YESAYA 34 - WUKE SUSI WATTI'U AL᷊AL᷊USASSA

Ruata sarun makkuumannu manga seen-Ne

¹ Wette pa'ammulle, ei manga walahanna, wuṛṛu paddaringikke. Wala'e ahewallu runia wuṛṛu sarangkanambone apan biakka sulal᷊umme rumanta wuṛṛu maddaringikka.

² Mawu massa'u su anambon walahanna wuṛṛu al᷊awo'u tantaran mangitou. I Tou sarun makkuumanna wuṛṛu makkadda'a si mangitou.

³ Manga winal᷊unanni mangitou sarun tawe ilabbinga, arawe iwalate aroddi mawukku'a wuṛṛu mahal᷊uru. Manga wowone sarun masa'u ana waugu nielleṛṛannu daṛṛa mangitou.

⁴ Matannallo, wul᷊anna wuṛṛu manga anumpitanna sarun maṛṛimunsa'a. Langitta sarun lul᷊unanna ere lul᷊unnu suratta. Manga anumpitanna sarun manawo ere manga rongnga apan natontongnga wuassu alune.

⁵ Mawu buatte nanaddia hal᷊ele-Ne su surga, wuṛṛu orassa indi hal᷊ele udde sarun maṛṛia'a su walahannu Edom apan buatte niemaannu ṛuumanna wuṛṛu ṛaddaanna.

⁶ Hal᷊ele Mawu sarun, mappeta'u daṛṛa wuṛṛu mapenen tawa mangitou, naal᷊ihidda ere ringannu daṛṛa wuṛṛu tawan binatangngu sasamba. Ana waugu Mawu nanaddia sasamba su Bozra, wuṛṛu na'ola'a pamamototta marasai su leta'u Edom.

⁷ Manga taumata sarun mate ere sapi matengnga wuṛṛu sapi saṛṛentumuwo. Wanua mangitou sarun maola'a maṛṛamutta wuṛṛu mapenen tawa.

⁸ Eteudde tempone Mawu manamba'a Sion wuṛṛu mabbal᷊issa manga seen-Ne.

⁹ Manga sal᷊ukku Edom sarun mawal᷊u mabbal᷊i teṛṛa, wuṛṛu letangnge maola'a beleranga. Panginsueanne ahewallu wanua ṛumenggamma ere teṛṛa.

¹⁰ Allo ṛabbi ṛenggamma udde tawe mappaddumma, wuṛṛu timbulla sussal᷊oi wuassi tou saran mal᷊annu-l᷊annu. Leta'a udde sarun itantangnga tawe loṛṛone wuṛṛu maṛṛasa sara maṛṛana'a mappulunna, wuṛṛu tawe saran sangkatou sarun umamatta isudde.

¹¹ Manu'a tamingnga wuṛṛu landak sarun mamanua isudde, mammeo wuṛṛu gagak sarun matana'a poiaroddi. Mawu sarun ma'ola'a leta'a udde al᷊iba'ukka wuṛṛu tawe loṛṛone ere taambe niriaddi paarorone.

¹² Tawe ratu apan uaparenta wanua udde, wuṛṛu anambon piaṛṛangnge nawul᷊ite.

¹³ Manga wal᷊en pasasubbanna wuṛṛu manga soane pia tatandangnge sarun tuwoannu aputta ṛoaanna, wuṛṛu wawanuanten asun ahuranganna wuṛṛu manu'a unta.

¹⁴ Winatangnga mal᷊aṛṛaga sarun mappaniaṛṛanna sulal᷊umme; manga manu'a mammeo uasasimbakka, wuṛṛu mammeon ṛabbi maddea'a tampan pangillol᷊oanna.

¹⁵ Su tampa udde atoanna mawisa ma'ola'a sal᷊akke, mattallukka, mangngissa'a wuṛṛu uataṛṛapa manga anangnge. Asiaṛṛe maammulla mangke su parene.

¹⁶ Paddea'e wuṛṛu pabbasate sulal᷊ummu Buken Mawu: Tawe saran sambau wuassu anambon riaddianna udde mawul᷊i ara'e tawe parene. Ana waugu etearoddi parentan Mawu, wuṛṛu ete i Tou sassane apan buatte nangammulli mangitou.

¹⁷ Ete Mawu apan nattahia wanua udde suwallatti mangitou wuṛṛu sambau-sambau nanengkamma tahiane. I mangitou sarun matana'a isudde sarangkal᷊o'enge, wuṛṛu leta'a udde sarun maola'a pussa'a mangitou marṛana'a mappulunna.