YESAYA 44 - WUKE SUSI WATTI'U AL᷊AL᷊USASSA

Mawu , Ruata Apan Tinggassa

¹ Mawu nabbisara, “Paddaringikka, ei Yakub allang-Ku, ei Israel, umatta nipile-U!

² Ete i Ya'u Mawu apan nandiaddi si'o, apan na'ola'a si'o ro'en ta'e su illoṛṛo, wuṛṛu apan nangontolla si'o. Arie pa'ata'utta, ete i'o allang-Ku, umatta nipile-U apan arangnguang-Ku.

³ Ana waugu i Ya'u sarun mandal᷊innu ua'e su leta'a apan mamara, wuṛṛu mapa'elekku manga sal᷊ukka su leta'a apan naṛṛangngitta. I Ya'u sarun mangonggollu taṛṛino-U su papapulunnu, wuṛṛu mangal᷊amatta pallaṛṛitenu.

⁴ I mangitou sarun tumuwo masuwukka ere wal᷊abbukka maranin kua'e, naal᷊ihidda punnu alu gandarusa su wiwikku sal᷊ukka.

⁵ Sangkatou-sangkatou sarun manga'u watanganne pussa'a-U, wuṛṛu rumanta maammulla ringannu papapulunni Yakub. Sangkatou-sangkatou mammoṛṛetta su limane: Pussa'a Mawu, wuṛṛu mannaggon batanganne umattu Ruata.”

⁶ Eteindi wisara Mawu Apan Lembontaṛṛino, Ratu mallal᷊u'adda Israel, “I Ya'u Ruata Apan Tinggassa, apan paarorone wuṛṛu panguddusanne.

⁷ Isaite ere i Ya'u? Doloṛṛa'a i tou manga'u! Wala'e i tou mamasingkatta wuṛṛu mapal᷊iatta'a si Ya'u! Isaite buatte nani'attu tempo addantane ro'en paarorone maddatingngu panginsueannu tempo?

⁸ Pabbawala-U, arie mata'utta ara'e ṛumindu'a; wal᷊inewe ro'en dorone naddatingngu orassa indi i Ya'u buatte nani'attu apa apan mariaddi? Ete i yamiu manga tiala-U. Mallal᷊u'adda waine tawe baddi'a wuṛṛu i Ya'u tawe maaillal᷊a.”

Massubba paal᷊uanna uddewe inolaanna lal᷊eo

⁹ Manga taumata apan nallanginnu paal᷊uanna sassubbanna udde tawe gunane, wuṛṛu manga monganna apan raddaloanni mangitou tawe mangal᷊ene. Manga taumata apan massubba paal᷊uanna udde wuta wuṛṛu waggan napa, ana waugu udde i mangitou sarun masili.

¹⁰ Tawe gunane mallanginnu paal᷊uanna iwoso wuṛṛu masubba si tou naola'a monganna!

¹¹ Atonna, anambon taumata apan massubba paal᷊uanna sarun masili. Taumata apan nallanginnu paal᷊uanna udde taumata ere i ite. Doloṛṛa'e i mangitou dumarisikka suadio'a; i mangitou sarun matta'utta wuṛṛu masili.

¹² Mananassalla nanganu sampoto atta'a ana see niola'a sulal᷊ummu putungnga wuṛṛu nisassallu darupa. I tou ma'ola'a ringannu anambon ikkanne apan pia si tou. Tantal᷊anna mammanara, i tou niamal᷊unusanna, wuṛṛu nal᷊otakke.

¹³ Basen kalu mangnguukka alu. I tou nanggambaru atokke ringannu apukka, nanguitta ringannu manga olangnge wuṛṛu nallanginnu paal᷊uanna taumata apan maṛṛamaga wua'udde niaddo su wal᷊ene.

¹⁴ Asinungka alu apan nipaatta udde alu cemara, eru ara'e terpentin apan nituwangnga su mahurangnge. Asinungka lai i tou nassuannu alu salam see niṛṛaddoanna uranna na'oman sara i tou tinumuwo.

