YESAYA 32 - WUKE SUSI WATTI'U AL᷊AL᷊USASSA

Ratu apan matul᷊idda

¹ Pa'ellege, sarun a'omanna tempone sangkatou ratu mamarenta ringannu atatul᷊idda wuṛṛu manga mamamiaṛṛa'u walahanna mappaamattu atatul᷊idda.

² I mangitou sangkatou-sangkatou naal᷊ihidda tampa pattillummanna wuassu anginna wuṛṛu tandi'a. I mangitou ere sal᷊ukku apan mangngelekka su wadda'u anne, ere lumman batu wahewalla su leta'a maṛṛasa.

³ Taumata apan maasilo sarun tawe manutubbu matane, wuṛṛu apan maaringikka sarun maddaringikka.

⁴ Taumata apan dorone masawu'anna sarun maola'a masabbare wuṛṛu napenen pasasunna. Taumata apan tuttattu'a sarun mabbisara ringannu matualaga.

⁵ Taumata woddo tate lai addatanna, mallal᷊inga tate isaggo matul᷊idda.

⁶ Taumata woddo mappasabbangngu manga wisara apan woddo wuṛṛu manggol᷊agu al᷊al᷊eo. Sarangkanambone apan olaanna ara'e iwisarane maola'a aal᷊uandaga su saruannu Ruata. Tawe saran pa'assa i tou nangonggollu anna su taumata mal᷊unussa ara'e napa'inummu taumata marou.

⁷ Arawe sangkatou taṛṛa awusu maṛṛingidda wuṛṛu ma'ola'a al᷊al᷊eo. I tou maddea'a ṛingidda ipanilaka taumata asiangnga ringannu manga wisara awusu wuṛṛu mannal᷊awa'a si mangitou tadea'u tawe maasomba hakkane.

⁸ Arawe taumata apan mapia buddine manggol᷊agu manga inolaanna apan mapia wuṛṛu pallal᷊agune lai mapia.

Pallaṛṛuungnga wuṛṛu pangangapia

⁹ Paddaringikka, ei manga wawine apan mabbiakka matemangnga, nal᷊iudda wuassu asasusa!

¹⁰ Orassa indi i yamiu wotongnge maapendamma mal᷊angnganna, arawe iraṛṛangngo santonna lai i yamiu sarun sumassilla, ana waugu hessin anggore sarun tawe mabbua, wuṛṛu hessin sinuananna lai tawe.

¹¹ Maddatingngu orassa indi i yamiu mabbiakka matemangnga, nal᷊iudda wuassu asasusa. Arawe orassa indi, mangngiladden atata'utta! Luatte laungngu wuṛṛu reṛṛota'e nasa su lawannu.

¹² Luaite manga wawail᷊annu apan masuwukka wuṛṛu manga waillu anggori maiu apan mabbua nabbelle'a,

¹³ ana waugu leta'u pabbawala'u nituwoannu ahuranganna wuṛṛu aputta ṛoaanna. Ore, luaite manga wal᷊enu tampa manga taumata mallal᷊umanna'a wuṛṛu soa apan napenen damea!

¹⁴ Ewe'e lai wal᷊en araratuanna sarun itantangnga wuṛṛu inangngu soa apan rame mabbal᷊i mal᷊annaba. Wuidda wuṛṛu manga menara panddariaganna buatte niratakka ringannu leta'a saran mal᷊annu-l᷊annu. Manga keledai matengnga wuṛṛu domba sarun mannal᷊angnga wuṛṛu umanna nannal᷊o isudde.

¹⁵ Arawe paassa lai Ruata sarun dumanta ringannu taṛṛino-Ne. Ne wadda'u anne sarun maola'a wawail᷊anna masuwukka, wuṛṛu manga wailla sarun maola'a mahurangnge.

¹⁶ Su ahewallu wanua sarun pia atatul᷊idda wuṛṛu apapia.

¹⁷ Suapan taumata sarun ma'ola'a ringannu naṛṛino, na'oman sara pia atatahul᷊andimma wuṛṛu langnganna saran mal᷊annu-l᷊annu.

¹⁸ Umattu Ruata sarun mapallossa wuassu asasusa wuṛṛu mabbiakka su tampa mal᷊annabba wuṛṛu mal᷊angnganna.

^19-20 Lal᷊umanna eteapa si yamiu sarangkanambone ana waugu ua'en sinuanannu nasuungnga, wuṛṛu winatangnga papadul᷊ianannu wotongnge umanna su al᷊awo'u tampa ringannu amanna. Arawe seennu mahurangnge apan niaṛṛinoannu uranna watu wuṛṛu soa mangitou sarun ihohakka.