YESAYA 23 - WUKE SUSI WATTI'U AL᷊AL᷊USASSA

Ramalanna su ola'u Tirus wuṛṛu Sidon

¹ Eteindi tanata su ola'u Tirus. Ei manga masasenggotta wuassu Spanyol apan mammare laudda, lalluaite! Sutempo massenggotta mapul᷊e wuassu Siprus, i yamiu niwal᷊oanna manungku soa Tirus nahohakke. Lawuanna wuṛṛu manga wal᷊ene naola'e winalal᷊anna.

^2-3 Sassal᷊iomante, ei tumana'u winggin sahatta, manga maddaragangngu Sidon! Ana waugu inanaramanne i yamiu mangngirimmu manga taumata su samba'an tahal᷊oangnga iapawalli gandummu Mesir wuṛṛu iappawal᷊u'a su anambon walahanna.

⁴ Ei soan Sidon, awawantugu nawul᷊ite! Tahal᷊oangnga apan mal᷊al᷊umma tate manga'u si'o lai, wisarane, “I ya'u taambe saran paassa niṛṛumana'a, taambe saran paassa namaddul᷊i ana'a esakka ara'e wawine.”

⁵ Ewe'e taumata Mesir lai sarun ṛumindu'a wuṛṛu maggio napawe maaringikka manungku Tirus buatte niṛṛimunsa'a.

⁶ Lalluaite, wuṛṛu tal᷊angke watukku Spanyol, ei tumana'u winggin sahatta!

⁷ Pa'ellege soanu Tirus apan piate ro'en tempo dorone. Eteindi soa apan inanaramanna mallal᷊umanna'a? Eteindi soa apan mandolokku manga taumatane su samba'an tahal᷊oangnga iapaatana'a poiaroddi?

⁸ Wal᷊inewe manga maddaraggange amonannu papunna apan lembon a'addatanna su runia? Isai apan makkawessa mangema'u Tirus, soa apan taṛṛinone ahewal᷊anne indi?

⁹ Mawu Apan Lembontaṛṛino, ete i Tou apan makkawessa wuṛṛu manguddussu awawungan tumanangnge su anambon hessi manara apan buatte niola'i mangitou, wuṛṛu namawo manga taumata apan aaddatanna su runia.

¹⁰ Inaite pammanara wawail᷊annu, ei tumana'u Spanyol, ana waugu ṛangkattu apalla tate lai.

¹¹ Mawu buatte namataddu lima-Ne su wowon tahal᷊oangnga wuṛṛu namilingngu manga araratuanna. I tou namarenta tadea'u manga tanda batun Funisia iapahohakka.

¹² Wisara Mawu, “Ei soa Sidon! I'o sarun tawe mallal᷊umanna'a apia. Tumanangngu allanganna. Salaiwe i mangitou mamengkangnga watukku Siprus, i mangitou tawe matammudda.” (

¹³ Wal᷊ine walahannu Asyur, ewe'e walahannu Babel apan namalan soa Tirus apan paparentannu winatangnga mal᷊aṛṛaga. Ete i mangitou lai apan napararisikku manga menara pamangaloanna, naṛṛa'an manga tanda'a watune wuṛṛu na'ola'a soa udde ete winalal᷊anna.)

¹⁴ Lalluaite, ei manga samakka! Soa apan ipangngasakki ara'e pangngantimani yamiu naṛṛimunsa'e.

¹⁵ Sarun a'omanna tempone Tirus timbul᷊iananna al᷊annune pitun pul᷊o su tonnane, uasul᷊ungngu uukku sangkatou ratu. Napawe nal᷊iudde tempone udde, Tirus sarun maola'a ere wawine masandaga sulal᷊ummu aantari indi:

¹⁶ Anute kecapi, pamal᷊iwutte soa, ei i masandaga niawontohanna apan niabbul᷊iananna! Tengkelle kecapi, pangantarite apia, tadea'u i'o naunganna apia.

¹⁷ Napawe nasuete pitun pul᷊o su tonnane udde, Mawu sarun mannaungnga Tirus wuṛṛu mamalane ma'ola'a manga manarane apan dorone. I tou sarun maddagangnga ringannu anambon araratuanna su wowon dunia.

¹⁸ Auntunganna wuṛṛu sewa apan aompaanne sarun tawe iaddo, arawe sarun ionggolli tou su Mawu. Manga taumata apan massubba Mawu sarun mappaattu roitta udde ipamalli anna wuṛṛu laubba apan haggausanni mangitou.