^15-17 Sambageanganna wuassu alu udde niola'a alu paningiṛṛanna wuṛṛu pinallol᷊o roti wuṛṛu pinattapa ṛemessa, se'e i tou nal᷊aidde. I tou manningikka wuṛṛu nabbisara, “Uare, atemangngawe eteapa wuṛṛu asal᷊ihamma! Atonna mangke ma'al᷊uassa putungnga indi!” Lamben kalu udde nipa'anne ipallanginnu paal᷊uanna. I tou uaaruutta massubba udde wuṛṛu niumal᷊iomanna, “Ete i'o mawu'u, paasal᷊amata'awe i ya'u!”

¹⁸ Tumaniten boddo manga taumata ereudde! I mangitou mannutubbu mata wuṛṛu naungngi mangitou na'oman sara tawe maasunna manga apa.

¹⁹ Ma'aola'a paal᷊uanna udde tawe na'oma maṛṛingidda, “Alu udde sambageanganna tutungangku, wuṛṛu waṛṛane ta'u ipaatta ipallol᷊o roti wuṛṛu ipattapan ṛemessa maola'a wia'u. Ana see lamben kalu udde ta'u niola'a paal᷊uanna. Nariaddi orassa indi i ya'u massubba alu sangkabbuwu!”

²⁰ Inolaanna udde nassul᷊ungngu niumanna awu. Taumata udde nial᷊iwun ṛingiranne apan boddo, na'oman sara i tou tate iatul᷊ungnga lai. I tou tawe maapanga'u manungku paal᷊uanna apan su limane udde tumba'u wawahia.

Mawu mandariaddi wuṛṛu Mananal᷊amatta

²¹ Mawu nabbisara, “Naungete sarangkanambone indi, ei Israel, ana waugu ete i'o allang-Ku. I Ya'u nandiaddi si'o, wuṛṛu i'o allang-Ku, Israel, i Ya'u sarun tawe maabbul᷊inu!

²² Pasasal᷊anu Ta'u limbuaṛṛanna ere winabbawa, rosanu Ta'u iapasal᷊iu ere abbunga. Pabbelengke ringang-Ku, ana waugu i Ya'u buatte namallonnu!”

²³ Paggiote ringannu al᷊al᷊uassa, ei langitta, paggiote, ei wantan dunia! Paggioten lal᷊uassa, ei manga wowone! see lai mahurangnge wuṛṛu suapan punnu alu sulal᷊umme! Ana waugu Mawu buatte napal᷊iatta'u awawantu-Ge ringannu nanubbussa Israel uman-Ne.

²⁴ Etearendi wisara Mawu Mananal᷊amannu apan nandiaddi si'o ro'en ta'e sulal᷊ummu illoṛṛo, “Ete i Ya'u Mawu apan nandiaddi al᷊awo'a, apan sassane namilattu langitta, wuṛṛu taweddu nassumbala nandiaddi runia.

²⁵ Ete i Ya'u apan nanal᷊are sasi'attu taumata manani'atta, wuṛṛu nannal᷊angnga manga taumata taṛṛa pasangkadda. Manga wisaran taumata pande tinompol᷊ang-Ku, apapande mangitou Ta'u niola'a awawoddo.

²⁶ Ete i Ya'u apan nanohassa wisaran allang-Ku, wuṛṛu napaamattu hol᷊aga apan niapal᷊iatta'u daroloṛṛang-Ku, i Ya'u nabbisara manungku Yerusalem sarun atanaanna apia, wuṛṛu manga soan Yehuda sarun Ta'u iapararisikka apia; manga winalal᷊anne sarun isul᷊e apia.

²⁷ Ete i Ya'u nabbisara su wantan tahal᷊oangnga: Asahatte! Ya'u maapulu mapaamara manga sal᷊ukki yamiu.

²⁸ Ete i Ya'u apan nabbisara si Kores, ‘Ete i'o apan mamarenta uma-U, wuṛṛu mapaamattu anambon apulu-Ku. Parentaite tadea'u Yerusalem olaanna apia, wuṛṛu Wal᷊en Mawu isarite rapappake.’ ”