YESAYA 22 - WUKE SUSI WATTI'U AL᷊AL᷊USASSA

Ramalanna su ola'u Yerusalem

¹ Eteindi tanata su ola'u Wawal᷊annu Sondappa ara'e tatimmata: Ei, tumana'u Yerusalem, anio i yamiu niumawitta su atuppu wal᷊en?

² Tawe ṛinone ahewallu soa maandeangnga wuṛṛu u'uin al᷊al᷊uassa. Ana waugu manga taumatan pangalonu apan nate sulal᷊ummu pangalo indi wal᷊ine nate ana waugu napapangalo.

³ Anambon tembonannu tantaranu tinumal᷊angngu watanganne wuṛṛu niatawanna tantal᷊anna i mangitou taambe niapiti'u anaanna. Anambon taumatan kamiu apan matohassa niatawanna lai salaiwe i tou tunumal᷊angke mara'u.

⁴ Imbaṛṛangnga ma'innunu si ya'u; wala'e i ya'u lumuai manga taumata wuassu pabbawala'u apan natete. Arie maannamma maminalatta si ya'u.

⁵ Atonna, Mawu Apan Lembonmatanggakka wuṛṛu Lembontaṛṛino buatte nanantunnu allo indi maola'a allon patatiakka, atata'utta wuṛṛu pabbawawul᷊o su Wawal᷊annu Sondappa. Manga tanda'u watun soa buatte niṛṛa'a. Aintul᷊i ma'iontolla nunnalunna su manga wuidda.

⁶ Taumatan Siria nirumanta ringannu awal᷊o wuṛṛu keretan pangalo, taumatan Elam ahidde al᷊atianna wuṛṛu anaanna, taumatan Kir nanaddia allungnge.

⁷ Manga wawal᷊anne apan masuwukka su Yehuda napenen keretan pangalo. Tantaran awal᷊o nariahite su saruannu manga ngara pasallangannu su Yerusalem.

⁸ Anambon tanda'a watu su Yehuda naṛṛa'a. Sutempo udde, i yamiu mammarikissa ahiddu pangalo su gudangngu lutangnga.

^9-10 I yamiu naasangkalla manambo atonna ṛattangngu tanda batu soan Yerusalem apan ṛinone apianna. I yamiu mammarikissa al᷊awo'u wal᷊en su Yerusalem, nanggohakku manga pira suwallattu wal᷊en udde wuṛṛu mappaattu watune ipangapia tanda batun soa. Su ipangammullu ua'e,

¹¹ i yamiu pa'ola'a kolamma sulal᷊ummu soa wuṛṛu nangammullu ua'e udde wuassu kolamma tabbe. Arawe i yamiu tawe maaillal᷊a Ruata apan mal᷊annute makkiinnu sarangkanambone udde, wuṛṛu naaola'a udde nariaddi.

¹² Sutempo udde Ruata Apan Atanggaṛṛanne wuṛṛu Lembontaṛṛino nandolokki yamiu lumuai wuṛṛu lumallu, mallunggukka pua wuṛṛu malluṛṛe nasa karongnga.

¹³ Arawe mappianne, i yamiu pallal᷊umanna'e wuṛṛu papesetta. I yamiu pakkata sapi wuṛṛu domba, uminassa ṛemessa wuṛṛu ma'inumma ua'e anggore lapiddu mabbisara, “Wette i ite umanna wuṛṛu ma'inumma, ana waugu tiṛṛabbi i ite matete!”

¹⁴ Mawu Apan Atanggaṛṛanne wuṛṛu Lembontaṛṛino napal᷊iatta'u watangan-Ne wuṛṛu nabbisara, “Atonna, al᷊al᷊eo mangitou udde tawe Ta'u ampunganna maddatingngu i mangitou mate. I Ya'u, Mawu, buatte nabbisara.”

Tataggu si Sebna

¹⁵ Mawu Apan Atanggaṛṛanne wuṛṛu Lembontaṛṛino nandolo'u iapasasomban Sebna, tembonannu amonannu wal᷊en araratuanna, iapapasingkatta si tou tanatan Mawu indi,

¹⁶ “Su sunnanu i'o indi isai? Apate hakkanu na'oman sara i'o namaangnga labbingngu su wuiddu watu?

^17-18 Paaṛṛaddo, i Ya'u sarun mandammenu marau-rau. I'o sarun Ta'u attonganna wuṛṛu Ta'u lul᷊unanna ana see Ta'u ital᷊inggi ere bale watukku wanua apan bahewalla. Poiaroddi i'o sarun mate su sandiṛṛannu manga kereta ipammunganu. I'o buatte nandal᷊eo arannu ṛuangannu hagurangngu.

¹⁹ Ana waugu udde i'o sarun Ta'u iapaillol᷊o wuassu manaranu wuṛṛu Ta'u isossokka pangkannu apan matanggakka.

²⁰ Sutempo udde i Ya'u sarun mamaggo allang-Ku Elyakim ana'i Hilkia.

²¹ Laubbu awawantuga wuṛṛu papeṛṛennu sarun Ta'u illuṛṛe si tou. Al᷊awo'u taṛṛinonu sarun Ta'u ionggolla si tou. I tou sarun maola'a iamangngu tumana'u Yerusalem wuṛṛu Yehuda.

²² I tou sarun mamarenta su al᷊ungngu ratu pallaṛṛiten Daud. I tou sarun mangagassa aunsin araratuanna. Amungkangngu i tou mamu'essa, taweddu mapakkuudda, wuṛṛu amungkangngu i tou makkuudda, taweddu mapamu'essa.

²³ I tou sarun Ta'u onggol᷊annu aiananna apan tawe humolle ere pasa'a apan uapansakka ma'uatta su darandungnga. Anambon alahanne sarun addatanna ana waugu i tou.

²⁴ Arawe manga hawene wuṛṛu tanggumanne sarun mabbal᷊i winabbawane. I mangitou sarun tumungkelem biakke si tou, naal᷊ihidda urinna pasi ele su pasa'a.

²⁵ Amungkangngu udde mariaddi, ne passa'a apan nipa'u ringannu ma'uatta udde sarun mapallossa wuṛṛu manawo. Wuṛṛu eteudde panguddusannu ṛuanganna wuṛṛu anambon taumata apan uaantimma si tou. I Ya'u, Mawu, buatte nabbisara.”