YESAYA 42 - WUKE SUSI WATTI'U AL᷊AL᷊USASSA

Allangngu Mawu

¹ Wisara Mawu, “Eteindi allang-Ku apan bawawanang-Ku, taumata nipile-Ku apan ma'al᷊uassa naung-Ku. I Ya'u buatte nangonggollu taṛṛino-Ku si tou, ipangapiddu atatul᷊idda su anambon walahanna.

² I tou sarun tawe mangintul᷊i wuṛṛu umui ringannu matelengnga, tingikke tawe aringiṛṛanna su lal᷊anna.

³ Iawanna apan ual᷊eṛṛe sarun tawe paddianne, sasol᷊oanna apan u'angkeramma sarun tawe paddumanne. Ringannu satia i tou sarun mapal᷊iatta'u atatul᷊idda,

⁴ ringannu tawe singgawange ara'e awul᷊iannu antimma, ma'oman sara atatul᷊idda ipasi'a su runia. Manga wanua apan marau lukkintul᷊un al᷊aṛṛangne.”

⁵ Mawu Ruata nandiaddi wuṛṛu namilattu langitta; i Tou na'ola'a runia wuṛṛu al᷊awo'a apan tuttuwo su leata'a. I Tou nangonggollu sasangngo ipabbiakka wuṛṛu niawa. I Tou nangonggollu tanata indi su allang-Nge.

⁶ “I Ya'u, Mawu, namaggo wuṛṛu mapamanaranu mapaamattu atatul᷊idda. I'o i Ya'u ehetanna wuṛṛu paddul᷊ianang-Ku tadea'u maola'a pa'aire su umattu taumata, wuṛṛu semakka su anambon walahanna.

⁷ Tadea'u ipamu'a matan taumata wuta, wuṛṛu ipamallossu taumata wuassu ararandummu tuttupanna.

⁸ Ete i Ya'u Mawu, uddewe arang-Ku; awawantu-Ku tawe Ta'u ionggolla sisai-sai; atattelengngu arang-Ku tawe Ta'u itantilla su paal᷊uanna.

⁹ Orassa indi apan Ta'u ilaṛṛangngo nilumiatta'e; i Ya'u mappulu mamasingkattu manga hatto apan bakku; tantal᷊anna udde taambe nariaddi, buatte Ta'u niwal᷊o si yamiu.”

Antari daralo

¹⁰ Pangantariten antari wakku su Mawu, paddalote si Tou, ei ahewallu runia! Paddallu'e, ei tahal᷊oangnga wuṛṛu anambon lal᷊oṛṛone, manga wanua apan marau wuṛṛu anambon tumanangnge!

¹¹ Ṛinone wadda'u anne wuṛṛu manga soane maddalo Mawu, mappianne tumana'u Kedar maddalo si Tou! Ṛinone tumana'u soa Sela umui lullala'a, wuṛṛu mangngintul᷊i wuassu puiddu wowone!

¹² Mappianne i mangitou mamantuga Mawu, wuṛṛu mamasingkatti Tou su manga wanua marau.

¹³ Mawu inaite mapapangalo naal᷊ihidda sangkatou waṛṛanine, naal᷊ihidda sangkatou tantara apan apulune mapapangalo. I Tou nanggoressan aintul᷊in pangalo, wuṛṛu namasil᷊o awawaṛṛani-Ne su saruannu seetta.

Ruata naddiandi mantul᷊ungngu uman-Ne

¹⁴ Ruata nabbisara, “Mal᷊annute i Ya'u uatinnannanga; i Ya'u mal᷊annabba wuṛṛu maṛṛaddannu watangang-Ku. Orassa indi nia'omante tempone mammanara, i Ya'u mappulute mangintul᷊i ere wawine apan mangunsiwete.

¹⁵ Wowone wuṛṛu wuidda sarun Ta'u olaanna lol᷊okka, anambon sasuanne Ta'u iapatolangnga. Manga wawal᷊annu sal᷊ukka Ta'u wal᷊uanna mabbal᷊i wadda'u anne, anambon dano Ta'u olaanna mamara.

¹⁶ Pabbawala-U apan buta sarun Ta'u ehetanna umamattu lal᷊anna apan awagananni mangitou; I mangitou sarun Ta'u ipiaṛṛa'a su manga lal᷊anna apan awagananni mangitou. Ararandumma Ta'u olaanna semakka si mangitou, wuṛṛu lal᷊anna natatal᷊attada Ta'u iratakka. Eteudde apan Ta'u olaanna si mangitou, wuṛṛu sarun Ta'u manaranna.

¹⁷ Taumata apan mangngimanna su paal᷊uanna sassubbanna wuṛṛu mangnga'u udde maola'a mawu mangitou, sarun lobbosanna wuṛṛu pansilianna.”

Israel maddiri aṛṛaanna

¹⁸ Mawu nabbisara, “Paddaringikka, ei manga taumata wengella! Pa'ellege, ei manga taumata wuta!

¹⁹ Isaite apan mabbutanna wuassu Israel allang-Ku? Isaite apan mabbengel᷊anna wuassu daroloṛṛang-Ku?

²⁰ Israel, manambo apan aellehannu, arawe i'o tawe manutukka, tal᷊inganu wawu'anna, arawe i'o tawe maddaringikka.”

²¹ Mawu mappandumma manal᷊amatta; i Tou mappulu tita-Ne a'addatanna wuṛṛu wantuhanna.

²² Arawe walahanna udde nasuete pinangaṛṛoanna; i mangitou tinaṛṛanganna su manga wabbo'a sulal᷊ummu leta'a, wuṛṛu nitaṛṛo sulal᷊ummu manga tuttupanna. I mangitou naola'a sol᷊ene wuassu pangangaṛṛo udde, wuṛṛu taweddu nirumanta mangontolla.

²³ Isai suwallatti yamiu apan mappulu maddaringikka olangnge indi, wuṛṛu manutukka ma'oman sara maasunna?

²⁴ Isaite apan nanantillu Israel iapaaṛṛo? Wal᷊inewe Mawu udde sassane? Ete su saruanni Tou i ite ma'ola'a rosa, i ite tawe mabbiakka tumuṛṛuttu parenta-Ne, wuṛṛu tawe maddaringikka al᷊aṛṛang-Ne.

²⁵ Ne i Tou na'ola'a si ite maapendamma asasa'u-Ne apan bahewalla, wuṛṛu uatataṛṛangnga susa ana waugu pangalo apan masaddatta. Asasa'u-Ne mannoṛṛobba su Israel naal᷊ihidda putungnga, arawe i ite tawe maatutukka, wuṛṛu tawe mapangurumma wuassu ola'u pabbiaṛṛanni ite.