YESAYA 40 - WUKE SUSI WATTI'U AL᷊AL᷊USASSA

Manga wisara antimma

¹ Etearendi wisaran Duatanu, “Liwuṛṛewe, liwuṛṛete pabbawala-U!

² Paatammudde naungngu taumatan Yerusalem, pasingkata'e manungku patataṛṛualange nasuete. Pasasal᷊a mangitou buatte Ta'u niampunganna, manga rosa mangitou buatte Ta'u niṛṛuumanna paarua.”

³ Pia tingikka apan u'ui, “Saddiate lal᷊annu Mawu su wadda'u anne. Tul᷊idde lal᷊anna wahewalla su wadda'a mal᷊alangnga hunan Duatan kite!

⁴ Suapan wawal᷊anne ṛinone soopanna wowone wuṛṛu wuidda iratakka. Leta'a pia buidde sarun maola'a ratakke, wuṛṛu apan natatal᷊attadda sarun lauṛṛanna.

⁵ Ne awawantugu Mawu sarun iapal᷊iatta'a; anambon umattu taumata sarun maasilo. Atonna, Mawu sassane buatte naddiandi!”

⁶ Pia tingikka apan mabbisara, “Wattia'e!” I ya'u naiwal᷊o, “Apa apan sarun ta'u iwatti'a?” “Wattia'e manungku taumata naal᷊ihidda wal᷊abbukka, naal᷊ihidda bunga apan tumba'u tal᷊ang kaddio'a aṛṛansange.

⁷ Wal᷊abbukka nabbal᷊i mamara wuṛṛu bunga tinumolangnga, napawe Mawu nattiuppu anginna mal᷊oso. Atonna, walahanna udde naal᷊ihidda wal᷊abbukka.

⁸ Wal᷊abbukka nabbal᷊i mamara wuṛṛu bunga tinumolangnga, arawe ṛengetannu Ruatan kite mattatana'a saran mal᷊annu-l᷊annu.”

⁹ Saate su wowone apan matanggakka, wuṛṛu al᷊iata'e watti'u al᷊al᷊uassa su Yerusalem! Pangintul᷊ite ringannu tingikka matelengnga, wuṛṛu al᷊iata'e watti'u al᷊al᷊uassa su Sion! Wal᷊oa'e su manga soan Yehuda manungku Ruata mangitou sarun dumanta!

¹⁰ Pa'ellege, Mawu Ruata nirumanta ringannu taṛṛino mapaamattu manarane ringannu awawaṛṛani. I Tou tatantalongannu manga taumata apan buatte nipallossi Tou.

¹¹ Naal᷊ihidda sangkatou mallal᷊u'adda winatangnga i Tou napaddul᷊i ammul᷊an-Ne; i Tou sassane nangammulli mangitou. Manga ana'u domba nisal᷊uru-Ne, ringannu masaṛṛionto'a i Tou mangngehetta manga inangngene.

Ruata Israel tawe sumandingnge

¹² Isai mannupa'u tahal᷊oangnga ringannu pal᷊addu limane, ara'e nanguukka winalanganna ringannu rangone? Isai mannupa'u leta'a runia ringannu sasupa'a ara'e mannimbangu wowone wuṛṛu wuidda ringannu tatimbanganna?

¹³ Isai apan mammiaṛṛa'u Mawu, ara'e mangngaṛṛa'a si Tou maola'a mananantiro-Ne?

¹⁴ Sisaite Mawu maiwal᷊o tadea'u maasomba asingkatta wuṛṛu pasasunna? Isaite nangonggollu tatantiro si Tou tadea'u maapammanara ringannu naṛṛino?

¹⁵ Su Mawu manga walahanna ere laikku ua'e sulal᷊ummu sasia, ere sambau awu su tatimbanganna; manga taṛṛanusa aṛṛannane nasuul᷊ungngu awu al᷊ussa.

