YESAYA 41 - WUKE SUSI WATTI'U AL᷊AL᷊USASSA

Ruata nanohassa pangangimannu Israel

¹ Wisaran Duata, “Paal᷊annabe wuṛṛu paddaringikke si Ya'u, ei tumana'u manga wanua apan marau. Panaddiate rumanta ringannu mallaṛṛuunga, inaite wuṛṛu apira'e hattonu. Wette i ite makkuungnga su sambau, ipakkawessu tanne isai naṛṛino wuṛṛu isai nassal᷊a.

² Isai apan nangal᷊oren tembonanne wuassu ra'i, wuṛṛu sidutu nangonggollu auntunganna? Isai apan na'ola'a si tou namaddon manga walahanna, wuṛṛu napasuṛṛubbawan manga ratu si tou? Hal᷊elene naasal᷊iawukka si mangitou ere awu, anaanne napaaṛṛaen mangitou ere laṛṛami nitiuppu anginna.

³ I tou sidutu mangngenggena wuṛṛu u'amatta tawe gal᷊ahene; leddane mal᷊ihakka, ere tawe mangeṛṛetta leta'a.

⁴ Isaite apan na'ola'a sarangkanambone udde? Isaite apan nanantunnu amamattu runia? Ya'u, Mawu, ete i Ya'u apan paarorone, wuṛṛu sidutu pia maddatingngu panginsueanne.

⁵ Tumana'u manga wanua marau ma'asilo sarangkanambone apan buatte niola-U. I mangitou niṛṛumindu'a wuṛṛu mangngindon atata'utta, see na'ammulla su sambau wuṛṛu nirumanta.

⁶ Anambon taumata uatatul᷊ungnga, wuṛṛu uatatohassa naungnga.

⁷ Basen kalu mannohassa naungngu wasen bul᷊awanna, taumata apan mannassala atta'a ringannu sasewa, maddalo taumata manggorappa su wowon dansilanna. Wisarane, ‘Apiawe eteapa manaranu’; ana see nitohanne ringannu tadea'u tawe umio'a.

⁸ Arawe i'o, Israel, allang-Ku, umatta nipile-U, i'o pallaṛṛiten Abraham, hawe-U.

⁹ I'o buatte Ta'u nial᷊appa wuassu manga pentakku runia, Ta'u niwaggoanna wuassu manga tampa apan arauanne. Wisara-Nu, ‘I'o allang-Ku; i Ya'u tawe manol᷊a'u taumata nipile-U.’

¹⁰ Arie mata'utta, ana waugu i Ya'u uaringanna si'o, arie passinggawanga, ana waugu i Ya'u Ruatanu. I'o Ta'u tohasanna wuṛṛu Ta'u itul᷊ungnga, Ta'u ehetanna ringannu lima-U apan mawantuga.

¹¹ Pa'ellege, anambon taumata apan massa'u si'o, sarun iwaddo wuṛṛu iapaasili. Manga taumata apan mando'appa si'o, sarun mate wuṛṛu masue masahangginna.

¹² I'o sarun maddea'a manga taumata lullawangnga si'o, arawe i mangitou tawe niasangkal᷊annu. Manga taumata apan uapapangalonu orassa indi natete wuṛṛu nawul᷊i.

¹³ Ana waugu i Ya'u Mawu, Ruatanu, uapitaddu limanu aikkatanna; wisara-Nu, ‘Arie pa'ata'utta, i Ya'u sarun mantul᷊ungngu.’ ”

¹⁴ Wisaran Mawu, “Arie paata'utta Israel, salaiwe i'o addio'a wuṛṛu lome. Ete i Ya'u Mawu apan mantul᷊ungngu, Apan Lembon Na'ukkassa, Ruatan Israel uddewe Mananal᷊amannu.

¹⁵ Pa'ellege, i'o Ta'u olaanna ere pappalla pakkindanna, apan bakku, maṛṛoro wuṛṛu isine ruan daddaga. I'o sarun makkinda manga wowone wuṛṛu makkimunsa'a; manga wuidda niolangngu ere wal᷊a'a.

¹⁶ I'o sarun mattappa si mangitou, wua'udde i mangitou italla'u anginna wuṛṛu isal᷊iawukku anginna wahewalla. I'o sarun lumuassa ana waugu i Ya'u, Mawu, wuṛṛu lumala'a ana waugu i Ya'u, Ruatan Israel.

¹⁷ Napawe pabbawala-U apan susa udde maddea'a ua'e, wuṛṛu tonggol᷊anni mangitou namara ana waugu marou, ne i Ya'u, Mawu, sarun sumimbakka aal᷊iomanni mangitou; Ruatan Israel sarun tawe manantangngu uman-Ne.

¹⁸ I Ya'u na'ola'a manga sal᷊ukka mangngelekka su manga wuidda apan lunggukka; matan kua'e sarun umal᷊iwombonga su pattangngannu ammaranne. Wadda'a mal᷊alangnga sarun Ta'u olaanna rano; ua'e sarun ṛumawiassa wuassu leta'a apan mamara.

¹⁹ Wadda'u anne sarun Ta'u suanannu alu cemara, zaitun, manuru wuṛṛu akasia. Wadda'a mal᷊alangnga Ta'u olaanna mahurangnge, mahurangngu eru, berangan wuṛṛu cemara.

²⁰ Ne anambon taumata sarun maasilo wuṛṛu maasingkatta manungku i Ya'u, Mawu, apan na'ola'a udde. I mangitou sarun manutukka wuṛṛu maasunna, Ruata na'ukkassu Israel na'ola'a udde nariaddi.”

Mawu nando'appa manga monganna

²¹ Mawu, ratun Israel, nabbisara su manga monganna, “Alaea'e hattonu, pasabbanga'e manga wisara tatahekke!

²² Rantate, wuṛṛu si'ata'e apa apan sarun mariaddi, tadea'u i yami masingkattu panginsueanne sal᷊immurine. Wattia'e manga arariadianna dorone, tal᷊aa'e atappassane tadea'u i yami masingkatta.

²³ Wal᷊oa'e apa apan sarun mariaddi, tadea'u i yami masingkatta i yamiu atonna-tonna mawu. Pammanarate apa mahuna ara'e apan maarugi, tadea'u i yami tumiangnga maasilo.

²⁴ Mangke atonna-tonna, i yamiu wuṛṛu inolaannu tawe baddi'a, wuṛṛu manga maddaralonu tumba'u ma'arantinna.

²⁵ I Ya'u buatte nangal᷊oren sangkatou wuassu ra'i: i Ya'u niwaggoanna i tou iapapangalo wuassu sawannakka. Manga tembonanne sarun ṛindanna ere labbo, ere mandarunna urinna maṛṛinda leta'a maddeetta.

²⁶ Isai wuassi yamiu apan buatte namattan olangnge udde na'oman sara i yami wotongnge mangimanna si tou? Arawe suwallatti yamiu taweddu namasingkatta, taweddu maddaringikka si yamiu mabbisara.

²⁷ Ya'u, Mawu, apan paarorone namasingkatta su Sion; i Ya'u napaapiddu mangangapiddu watti'u al᷊al᷊uassa su Yerusalem.

²⁸ Sutempo i Ya'u maddea'a suwallattu manga monganna, tawe saran sambau apan wotongnge mangonggollu tatantiro, taweddu botongnge sumimbakka.

²⁹ Atonna-tonna, manga monganna udde tawe gunane, i mangitou tumba'u paal᷊uanna niwoso apan tawe maal᷊ore, wuṛṛu atwe mappa'ola'a manga apa.”