YESAYA 31 - WUKE SUSI WATTI'U AL᷊AL᷊USASSA

Ruata sarun mallu'adda Yerusalem

¹ Nasilakate taumata apan inai watukku Mesir see maddorongnga sasumbala! I mangitou mangngantima atatohassu tantaran pangalo Mesir ringannu tantaran awal᷊o wuṛṛu awal᷊one mangkatohassa se'e lai keretane manambo. Arawe i mangitou tawe mangimanna Mawu, Ruata na'ukassa su Israel wuṛṛu tawe maisumabala su Mawu.

² Mawu pande wuṛṛu masingkattu inolaan-Ne. I Tou mandatan asasilaka wuṛṛu mammansaga makkuumannu taumata lal᷊eo wuṛṛu manga taumata apan mantul᷊ungngi mangitou.

³ Taumata Mesir tumbau taumata, wal᷊ine Ruata. Awal᷊on mangitou riaddianna wiasa, wal᷊ine mawu. Napawe Mawu mammanarate, walahanna apan mantul᷊ungnga udde sarun itara wuṛṛu walahanna apan nitul᷊ungnga udde sarun manawo. Ne itarua sarun mate.

⁴ Mawu nabbisara si ya'u, “Naal᷊ihidda singa sussaṛṛandanga mangngal᷊addu pabbawiakke wuṛṛu tawe apata'utannu aintul᷊i wuṛṛu a'uin ammul᷊annu mallal᷊u'adda winatangnga apan nasaddiate mando'appa si tou, aroddi lai i Ya'u sarun mamangalo wuṛṛu manahekku Wuiddu Sion.

⁵ Ere sambau manu'u winalanganna mangngal᷊iappakku papaidde su wowon sal᷊akke ipangooppa manga anangnge, aroddi lai i Ya'u, Mawu Apan Lembontaṛṛino sarun mallu'adda, manahekka wuṛṛu manal᷊amatta Yerusalem.”

⁶ Mawu nabbisara, “Walahannu Israel, i yamiu buatte nilumawangnga si Ya'u wuṛṛu marosa su saruang-Ku. Arawe orassa indi, pabbelengke ringang-Ku!

⁷ Sarun a'omanna tempone i yamiu sarangkanambone sarun mandamme manga paal᷊uannu monganna wuassu sal᷊a'a wuṛṛu wul᷊awanna apan nilanginni yamiu sassane ringannu napenen dosa.

⁸ Asyur sarun ṛaddaanna sulal᷊ummu pangalo, arawe wal᷊ine ringannu auatannu taumata. Taumatan Asyur sarun tumal᷊angnga wuassu papangaloanna, wuṛṛu manga umbasanni mangitou sarun olaanna allangnga.

⁹ Ratun mangitou sarun tumal᷊angngu atata'utta, wuṛṛu manga mamamiaṛṛa'u tantarane mangke niṛṛumoro, na'oman sara i mangitou nanantangngu manga waneṛṛan pangalo.” Mawu buatte nabbisara, Mawu apan sassubbanna wuṛṛu a'addatanna ringannu sasamba tattutunganna su Yerusalem.