¹⁶ Anambon binatangnga su mahurangngu Libanon tawe natimu olaanna sasamba itattambunna; manga aaluanne tumaniten matul᷊ungnga olaanna al᷊un putungnga.

¹⁷ Anambon pabbaawalaga tawe gunane si Tou, ere ola'u tawe baddi'a su saruan-Ne.

¹⁸ Nariaddi ringanni sai i'o manul᷊ungngu Ruata? Isai apan su pendamannu nassul᷊ungngi Tou?

¹⁹ I tou tawe ere paal᷊uanna nilanginnu manga tuangnga, paal᷊uanna apan nipi'unnu wul᷊awanna wuṛṛu apampakke sal᷊a'a.

²⁰ Taumata apan tawe maawalli wul᷊awanna ara'e sal᷊a'a, mammile alu apan tawe hampa mahohakka. I tou naddea'a base apan masingkatta taumata mallanginnu paal᷊uanna apan tawe umio'a.

²¹ Ṛatadde i'o wagga wuṛṛu tawe naaringikka, wuṛṛu tawe niapasingkatta si'o ra'en paarorone? ṛatadde i'o tawe ma'asunna wuassu paarorone ereapa tattakku runia indi?

²² Iapa nandiadi uaṛṛamba'a roso su al᷊imboin dunia, tumanangnge a'asiloanna maraddio'a ere taṛṛangassa. I tou namilattu langitta ere mal᷊aṛṛenessa, wuṛṛu namasen langitta naola'a ere rasanna apan atanaanna.

²³ I tou na'ola'a manga tembonanne tawe naal᷊iore, wuṛṛu manga ahewal᷊anne niawul᷊iannu taṛṛinone.

²⁴ I mangitou udde naal᷊ihidda sinuananna wakku apan wakkute tuttuwo ṛamunne. Napawe Mawu maniuppu anginna, i mangitou maṛṛangu wuṛṛu nitallange ere laṛṛami.

²⁵ Isai apan su pendamannu nassul᷊ungngu Ruata Apan Lembon Na'ukkassa? Ringanni sai i'o ma'apulu manul᷊ungngi Tou?

²⁶ Paningngarate langitta, wuṛṛu panutukke! Isaite apan nallanginnu manga anumpitanna? I Tou apan mangngatokki mangitou naal᷊ihidda ere barisanna, i Tou masingkattu anambon mangitou sarangkanambone, wuṛṛu mammaggo sambau-sambau ringannu aranne. Tawe saran sambau apan mawul᷊i ana waugu ahewallu taṛṛinon Mawu!

²⁷ Nariaddi Israel, anio i'o sussal᷊iomanna, ere ola'u Mawu Ruatanu wagga i'o massusa? Ere ola'u i Tou tawe pandumme su pal᷊addu pabbiaṛṛannu wuṛṛu tawe ma'ellega hakkanu?

²⁸ Ṛatadde i'o wagga wuṛṛu tawe naaringikka? Ete Mawu Ruata apan sarangkal᷊o'enge, apan nandiaddi ahewallu runia. Taambe saran paassa i Tou naapendamma nallome ara'e nal᷊otakka; ṛingiran-Ne tawe aurumanna.

²⁹ I tou mannohassa taumata apan nal᷊otakka, mangngonggollu sasasa su taumata apan tawe maal᷊iore.

³⁰ Manga umbasanna maṛṛuala nallome wuṛṛu nal᷊otakka manga dario'a nanawo nal᷊iundu'a.

³¹ Arawe taumata apan mangunsandakka su Mawu, sarun maasomba atatohassa wakku. I mangitou naal᷊ihidda manu'a rajawali apan tuttalla'a matanggakka ringannu atatohassu papaidde. I mangitou tuttal᷊angnga wuṛṛu tawe maapendamma mal᷊otakka, i mangitou u'amatta wuṛṛu tawe mabbal᷊i mallome.