YESAYA 30 - WUKE SUSI WATTI'U AL᷊AL᷊USASSA

Pa'aire apan tawe gunane ringannu Mesir

¹ Mawu nabbisara, “Nasilakate manga piaṛṛa'u Yehuda, ana waugu i mangitou lullawangnga si Ya'u. I mangitou tinumuṛṛutta manga ṛiinna apan bal᷊ine ṛiing-Ku. I mangitou nabartanda pa'aire apan lumawangnga apulu-U. Ne rosa mangitou pasi ombote.

² I mangitou inaite watukku Mesir ringannu tawe naddorongnga laṛṛawe-U. I mangitou mattilindumma su Mesir wuṛṛu mangngantimma aontolla wuassu ratu Mesir.

³ Arawe ratu sarun mapasassilli mangitou wuṛṛu tul᷊unganna apan a'antimanna wuassu Mesir tawe mariaddi.

⁴ Salaiwe manga daroloṛṛannu Yehuda na'omate su manga soan Zoan wuṛṛu Hanes su Mesir,

⁵ anambon taumata sarun masili ana waugu buatte nangantimma walahanna apan tawe gunane si mangitou. Apan niasombanganni mangitou wal᷊ine auntunganna ara'e tul᷊unganna, ewe'e aal᷊uandaga.”

⁶ Arendi tanata Mawu su ola'u manga winatangnga apan uatana'a su leta'u timukka, “Manga daroloṛṛanna malluranna keledai wuṛṛu unta mangitou ringannu manga aonggolla, se'e sumabbi manga wageangngu leta'a apan napenen asasilaka, apan atatanaannu singa, atoanna mawisa, wuṛṛu naga pia papaidde. Manga aonggolla udde nionggolli mangitou su sambau walahanna apan tawe maatul᷊ungngi mangitou.

⁷ Tul᷊ungannu Mesir naola'a tawe gunane. Ana waugu udde Mesir nisaggo, ‘Naga apan tawe maasilaka.’ ”

Walahanna apan mal᷊awangnga

⁸ Ruata nandolo'u niapawoṛṛettu al᷊al᷊eon uman-Ne sulal᷊ummu sambau wuke maola'a pananaunganna saran mal᷊annu-l᷊annu.

⁹ Ana waugu, i mangitou udde walahanna apan apulunne lullawangnga su saruannu Ruata, apulune mammahia wuṛṛu mangke maddiri maddaringikka al᷊aṛṛa'u Mawu.

¹⁰ I mangitou mabbisara su manga nabi, “Paal᷊annabba tutuwa'a moṛṛongnga! Arie pabbal᷊o si yami apa apan naṛṛino, ewe'e apa apan aapuluanni yami udde daringiṛṛanna. Wala'e i yamiu sidutu mabbal᷊iawa.

¹¹ Passal᷊iute, wuṛṛu paddea'e lal᷊anna waine. Arie mallimbatta si yami ringannu Ruata na'ukkassa su Israel.”

¹² Ana waugu udde Ruata na'ukkassa su Israel nabbisara arendi, “I yamiu nanol᷊a'u wisara-U wuṛṛu mangngasakku ara'e tinumantaṛṛimanna pangangallanga wuṛṛu pamamahia.

¹³ Ana waugu udde i yamiu nassal᷊a. I yamiu naal᷊ihidda tanda'a matanggakka apan nawa'a wua doso naddatingngu wowane; ringannu sangkaṛṛondappa i yamiu sarun maṛṛa'a.

¹⁴ I yamiu sarun maṛṛimunsa'a ere urinna leta'a apan napesangnga nattal᷊eṛṛonga, na'oman sara suwallattu pesangnge tateddu wotongnge ipaatta ipanganu waṛṛa wuassu sunggilla ara'e ipangabba ua'e wuassu tampane.”

¹⁵ Mawu Apan Atanggaṛṛanne, Ruata susin Israel, nabbisara uman-Ne, “Awal᷊ute wuṛṛu paatammudda, ne i yamiu sarun iapasal᷊amatta. Pangimante si Ya'u ringannu naungnga apan matana'a, ne i yamiu sarun tohasang-Ku.” Arawe i yamiu maddiri!

¹⁶ Ewe'e i yamiu lai maṛṛingidda mallinda'u watanganni yamiu wuassu seetta ringannu uasa'e awal᷊o apan mal᷊ihakka. Mapia! Atonna i yamiu ṛinone tumal᷊angnga! I yamiu maṛṛingidda awal᷊onu udde mal᷊ihakka tatal᷊angnge, wutte'e manga mangangenggennu mallihaṛṛanna marau tatal᷊angnge.

¹⁷ Saṛṛiwu su atoune sarun tumal᷊angnga maasilo wawansagu sangkatou seetta, wuṛṛu wawansagu siri lima maaola'a si yamiu tumal᷊angnga abbi-abbi. Wuassu tantaranu tumba'u matantangnga sambau pul᷊on baneṛṛa su puiddu wuidda.

