YESAYA 3 - WUKE SUSI WATTI'U AL᷊AL᷊USASSAAal᷊iba'ukka su Yerusalem 1 Mangke atonna, Mawu Apan Lembontaṛṛino sarun manganu wuassu Yerusalem wuṛṛu Yehuda al᷊awo'u anna wuṛṛu ua'e apan sasahipunanna. Aroddi lai anambon taumata apan ia'bansakki mangitou: 2 manga pahlawanna wuṛṛu tantara, mallaṛṛuungnga, nabi, manani'atta wuṛṛu mananantiro, 3 perwira, taumata piaṛṛangnge wuṛṛu mapapanden araratuanna, taṛṛa wal᷊i'in mata wuṛṛu taṛṛa si'atta. 4 Mawu sarun manenegu manga al᷊aṛṛana'a umbasanna maola'a mamamiaṛṛa'u tumana'u soa, ne i mangitou sarun mamarenta ringannu walate apulu mangitou. 5 Manga taumata sarun mapapangallangnga. Dario'a tate maddaringikka timmadde wuṛṛu taumata wiasa tate mandeengngu taumata pia pangkanne. 6 Sutempo udde taumata sarun manebbo'u sangkatou ana'u tuṛṛangnge wuṛṛu mabbisara si tou, “Tumba'u i'o apan pia laubba ṛinone; waugu udde ariaddite mamamiaṛṛa'i yami sutempo apan napenen asasusa indi.” 7 Arawe i tou sarun sumimbakka, “I ya'u wal᷊inewe mangangundamma! I ya'u lai tawe anna wuṛṛu laubba. Ariete mandolo'u maola'a mamamiaṛṛa'u walahanna!” 8 Atonna, Yerusalem nanawote! Yehuda nahohakke! Ana waugu al᷊awo'u wisara wuṛṛu inolaanni mangitou lullawangnga Mawu wuṛṛu mannal᷊are taṛṛino-Ne. 9 Ala'uanni mangitou apan mawunga mapal᷊iatta'u al᷊al᷊eon mangitou. Ringannu matualaga i mangitou narosate ere taumatan Sodom paarorone. Nasilakate i mangitou! I mangitou mandantan asasilaka su watanganni mangitou sassane. 10 Mawu nabbisara, “Pasingkata'e su taumata apan matuṛṛutta si Ya'u manungku i mangitou sarun su lal᷊umanna'a wuṛṛu sal᷊amatta. I mangitou sarun maatemma wuan inasaharanni mangitou. 11 Arawe nasilakate taumata lal᷊eo! I mangitou sarun olaanna ere lai i mangitou buatte na'ola'a taumata waine. 12 Uma-U sarun allangannu taṛṛa rea'a auntunganna wuṛṛu ipakkan taumata taṛṛa iṛṛuppa daṛṛa. Uma-U sarun ial᷊iwun manga piaṛṛangnge na'oman sara waggate lai dal᷊anna apan ṛinone amatanni mangitou.” Mawu makkuungnga uman-Ne 13 Mawu nasaddiate mangalae wuṛṛu makkuungngu uman-Ne. 14 Mawu naola'a mallaṛṛuungnga su manga mamamiaṛṛa'u uman-Ne. Eteindi papaṛṛansillu Mawu si mangitou: “Ete i yamiu apan nangaṛṛo wuan manga wawail᷊annu anggore; wal᷊enu napenen darotongnga apan niaṛṛon kamiu wuassu taumata asiangnga. 15 Anio i yamiu mangngallangnga uma-U wuṛṛu manganu saranapan taumata asiangnga? I Ya'u, Mawu Apan Atanggaṛṛanne wuṛṛu Lembontaṛṛino buatte nabbisara.” Tataggu su manga wawinen Yerusalem 16 Mawu nabbisara, “Mawunga atonna manga wawinen Yerusalem! I mangitou mammanemma, apulune mangngangkeramma wuṛṛu u'amatta ringannu mawunga. Lempangnge a'olaanna, wuṛṛu mangke sussal᷊ensekka tingikku manga hal᷊angnga su leddane. 17 Arawe i Ya'u sarun makkuumanni mangitou; puan mangitou sarun mapenen akke wuṛṛu lungguṛṛanna.” 18 Sarun dumanta tempone Mawu manganu wuassu wawinen Yerusalem al᷊awo'u lal᷊ogakka apan ilalluassi mangitou: paporongnga, hal᷊angngu ledda, wul᷊ele, 19 hal᷊angngu ta'iakka, tataappa hati, 20 tatindungngu pua, manga jimatta su pulal᷊anna wuṛṛu lawassa, 21 sinsingnga wuṛṛu ngante-ngante ngirunna, 22 laubbu andeangnga apan maṛṛansangnga, jaket ara'e mantelle, dompetta, 23 laubba manipissa, laubba linen, wawa'issa ullekka wuṛṛu tatindungnga mal᷊o'engnga. 24 Orassa indi i mangitou mappaatten lana mawangngi, sal᷊immurine hal᷊uru mangitou mawukku'a. Papeṛṛeti mangitou al᷊ussa sarun hantianni mangitou tal᷊i apan masalla. Puan mangitou apan pia utangnge maṛṛamaga sarun lungguṛṛanna. Laubbi mangitou apan maṛṛansangnga sarun hantiannu laubba nahahesa'a. Orassa indi i mangitou maṛṛamaga, tawe mal᷊anna'a addio'a hati mangitou mal᷊al᷊eo ana waugu cappanna. 25 Taumata esakka, wuṛṛu lai mangkatohassa, sarun mate sulal᷊ummu pangalo. 26 Su manga pasallangannu soa taumata sarun lumal᷊o wuṛṛu lumuai, wuṛṛu soa udde sassane sarun maola'a ere wawine apan nitantol᷊ete wuṛṛu ua'ianna su leta'a. |
@ LAI 2003
Indonesian Bible Society