YESAYA 21 - WUKE SUSI WATTI'U AL᷊AL᷊USASSA

Aellega su ola'u ananawon Babel

¹ Eteindi tanata su ola'u Babel: Naal᷊ihidda anginna al᷊isusu sussal᷊induṛṛunga sussabbi wadda'u anne, etearoddi darantane silaka wuassu wanua apan ma'ata'utta.

² I ya'u naasomba sondappa su ola'u manga arariadianna apan ma'ata'utta; su ola'u pandal᷊al᷊eo wuṛṛu pamamate. Inaite, tantaran Elam, pangaloite! Ei tantaran Madai, liwunete! Ruata sarun manguddussu anambon asasusa apan nirumanta waugu Babel.

³ Sondappa udde nangal᷊iwu'u na'oman sara tate maasilo wuṛṛu maaringikka lai. I ya'u matta'utta wuṛṛu nataddu'a, naal᷊ihidda sangkatou wawine apan tantal᷊anna mangngunsiwe.

⁴ Naungku u'ambul᷊isadda; apendamma matta'utta naola'a i ya'u mangngindo. Rabbi apan ta'u a'antimanna tumba'u mangngapiddu atata'utta.

⁵ I ya'u lai naasilo andeangngu pesetta apan buatte nisaddia; tampa aianannu taumata niwagoanna nasaddiate. I mangitou u'anna ma'inumma. Inaṛṛombanganne niaringikka parenta: “Ei manga piaṛṛa'u tantara! Riahite allungngu!”

⁶ Wua'udde Mawu nabbisara si ya'u, “Roote pangaddon sangkatou mandariaga wuṛṛu doloṛṛa'a i tou mamasingkattu apa apan niellehanne.

⁷ Amungkangngu i tou maasilo tantaran awal᷊o rumanta pattaṛṛa darua, tantara apan uasa'e keledai wuṛṛu unta, i tou ṛinone manutukka mapia-pia.”

⁸ Wua'udde mandariaga udde umui, “Tuangnga, i ya'u buatte nandiaga suapan allo wuṛṛu ṛabbi.”

⁹ Pa'ellege, uddete i mangitou! Tantara uasa'e awal᷊o nirumanta pattaṛṛa darua. Wua'udde mandariaga udde nabbatti'a, “Babel nanawote! Manga paal᷊uanna sassubbanni mangitou naṛṛimunsa'a uatal᷊eṛṛongnga su leta'a.”

¹⁰ Pabbawala'u Israel! I'o buatte niṛṛamissa wuṛṛu niṛṛinda ere watun gandumma. Orassa indi ta'u iapasingkatta si'o watti'a mapia apan ta'u naringiṛṛanna wuassu Mawu Apan Lembontaṛṛino, Ruatan Israel.

Ramalanna su ola'u Edom

¹¹ Eteindi tanata su ola'u Edom. Pia taumata u'ui si ya'u wuassu Edom, “Ei, mandariaga, ta'e mal᷊annu lai ṛabbi indi pirang ka'orassa lai maddatingngu marua'allo?”

¹² I ya'u sinumimbakka, “Marua allo rumantate, arawe sarun maṛṛabbi apia. Amungkangngu mappulu maiwal᷊o, rantate paiwal᷊o apia.”

Ramalanna su ola'u Arab

¹³ Eteindi tanata su ola'u Arab: Ei, taumatan Dedan, manga kafilanu naddasanna su anggaṛṛumunannu Arab.

¹⁴ Ei tumana'u leta'u Tema, painuma'awe manga taumata marou apan nirumanta ringannu, wuṛṛu onggol᷊ewen kanna manga tumatalangnga ara'e pengungsi.

¹⁵ Ana waugu i mangitou buatte tinumal᷊angngu watanganne wuassu hal᷊ele apan sasawutanna, wuassu al᷊ati'anna apan annatante, wuṛṛu wuassu pangalo apan ammahane.

¹⁶ Wua'udde Mawu nabbisara si ya'u, “Matipussa santonna lai awawantugu manga ṛuangannu Kedar sarun masue.

¹⁷ Manga taṛṛa piti'u Kedar uddewe taumata apan awaṛṛanianne. Arawe tumba'u matul᷊ungnga wuassi mangitou apan masal᷊amatta. I Ya'u, Mawu Ruatan Israel buatte nabbisara.”