¹⁸ Salaiwe aroddi, Mawu mangke ual᷊aṛṛaddo tempone mamasilon tatal᷊antu-Ne si yamiu. I Tou uasaddiate umakkanni yamiu. Ana waugu Mawu eteudde Ruata apan ma'ola'a sarangkanambone apan suṛṛinone. Lal᷊umanna'a su taumata apan mangngantimma si Tou.

Ruata sarun mangal᷊amatta uman-Ne

¹⁹ Ei i yamiu apan uatana'a su Yerusalem, i yamiu tawe sidutu mangke lulluai. Mawu pia aakkanna, wuṛṛu ringannu mal᷊ihakka sumimbakka si yamiu amungkangngu sumal᷊ande maddorongnga tul᷊unganna si Tou.

²⁰ Mawu nangonggollu tempon bawono'a apan mawakkatta si yamiu tadea'u ipangaṛṛa'a si yamiu. Arawe orassa indi i Tou sassane uarundinganna si yamiu na'oman sara i yamiu naapendamma daranta-Ne.

²¹ Amungkangngu i yamiu sumewadda wuassu lal᷊anna, su liuddu sarun aringiṛṛanna tingik-Ke apan mabbisara, “Eteindi lal᷊anne; amatte su lal᷊anna indi.”

²² Manga paal᷊uanna sassubbannu apan aoosannu sal᷊a'a wuṛṛu wul᷊awanna sarun irammen kami naal᷊ihidda sapadda, lapiddu mabbisara, “Paaraute wua dingangku!”

²³ Napawe i yamiu mangasi'u wualanna, Mawu sarun mandolokku uranna tadea'u wualanna udde tumuwo wuṛṛu mangonggollu pangitinganna apan manambo-nambo. Su winatangnga papadul᷊ianannu sarun uasaddiate wadda'u nannal᷊o apan mal᷊alangnga.

²⁴ Sapi esakka wuṛṛu keledai apan mammajeko wawail᷊annu sarun umanna annu winatangnga apianne apan buatte nisaddia al᷊aṛṛaene.

²⁵ Su allo manga tanda batu seennu nipangaloanna wuṛṛu manga taumatane nipate, suapan bowone wuṛṛu wuidda sarun mapa'elekku eṛṛesannu sal᷊ukka.

²⁶ Wul᷊anna sarun masemakka ere semakku matannallo, wuṛṛu matannallo sarun maola'a paapitu asemakke wuassu wiasane, ere semakku pitu allo niammulla naola'a sambau. Sarangkanambone udde sarun mariaddi sutempo Mawu mami'unna wuṛṛu mapaapia manga lessa uman-Ne apan buatte nipuulle.

Ruata sarun makkuumannu Asyur

²⁷ Taṛṛino wuṛṛu awawantugu Mawu aasiloanna ro'en ta'e mara'u. Putungnga wuṛṛu timbulla mapal᷊iatta'u assasa'u-Ne. I Tou uahahatto mangitou, wuṛṛu manga wisara-Ne mannoṛṛobba ere putungnga.

²⁸ I Tou nandolokku anginna niapal᷊iuṛṛoro wuassi Tou naal᷊ihidda manawangnga atanggakke sara ullekka apan nangelekku al᷊awo'a. I Tou nakkadda'a manga walahanna, wuṛṛu namal᷊aatta manga ṛiinni mangitou apan dal᷊eo.

²⁹ Arawe i yamiu, umattu Ruata, sarun lumuassa wuṛṛu mangngantari ere su ṛabbi ramean agama. I yamiu sarun lumala'a naal᷊ihidda manga taumata apan u'amatta aopasannu wansi mattuddan Wal᷊en Mawu, mananahekku Israel.

³⁰ Mawu sarun mapararingikku tingik-Ke apan mawantuga, wuṛṛu suapan taumata sarun maapendamma taṛṛino-Ne apan bahewalla. Asasa'u-Ne sarun mandantan putungnga apan mannoṛṛobba, uranna masaddatta, uranna watu wuṛṛu tandi'a.

³¹ Taumatan Asyur sarun massongkakka napawe maaringikka tingikku Mawu wuṛṛu mamendamma ṛuuman-Ne apan mawakkatta.

³² Tantal᷊anna i mangitou mammendamma manga papuulle, umattu Mawu lulluassa ringannu musikku tambore wuṛṛu kecapi. Ruata sassane sarun mamangalo mando'appa Asyur.

³³ Ro'en dorone buatte niriahi tampa panutunganna si ratun Asyur. Tampa udde mal᷊al᷊umma wuṛṛu mal᷊alakka, loṛṛone alum putungnga apan ua'ombo. Mawu sarun makkenggamma ringannu maniuppu singangu-Ne apan naal᷊ihidda sal᷊ukku belerangnga.