YESAYA 35 - WUKE SUSI WATTI'U AL᷊AL᷊USASSA

Lal᷊anna mattuddan asasal᷊amatta

¹ Wadda'u anne wuṛṛu leta'a mamara sarun lumuassa, manga bunga pasi pakkuangnga su wadda'a mal᷊alangnga.

² Wadda'u anne tattuwoanne ringannu mal᷊ihakka, wuṛṛu mangngantari ringannu aantarine. Araṛṛamage ere wowon Libanon, saṛṛene ere wawal᷊annu Karmel wuṛṛu Saron. Ne suapan taumata sarun maasilo taṛṛino Mawu, wuṛṛu awawantugu Ruatan kite.

³ Tohassawe ta'iakka apan lome, uattawe wu'u apan huggolle.

⁴ Wal᷊oa'e sisai apan addio'a naungnge, “Tohasse naungngu, arie pa'ata'utta, Ruata rumanta makkuumannu seetta, i Tou rumanta manal᷊amatta si yamiu.”

⁵ Sutempo udde taumata wuta sarun maasilo, wuṛṛu taumata wengella sarun maaringikka.

⁶ Taumata lome sussassolo'a ere rusa, taumata mou u'uin al᷊al᷊uassa. Ana waugu matan kua'e sussopate su wadda'u anne, sal᷊ukka mangngelekka su wadda'a mal᷊alangnga.

⁷ Anne mal᷊oso sarun mabbal᷊i rano, leta'a maṛṛasa mabbal᷊i al᷊imatan kua'e. Tampa apan paarorone wawanuannu asun ahuranganna, sarun tuwoannu pandanna.

⁸ Poiaroddi sarun pia lal᷊anna wahewalla, “Lal᷊anna matuddan asasal᷊amatta” aranne. Taumata marosa sarun tawe umamatta poiaroddi, taumata woddo sarun tawe mangal᷊iwun taumata umamatta isudde.

⁹ Su tampa udde tawe singa, ara'e winatangnga mal᷊aṛṛaga waine. Manga taumata apan nisal᷊amattu Mawu sarun umamatta poiaroddi.

¹⁰ Manga taumata apan nipallossu Mawu sarun mapul᷊e; i mangitou sumuttate soan Yerusalem ringannu u'ui, hati mangitou matilangnga ana waugu lal᷊umanna'a awasa. I mangitou sarun lumuassa wuṛṛu lumala'a; asasusa wuṛṛu sasal᷊iomanna mangke nawul᷊ite.