YESAYA 28 - WUKE SUSI WATTI'U AL᷊AL᷊USASSA

Tataggu su Araratuannu Sawannakka

¹ Nasilakate soa apan nabbal᷊i ipammunga manga taṛṛa wu'annu Israel! Araṛṛamage nawul᷊i ere saṛṛen bunga apan tinumolangnga su wowon pua mangitou. Nasilakate soa apan matanggakka su pattangngannu wawal᷊anne masuwukka, ilalluassu manga taumata apan wu'anna masaddatta.

² Mawu sarun mandolokku sangkatou apan matohassa wuṛṛu waṛṛani. Darantane ere anginna ma'ikkatta daṛundinganannu uranna eisse, ere uranna masaddatta wuṛṛu manawangnga apan ma'aonodda. Ringannu araṛṛagissa i tou mangngema'i mangitou su leta'a.

³ Ilalluassu manga piaṛṛa'a apan wu'anna udde sarun ṛindanna.

⁴ Atatelunngngu soan mangitou apan mannatakke mabbul᷊i udde sarun mahangginna. Pal᷊adde ere pal᷊addu wuan ara apan nal᷊aha taambe tempone; aroddi ellehanna, lapiddu ti'oanna wuṛṛu anananna.

⁵ Mawu Apan Lembontaṛṛino sarun maola'a wunga apan maṛṛamaga su uman-Ne apan nallambe.

⁶ Mawu sarun mangonggollu apendamma matul᷊idda su manga mallaṛṛuungnga, wuṛṛu awawaṛṛani su manga taumata apan uamanara mandiaga soa wuassu pangalo.

I Yesaya wuṛṛu manga nabin Yehuda apan wu'anna

⁷ See lai manga nabi wuṛṛu manga imam wu'anna ana waugu tumanite manambo na'inumma anggore wuṛṛu tubba. I mangitou u'amatta lullallengge wuṛṛu mangke mattara ana waugu ṛingiranni mangitou nassongkakka. Manga nabi tate lai maasunna manga sondappa apan ia'onggollu Ruata si mangitou. Manga imam tate lai maaṛṛawessu manga hatto apan iappaola'a si mangitou.

⁸ Medda mangitou napene muta, sara lai tate tampa apan baresi.

⁹ I mangitou sussal᷊iomanna su ola'u riri'u, wisarane, “Su sunnane i tou mangngaṛṛa'a sisai? Isai lai apan mappandumma tal᷊aane? Su ṛingidde i ite indi ana'a addio'a apan wakkutte iapasusu?

¹⁰ Ṛatadde i tou mangngaṛṛa'a si ite huruppa ringannu huruppa, wisara ringannu wisara, hatto ringannu hatto.”

¹¹ Amungkangngu i yamiu maddiri maddaringikka si ya'u, ne Mawu sarun mandolokku taumata raho iapaaṛṛa'a si yamiu sulal᷊ummu wisara paṛṛalane wuṛṛu sasinaukka awagananna.

¹² Mawu nangonggollu tampa pangillol᷊oanna si yamiu sarangkanambone, arawe i yamiu maddiri maddaringikka si Tou.

¹³ Ana waugu udde Mawu mangngaṛṛa'a si yamiu huruppa ringannu huruppa, wisara ringannu wisara wuṛṛu hatto ringannu hatto. Wuṛṛu sutempo umamatta i yamiu nanawo uataro'o na'oman sara nal᷊essa, niasongnganna wuṛṛu niatawanna.

Watun pi'une hunan Sion

¹⁴ Paddaringikka apa apan iwisara Mawu, ei manga taṛṛa al᷊uandaga apan uaparenta tumana'u soa su Yerusalem!

¹⁵ I yamiu mabbisara manungku i yamiu buatte na'ola'a pa'aire su papate wuṛṛu nakkiinnu riandi su runian taumata nate. I yamiu maapendamma atonna manungku asasilaka apan sarun dumanta udde tawe maṛṛia'a su watangannu, ana waugu i yamiu mapaattu waṛṛutiaalla ara'e wawahia ipallindumma watangannu.

¹⁶ Ana waugu udde, Mawu Apan Atanggaṛṛanne nabbisara arendi, “I Ya'u sarun mangaddon rapappakke apan matohassa wuṛṛu ma'uatta su Sion; sambau watun pi'une apan maarega ringannu woṛṛetta: ‘Isai apan mangngimanna atonna, i tou sarun tawe mawaddo.’

¹⁷ Atatul᷊idda Ta'u olaanna tal᷊i auukka, wuṛṛu apapia Ta'u olaanna tal᷊in passaranna.” Uranna watu sarun mamaresi anambon bawahia apan pangngartimanna ara'e ia'asakki yamiu. Manawangnga sarun mangonoddu tampa pa'imbuniannu.

¹⁸ Pa'airenu ringannu papate wuṛṛu riandinu ringannu runian papate sarun tawe iapasakkuta, ma'oman sara napawe asasilaka rumanta, i yamiu mapussa'a sassal᷊idananna.

¹⁹ I yamiu sarun aṛṛiaannu asasusa mal᷊annu-l᷊annu wuṛṛu ṛinone maola'a bawawanna mamiallo, maruallo, allattune wuṛṛu ṛabbi. I yamiu sarun mangindon atata'utta napawe i yamiu maasunna tanatan Duata.

²⁰ I yamiu naal᷊ihidda taumata apan aamatiil᷊ante sulal᷊ummu antilla apan maautta pamatangannu waddangnga. Nasane tawe mal᷊alakka tamaataappa watangannu.

²¹ Mawu sarun dumarisikka ere su Wowone Perazim. I Tou sarun mamangalo ere su Wawal᷊annu Gibeon huna mapaamattu panduman-Ne, pandumanna apan maatiangnga taumata! I Tou sarun ma'ola'a manara-Ne apan maaherangnga.

²² I ya'u naaringikke laṛṛawessu Ruata Apan Atanggaṛṛanne wuṛṛu Lembontaṛṛino ipamate ahewallu runia. Arie mapasal᷊a manga wisara tatagu apan iwabbal᷊o'u indi. Sal᷊immurine mabbal᷊i nangillembon asaharanne si yamiu maddea'a asasal᷊amattu waddangnga!

Apapanden Duata

²³ Paddaringikke manga wisara'u, panutukke manga tanata'u.

²⁴ Sangkatou mabbawailla tawe sidutu mangke mammajeko, mammasolla wuṛṛu mannongkakku leta'a passuananna.

²⁵ Amungkangngu letangnge udde nasaddiate, i tou manal᷊iawukken bualanna, erenai jintan ma'itumma wuṛṛu jintan mawira. I tou massuannu gandumma darua hatine uaantagga, wuṛṛu su winggine sasuanna waine.

²⁶ I tou masingkatta ola'u manarane, ana waugu buatte niaṛṛaannu Ruatane.

²⁷ I tou tawe mappaattu wawol᷊engnga laṛṛinda ipakkinda jintan ma'itumma ara'e bolan roda ipanggilingngu jintan mawira. Su manara udde i tou nappaattu daṛṛa'iranna apan maṛṛanna.

²⁸ Sutempo makkinda gandumma, i tou tawe uata'a mammuulla sara maṛṛimunsa'a. Tawe! I tou masingkattu dal᷊anne makkinda suṛṛinone ringannu uasa'e roda su wowone ringannu tawe makkimunsa'a manga watun gandumma udde.

²⁹ Apapande udde darantane wuassu Mawu Apan Lembontaṛṛino. Anambon ṛiinnu Mawu masiṛṛongnga wuṛṛu sidutu mahessi.