YESAYA 46 - WUKE SUSI WATTI'U AL᷊AL᷊USASSA

¹ Eteindi panguddusannu manga mongannu Babel; dorone paal᷊uanni Bel wuṛṛu Nebo sassubbanna, arawe orassa indi niandangnga su liuddu winatangnga, maola'a winabbawan winatangnga apan nal᷊otakke.

² Manga paal᷊uanna udde tawe matottolla mantul᷊ungngu mamamasanne, i mangitou sassane niapidda naola'a niatawanna. Eteudde panguddusanni mangitou.

³ Paddaringikke si Ya'u, ei papapulunni Yakub, i yamiu sarangkanambone lambene wuassu uma-Ku. I Ya'u buatte nappaddul᷊i si yamiu ro'en i yamiu niasungkanga.

⁴ I Ya'u sidutu Ruatanu maddatingngu i yamiu matimmadde; wuṛṛu sidutu ual᷊u'adda si yamiu ma'oman sara i yamiu owananna. I Ya'u nandiaddi si yamiu wuṛṛu sidutu uapaddul᷊i si yamiu, i Ya'u sarun mantul᷊ungnga wuṛṛu manal᷊amatta si yamiu.

⁵ Ringanni sai i yamiu mappulu manumanding-Ku? Apa piaddu wotongnge isul᷊ungnga si Ya'u?

⁶ Taumata mammu'a dompetta wuṛṛu napasabbangu wul᷊awanne, ana see nanimbangu sal᷊a'ane su timbanganna. I tou nanewa pande ma'ola'a wul᷊awanna niapaola'a paal᷊uanna sassubbanna, wua'udde i tou massubba paal᷊uanna niolangnge.

⁷ Paal᷊uanna udde nipa'u wuṛṛu niaddo su tampane, i tou uarisikka isudde wuṛṛu tawe mapangingkatta. Amungkangngu taumata umal᷊iomanna si tou, i tou tawe sumimbakka, wuṛṛu tawe mapaanal᷊amatta si tou wuassu asasusane.

⁸ Naungete wuṛṛu ṛingira'e, ei manga taumata mapontol᷊osanna!

⁹ Naungete manga apan nariaddi sutempon dorone; panga'ute manungku i Ya'u Ruata, wuṛṛu tawe baine, i Ya'u Ruata, wuṛṛu taweddu ere i Ya'u.

¹⁰ Wuassu panattaṛṛanne i Ya'u namasingkattu manga apa apan sarun mariaddi sal᷊immurine, ro'en dorone i Ya'u mabbatti'a apa apan sarun mariaddi. Manga wisara-U: Putusang-Ku sarun maola'a, apulu-U sarun Ta'u olaanna!

¹¹ I Ya'u namaggo sangkatou tembonanne wuassu ra'i i tou nirumanta ere sambau manu'u winalanganna apan mal᷊aṛṛaga su mapaamattu putusang-Ku. Apa apan Ta'u niwisara udde sarun Ta'u manaranna, wuṛṛu apa apan Ta'u ilakkiinna sarun Ta'u olaanna.

¹² Paddaringikke si Ya'u, ei manga taumata mawunga, i yamiu apan massunna manungku auntunganna ta'e marau.

¹³ I Ya'u sarun maranin allon pamallosanna asasal᷊amatta apan i Ya'u ionggolla tate lai masoṛṛotta. I Ya'u sarun manal᷊amatta Yerusalem, wuṛṛu mangonggollu awawantuga su Israel.”