YESAYA 20 - WUKE SUSI WATTI'U AL᷊AL᷊USASSA

Nabi apan uatantol᷊e maola'a tiala

¹ Wuassu parentan Sargon, ratun Asyur, tembonannu tantaran Asyur namangalo Asdod, sambau soa su Filistin.

² Tatallu su tonnane wua'udde, Mawu nandolokki Yesaya ana'i Amos nalluatta sapatune wuṛṛu nasa karongnga apan nilluṛṛene. I tou tinumuṛṛutta wuṛṛu niumamatta tantol᷊e wuṛṛu tawe sapatune.

³ Napawe soa Asdod nipangaloanna, Mawu nabbisara, “Allang-Ku Yesaya tatallute su tonnane uatantol᷊e wuṛṛu tawe sapatune. Indiwe tatialane wuassu apa apan sarun mariaddi su Mesir wuṛṛu Sudan.

⁴ Ratun Asyur sarun manawanna manga taumatan banua darua udde wuṛṛu i mangitou sarun ul᷊uhanna ara'e iapidda ringannu tantol᷊e. Timadde wuṛṛu dario'a, sarangkanambone sarun umamatta tawe laubba wuṛṛu apampakku ledda ringannu ottane ia'asilo, maola'a hahelo su taumatan Mesir.

⁵ Manga taumata apan mangngasakku ara'e mangngantimma Sudan wuṛṛu mangngasakku Mesir sarun sumassilla wuṛṛu awul᷊iannu antimma.

⁶ Sutempo udde manga taumata apan uatana'a su apanne sarun mabbisara, ‘pa'ellege apa apan nariaddi su walahanna apan ipangngasakki ite tadea'u mallu'adda si ite wuassu ratun Asyur. Ereapa wotongnge i ite masal᷊amatta?’ ”