YESAYA 27 - WUKE SUSI WATTI'U AL᷊AL᷊USASSA

¹ Sutempo udde Mawu sarun mappaattu hal᷊ele-Ne apan matohassa wuṛṛu maṛṛoro ipakkuumannu Lewiatan, atoanna apan tuttundo wuṛṛu mammul᷊issa udde, wuṛṛu ipamate nagan tahal᷊oangnga.

² Sutempo udde Mawu sarun mabbisara, “Pangantarite su ola'u wawail᷊annu anggore-U apan maṛṛansangnga.

³ Ya'u, Mawu, mandariagane; suapan tempo i Ya'u mamamokkane, allo ṛabbi i Ya'u mallu'adda tadea'u tawe piaddu manal᷊awa'a.

⁴ Ya'u tate maapendamma massa'u apia. Unnuwisara pia nannal᷊o ara'e aputta ṛoaanna, i Ya'u sarun mamabbassa, wuṛṛu sarangkanambone tutunganna.

⁵ Arawe napawe manga seettu uma-Ku maddea'a pattillummanna si Ya'u, wala'e i mangitou maddame-U, ore, maddame-U.”

⁶ Sutempo apan addantane, walahannu Israel naal᷊ihidda punnu alu apan nakkamutta wuṛṛu nabbalaga, see namene runia ringannu manga wuane.

Mawu nakkuumannu pabbawala-Ne

⁷ Mawu nakkuumannu uman-Ne tawe ere awakkattu i Tou nakkuumannu manga walahanna apan nasseetti mangitou. I Tou tawe namate uman-Ne ere i Tou namate seen-Ne.

⁸ Mawu nakkuumannu uman-Ne ringannu nandamme mangitou watukku wanua awagananna. I Tou nallimbuakka si mangitou ringannu anginna lal᷊eo wuassu ra'i.

⁹ Arawe manga rosan Israel tumba'u wotongnge ampunganna amungkangngu mezbah manga monganna ihilingnga al᷊ussa naal᷊ihidda apukka. Anambon tampan amania wuṛṛu hambarannu Monganna Asyera ṛinone ṛimunsaanna lai.

¹⁰ Soa pia tanda'a watune udde nabbal᷊ite lallangoanna wuṛṛu nitantangnga ere wadda'a mal᷊alangnga apan tawe loṛṛone. Ammul᷊annu winatangnga papadul᷊iananna u'anna wuṛṛu mangngillol᷊o isudde lapiddu mangnginsue manga rongnga wuassu manga rannan kalu.

¹¹ Napawe manga rannane maṛṛagasse wuṛṛu napaddite, manga wawine rumantate wuṛṛu manganute alu udde ipallaha anna. Walahanna udde mangke tawe maasunna apa-apa, ne Ruata Mandariaddine tate umakkanna ara'e tumal᷊antuppi mangitou.

Mawu nangapia walahan-Ne

¹² Sutempo udde Mawu sarun mangammullu pabbawala-Ge passambau wuassu Sal᷊ukku Efrat maddatingngu passarannu Mesir. I Tou sarun makkaen mangitou naal᷊ihidda taumata makkaen watun gandumma wuassu wal᷊a'ane.

¹³ Sutempo udde sarun iapatuntingikka trompetta wahewalla ipamaggo apia anambon taumatan Israel apan niramme su Asyur wuṛṛu su Mesir. I mangitou sarun dumanta su Yerusalem massubba Mawu su wuid-De apan na'ukkassa.