YESAYA 4 - WUKE SUSI WATTI'U AL᷊AL᷊USASSA

¹ Sutempo udde siri pitu wawine sarun mangaggassa sangkatou esakka wuṛṛu mabbisara, “Wala'awe i yami manga'u si'o sangkatou awingnga, tadea'u i yami tawe mamasanna asasili ana waugu tawe na'awingnga. Anna wuṛṛu laubba udde singkatten kami sassane.”

Yerusalem sarun apianna

² Sarun dumanta tempone Mawu ma'ola'a suapan sinuananna wuṛṛu aaluanna tumuwo maola'a masallakka wuṛṛu maṛṛansangnga su wanua indi. Su allo udde taumatan Israel apan naralukka sarun mamendamma al᷊al᷊uassa waugu hessin pangitinganna.

³ Suapan taumata apan natantangnga su Yerusalem, manga taumata apan nipilen Duata apan sal᷊amatanna, sarun isaggo na'ukkassa.

⁴ Ringannu taṛṛino-Ne Mawu sarun makkuungnga wuṛṛu mamaresi uman-Ne. I Tou sarun mamaresi Yerusalem wuassu daṛṛa manga taumata apan nipate su soa udde.

⁵ Ana see Buiddu Sion wuṛṛu awadaalla apan uaammulle isudde Mawu nandiaddi winabbawa sutempo allo, see lai timbulla wuṛṛu semakka sutempo ṛabbi. Ruata sassane ringannu taṛṛino-Ne sarun manilumma wuṛṛu mallu'adda ahewallu soa udde.

⁶ I Tou sarun manillumma wuassu paddissa apan mapal᷊atta sutempo allo, wuṛṛu niolangnge tampa passasirunganna su uranna wuṛṛu anginna.