YESAYA 38 - WUKE SUSI WATTI'U AL᷊AL᷊USASSA

Ratu Hizkia nirumadda'a wuṛṛu nipaapia

¹ Sutempo udde i Hizkia nirumadda'a wuṛṛu ete addio'a nate. I Nabi Yesaya ana'i Amos, nattembo si tou wuṛṛu nabbisara, “Mawu nannanata tadea'u i Tuangnga manginsue anambon manara, ana waugu i Tuangnga tawe mapia wuassu radda'a. Tate mal᷊annu lai i Tuangnga sarun mate.”

² Hizkia sinumaruanna darandungnga, see inumal᷊iomanna,

³ “Mawu, naungewe manungku i ya'u indi buatte nattaṛṛamawu Si'o ringannu satia wuṛṛu naungnga matul᷊idda. I ya'u sidutu mattinsahadda tuttuṛṛutta apulu-Nu.” Wua'udde i Hizkia nilumuai ringannu massusa.

⁴ Napawe i Yesaya napul᷊ete, Mawu nandolokki tou

⁵ apia niapawelengnga ringanni Hizkia wuṛṛu namasingkattu tanata indi, “I Ya'u, Mawu, Ruata apan sassubbanni Daud al᷊amonanu, buatte naddaringikka aal᷊iomannu wuṛṛu na'ellega allo matanu. I Ya'u sarun manamba uukku mapul᷊o l᷊ima su tonnane lai.

⁶ I'o wuṛṛu soa Yerusalem sarun Ta'u ipallossa wuassu taṛṛinon datun Asyur. Soa sidutu Ta'u lal᷊u'aranna.” Wua'udde i Yesaya nandolokku taumata mabbalu wuan ara wuṛṛu niapawuṛṛa su pinsulli Hizkia tadea'u mapia. Ratu Hizkia naiwal᷊o, “Apa indi tialane manungku Mawu sarun mangapia si ya'u wuṛṛu manungku i ya'u wotongngete inai apia su Wal᷊en Mawu?”

⁷ I Yesaya sinumimbakka, “Eteindi tialane apan nionggollu Mawu si Tuangnga manungku i Tou manipussa paaire-Ne.

⁸ Su tatebbo'u orassu matannallo apan niola'i Ratu Ahas, Mawu sarun ma'ola'a lintaune sussoṛṛotta mapul᷊o harissa.” Ne lintau udde sinumoṛṛotte mapul᷊o harissa.

⁹ Napawe i Hizkia napiate, i tou namoṛṛettu aantari daralo indi:

¹⁰ “Wisara'u, wakkute saṛṛen tumuwo i ya'u mapul᷊ete, manginsue lamben pabbiaṛṛangku su runian taumata nate.

¹¹ Wisara'u, i ya'u tate lai ma'ellega Mawu su runia, ara'e ma'ellega taumata su runia indi.

¹² Niawa'u nabbassute, nia'omante papate'u, naal᷊ihidda rasannu mallal᷊u'adda winatangnga nihohakka; naal᷊ihidda mal᷊aṛṛenessa nipototta wuassu pandaraddu'anne; su sunna'u Ruata sarun manginsue pabbiaṛṛangku.

¹³ Su al᷊o'engngu ṛabbi i ya'u mangngintul᷊in atataddu'a, ere ola'u manga duṛṛi'u niṛṛimunsa'u singa; su sunna'u Ruata sarun manginsue pabbiaṛṛangku.

¹⁴ Tingi'u mallannu ma'adio'a wuṛṛu massi'ome, naal᷊ihidda ana'u manu'u winalanganna i ya'u sussal᷊ande. Mata'u nal᷊otakke uatingngara langitta, Mawu, pallosa'awe i ya'u wuassu asasusa indi.

¹⁵ Apate apan sarun ta'u iwisara? Indi inolaannu Mawu; i ya'u tawe ma'atiilla ana waugu massusa.

¹⁶ Oh Mawu, lu'arewe i ya'u wuassu wisara wuṛṛu inolaan-Nu, wala'e i ya'u mabbiakka hunane Si'o sassane.

¹⁷ Asasinggawangku sarun mawal᷊u mabbal᷊i atatammudda, I'o nanal᷊amatta si ya'u wuassu asasilaka; manga rosa'u sarangkanambone buatte niampungan-Nu.

¹⁸ Su runian papate taweddu maddalo Si'o, taumata nate tawe mapangantimma apapia-Nu.

¹⁹ Tumba'u taumata wiakka apan maddalo Si'o, ere apan ta'u niola'a allo indi. Hagurangnge mabbatti'a anangnge aroddi apiane Mawu, oh Mawu.

²⁰ Mawu, I'o buatte napaapia'u, ne i yami mangantarin daralo su Wal᷊en-Nu ringannu mannengkella kecapi su al᷊o'engngu pabbiaṛṛanni yami.”