta manungku taumata nipile-U sarun mamangalo Babel; i tou sarun mapaamattu apulu-U.

¹⁵ Ete i Ya'u apan nabbisara wuṛṛu namaggo si tou, apan nangehetta si tou na'oman sara i tou naasomba ul᷊ene.

¹⁶ Rantate marani-U wuṛṛu paddaringikke, ro'en dorone i Ya'u mabbisara ringannu masemakka; wuṛṛu wisara-U sidutu Ta'u a'olaanna lumiatta'a.” Orassa indi Mawu Ruata nandolo'u wuṛṛu nangonggolla si ya'u taṛṛino-Ne sassane.

Ṛiinnu Mawu su uman-Ne

¹⁷ Wisaran Duata susi Israel, Mananal᷊amannu, “Ete i Ya'u Mawu Ruatanu, apan mangngaṛṛa'u apa apan mahuna si'o, wuṛṛu nangehetta si'o su lal᷊anna apan amatannu.

¹⁸ Unnuwisara i'o maddaringikka manga parenta-U, ne lal᷊umannangu naal᷊ihidda sal᷊ukka apan tawe mamara, wuṛṛu auntungannu ere lua'a su tahal᷊oangnga apan tawe illol᷊one.

¹⁹ Pallaṛṛitenu sarun maola'a ere anambon anne; i Ya'u mallu'adda si mangitou ma'oman sara tawe pateanna.”

²⁰ Roote wuṛṛu tal᷊angke su Babel, al᷊iata'e watti'a indi su al᷊awo'u tampa. Pasingkata'e ringannu aintul᷊in al᷊al᷊uassa: “Mawu buatte nanal᷊amatta Israel, allang-Nge!

²¹ Sutempo i Tou namiaṛṛa'i mangitou su wadda'a mamara, i mangitou tawe naaṛṛaddannu rou. Mawu nama'a wowone watu wuṛṛu napa'elekku ua'e, wuassu watu udde sinumabbangnga ua'e huna mangitou.

²² Tawe asasal᷊amatta su taumata lal᷊eo,” etearoddi wisara Mawu.