YESAYA 25 - WUKE SUSI WATTI'U AL᷊AL᷊USASSA

Antari daralo

¹ Mawu, ete I'o Ruata'u i Ya'u mamantuga Si'o wuṛṛu maddalo aran-Nu. Ana waugu manga manara-Nu lembon ma'atiangnga; I'o buatte nakkiinna ro'en dorone, wuṛṛu nammanara ringannu satia.

² Soa udde buatte niṛṛimunsang-Ngu; soa apan pia tanda batune nabbal᷊i winalal᷊anna. Wal᷊en araratuanna apan niola'u taumata raho nahohakke, wuṛṛu tate olaanna apia saran mal᷊annu-l᷊annu.

³ I'o sarun daloannu manga walahanna apan matohassa, wuṛṛu ia'ata'utta su manga soan walahanna apan maṛṛagissa.

⁴ Ana waugu I'o nabbal᷊i tatal᷊angannu taumata lome, tampa apan mal᷊annabba su taumata asiangnga sulal᷊ummu asasusa. Ete I'o pattilindumanna su anginna al᷊isusu, pattillummanna su paddissa masal᷊ihangnga. Ana waugu taumata maṛṛagissa namangalo naal᷊ihidda anginna al᷊isusu sutempo mangnguranna

⁵ naal᷊ihidda anginna mal᷊oso su leta'a apan maṛṛasa. Arawe I'o na'ola'a seetti yami tawe maawisara, I'o napaillol᷊on aintul᷊in taumata maṛṛagissa, naal᷊ihidda sasirungannu winabbawa napaasungen paddissa masal᷊ihangnga.

Ruata nanaddia sal᷊iwangngu andeangnga

⁶ Su Wuiddu Sion, Mawu Apan Lembontaṛṛino sarun manaddia sal᷊iwangnga su anambon walahanna su runia. I Tou nangimben kanna apan atemanganne wuṛṛu anggore apan buatte nipile.

⁷ Su puiddu wuidda udde i Tou sarun mamu'a winabbawan asasusa apan ua'ooppa manga walahanna.

⁸ Mawu Apan Lembontaṛṛino sarun makkimunsa'a papate saran mal᷊annu-l᷊annu! I Tou sarun mamedda allo mata wuassu al᷊awo'u hatin taumata, wuṛṛu mapaaraun asasusa apan papasannanannu uman-Ne su ahewallu runia. Mawu buatte nabbisara, wuṛṛu olangnge udde sarun mariaddi.

⁹ Sutempo udde taumata sarun mabbisara, “Mangke atonna, ete i Tou Ruatan kite; ete i Tou apan raṛṛaddoanni ite tadea'u i ite masal᷊amatta. Atonna, eteindi Mawu; ete i Tou apan raṛṛaddoanna. Orassa indi i ite lumala'en lal᷊uassa, ana waugu i Tou buatte nanal᷊amatta si ite.”

Ruata sarun makkuumannu Moab

¹⁰ Mawu sarun mallu'adda Wuiddu Sion, arawe Moab sarun ṛindanna ere laṛṛami su pangangadoannu sapadda.

¹¹ Tumanangnge sarun mangul᷊ukku limane ere taumata umalanga. Arawe Mawu sarun mapaawawon atatanggakki mangitou ma'oman sara i mangitou mallome.

¹² Manga tanda batu su Moab ringannu manga darandungnge apan matanggakka sarun iṛṛa'a-Ne wuṛṛu iramme-Ne su leta'a ma'oman sara mapussa'a ere awu.