YESAYA 45 - WUKE SUSI WATTI'U AL᷊AL᷊USASSA

Mawu naneneggi Kores

¹ Mawu buatte namile si Kores maola'a ratu; i tou nitebbo'a iapawaddo manga walahanna wuṛṛu ipamaddi taṛṛinon manga ratu. Mawu sarun mamu'a manga ngaran soa si tou, tawe saran sambau apan nallambe uaṛṛuudda. Ete si tou Mawu nabbisara,

² “i Ya'u sarun manaddia lal᷊annu; wowone wuṛṛu wuidda sarun Ta'u iratakka, manga ngara witu'a sarun Ta'u pesanganna, wuṛṛu manga papal᷊e atta'a sarun Ta'u paddianna.

³ Ne i'o sarun Ta'u onggol᷊annu darotongnga pa'aala apan uawuni, tadea'u i'o maasingkatta ete i Ya'u Mawu, Ruatan Israel, apan buatte namaggo si'o su arannu.

⁴ I'o Ta'u niwaggoanna wuṛṛu Ta'u nionggol᷊annu aranna, salaiwe i'o tawe maaillal᷊a si Ya'u. I'o Ta'u iapamanara mantul᷊ungngu Israel allang-Ku, ana waugu i mangitou walahanna nipile-U.

⁵ Ete i Ya'u Mawu, tawe baine, i Ya'u Ruata apan tinggassa. I'o buatte Ta'u nionggol᷊annu ahidda, salaiwe i'o tawe maaillal᷊a si Ya'u.

⁶ Sarangkanambone udde Ta'u olaanna tadea'u wuassu ra'i maddatingngu waṛṛatta anambon taumata masingkatta manungku ete i Ya'u Mawu, tawe mawu waine tumba'u i Ya'u.

⁷ Ete i Ya'u apan nandiaddi asasemakka wuṛṛu ararandumma, i Ya'u mandatan al᷊amatta wuṛṛu asasilaka. Ete i Ya'u Mawu apan na'ola'a sarangkanambone udde.

⁸ Wuassu langitta i Ya'u nanossokku auntunganna ere uranna, runia namu'a watanganne ipanengkamma, ana see napatuwon asasal᷊amatta wuṛṛu apapallossa; i Ya'u Mawu apan na'ola'a udde nariaddi.”

Mawu uataṛṛino ul᷊ilim pati'uppa wuṛṛu nangatokku watti'a

⁹ Nasilakate taumata apan uatatiakku Mandariaddine; i tou naal᷊ihidda urinna apan nilumawangnga taumata mallal᷊anginne. Apa leta'a maddeetta maiwal᷊o su mandarunna urinna, “Ma'urate i'o?” Apa urinna sussal᷊iomanna manungku ma'aolangnge tawe asingkatta?

¹⁰ Nasilakate taumata apan mabbisara hagurangnge, “Anio i ya'u nisungkangnga arendi?”

¹¹ Mawu, Ruata na'ukkassu Israel nabbisara, “Pa'iwal᷊ote si Ya'u su ola'u tempo addantane. Arawe arie maiwal᷊o ola'u manga ana-U, ara'e mandolo-U ma'ola'a manga apa.

¹² Ete i Ya'u Mawu apan nandiaddi runia, wuṛṛu nandiaddi taumata mamanua isudde. Ringannu taṛṛino-U i Ya'u namilattu langitta, wuṛṛu namarenta matannallo, wul᷊anna wuṛṛu manga anumpitanna.

¹³ Ete i Ya'u apan nangal᷊oren Kores iapaamattu pandumang-Ku wuṛṛu mamasi'u atatul᷊idda. I Ya'u apan sarun maparatakku anambon dal᷊anna apan amatanne. I tou sarun mapararisikku api soa-U Yerusalem wuṛṛu mamallossu uma-U apan niatawanna, ringannu tawe doitta nionggolla wuṛṛu tawe bawaekke.” Mawu Apan Lembontaṛṛino buatte nabbisara.

¹⁴ Mawu nabbisara su Israel, “Tahuanete hessin leta'u Mesir wuṛṛu auntungannu Sudan. Manga taumatan Syeba apan waṛṛani mabbal᷊i pussa'anu; i mangitou u'amatta su liuddi yamiu ringannu laṛṛapusanna. I mangitou sarun massubba wuṛṛu manga'u, ‘Ruata atonna-tonna su pattangngannu; tawe mawu wal᷊ine tumba'u i Tou!

¹⁵ Ruata apan nanal᷊amatta Israel uddewe Ruata apan mammunin batangan-Ne.

¹⁶ Anambon taumata apan mallanginnu paal᷊uanna sassubbanna; sarun pansilianna wuṛṛu al᷊uandahanna.

¹⁷ Arawe Israel niapasal᷊amattu Mawu; asasal᷊aman-Ne sarun mattaṛṛangnga. I ya'u sarun tawe pansilianna wuṛṛu al᷊uandahanna saran mal᷊annu-l᷊annu.’ ”

¹⁸ Ete Mawu apan nandiaddi langitta, Ete i Tou Ruata! Ete i Tou nandiaddi wuṛṛu namungkangu runia, niola'a matohassa wuṛṛu sidutu uarisikka. I tou tawe na'ola'a sambau tampa apan mal᷊anna-l᷊annaba, arawe tampa apan atatanaanna. Ete i Tou apan nabbisara, “Ete i Ya'u Mawu, wuṛṛu taweddu bal᷊ine.

¹⁹ I ya'u tawe mabbisara ringannu iwabbuni, ara'e iaaddapingnga. Ya'u tawe nandolokku uma-U Israel maddea'a si Ya'u ringannu tawe gunane. I Ya'u, Mawu, mabbisara atonna, wuṛṛu mammasingkattu apa apan naṛṛino.”

Mawu Apan Lembontaṛṛino wuṛṛu manga mongannu Babel

²⁰ Mawu nabbisara, “Paasemodde wuṛṛu rantate suadio'a, i yamiu sarangkanambone apan nal᷊iu wuassu manga walahanna! Woddowe eteapa manga taumata apan mangngopassa paal᷊uanna alu, ara'e u'al᷊iomanna su manga monganna apan tawe maapanal᷊amatta.

²¹ Alaea'e hattonu, apira'e manga tatialane, ore, wala'e i mangitou ma'ire su sambau. Isaite apan nabbal᷊on olangnge udde wuṛṛu namasingkatta ro'en paarorone? Wal᷊inewe i Ya'u, Mawu? Tawe mawu wal᷊ine tumba'u i Ya'u. Ya'u Ruata apan matul᷊idda wuṛṛu Mananal᷊amatta, tawe baine tumba'u i Ya'u!

²² Ei, anambon tumana'u runia, pabbelengke ringang-Ku tadea'u i yamiu iapaasal᷊amatta, ana waugu tumba'u i Ya'u Ruata, tawe baine!

²³ I Ya'u buatte naddiandi, wuṛṛu riandi-U tawe mawal᷊u; ringannu arang-Ku sassane i Ya'u massalu: Suapan taumata apan umal᷊intudda su saruang-Ku, wuṛṛu sulal᷊ummu wahasane sassane naddiandi sidutu satia si Ya'u.

²⁴ Manga taumata sarun mabbisara, ‘Atatul᷊idda wuṛṛu atatohassa tumba'u wuassu Mawu!’ Anambon taumata apan maddanting-Ku sarun rumanta ringang-Ku wuṛṛu pansilianna.

²⁵ Arawe papapulunni Yakub sarun iapaasal᷊amatta, wuṛṛu i mangitou sarun maddalo si Ya'u, Mawu.